¹ Tukatenda ki lingo? tukikala mu bwaghi, inga mpanga'nene sika? ² Tobo! beshwe twakwile bya bwaghi, buni butun'ikala lingo mu bwaghi? ³ Tamukumana buno beshwe bansayi twapatishwagha mu Yesu Kilishitu, ta mu lukwo lwaghe u'mutwapatishibwagha? ⁴ Twakundwagha ghamoyi nawe mu lukwo lwaghe,kubuno anga Kilishitu atukagha ku bakuyi mu lukumbu lw'ise,ububo nu beshwe tutabange lelo mu kalamo kaghe. ⁵ Ububo, ndi twabinde muntu umoyi ghamoyi nawe kutingila lukwo lwaghe,tukaba lingo muntu umoyi kutingila kutuka kwaghe ku bakuyi, ⁶ Mukumana buno muntu witu wa kalayi akwagha ku musalaba nawe , buno mubili wa bwaghi ubole,nu tube lingo ntumwa sa bwaghi; ⁷ kubuno ulya wakwa ta mu kandwa lingo wa bwaghi. ⁸ Ndi twakwagha ghamoyi na Kilishitu, twakatisha buno tuk'ikala ghamoyi nawe, ⁹ mukumana buno Kilishitu watukagha ku bakuyi nta nakwa lingo; lukwo talwite lingo bwangato kuwe. ¹⁰ Kubuno akwilagha bwaghi limoyi umpanga,atukile ku bakuyi,nu eli gho kutingila Ghongo. ¹¹ Nu benywe mwindole ko,anga mwakwilinde bwaghi,nu mweli kwa Ghongo mu Yesu Kilishitu. ¹² Bwaghi tabwikalaghe lingo mu mibili sinu si kakwa ,nu mwimilaghe lingo nkasa saghe. ¹³ Ta mwesane bighansa bya mubili winu ku bwaghi anga kikayi cha bwaghi, tondo mwishighilile benywe binene kweli Ghongo,anga ba batukile ku bakuyi, nu mweleshe Ghongo bighansa binu anga bikayi bya bulili. ¹⁴ Kubuno bwaghi tabukaba na bwangato kwinu, kubuno mweli,ta mu mulembe, tondo mu mpang'inene. ¹⁵ Ki lino? Tukite bwaghi kubuno tuli ta mu mulembe, tondo mu mpang'inene? Nu kilo.Bulayi nobo! ¹⁶ Ta mukumana buno mu nkwishighilila ku muntu anga bakobe, mukumwongwilila, muli bakobe ba ghoso umukwongwilila,anga bwaghi bukwicha ku lukwo, ali kwongwilila ku kwicha ku bulili? ¹⁷ Tondo Ghongo atatwe, kubuno gha mwabagha bakobe ba bwaghi, mwongwililagha mu mutima winu,bitondo bimwegheshibwagha. ¹⁸ Gha mwatukagha mu bwaghi, mwaghalukile bakobe ba bulili._ ¹⁹ Nkutenda bu kutendagha bantu ku bushoshu bwa mubili winu.Nubo lingo mwesanile bighansa binu anga bakobe ba mabi buno mwike ku bwaghi,nu lelo mwesane bighansa binu anga bakobe ba bulili, buno mwike ku busanana. ²⁰ Kubuno gha mwabagha bakobe ba bwaghi,ta mwakandwagha na bulili . ²¹ Bighuma ki u bimwakonamyagha lino?Bighuma bimukongwila nsoni lelo.Kubuno gha shinda ibyo binsayi nti lukwo. ²² Tondo lelo, gha mwashighililwa ku bwaghi nu kughaluka bakobe ba Ghongo, mweka bighuma bya kusanana , nu kushila agho kalamo ka milyalya. ²³ Kubuno indigho lya bwaghi u lukwo; tondo lukaso lwa tughu lwa Ghongo,u kalamo ka milyalya mu Yesu Kilishitu Mukota witu.