¹ Kushighililwa kwitu kutingila lukatisho, twite boolo ghamoyi na Ghongo mu Mukota witu Yesu Kilishitu, ² kwaghe ukutwamona mpanga kutingila lukatisho ,u mutwikala,nutunkwitata mu malelamilo ma lukumbu lwa Ghongo. ³ Ta kwibyo umpanga, twitatila nu minubo ,kumana buno munubo ukubuta kwinya mutima, ⁴ kwinya mutima ukukinda malingiko, nu kukinda malingiko,ukulisha malelamilo. ⁵ Tondo malelamilo tamakwengelelagha , kubuno lutundo lwa Ghongo lwisala mu mitima situ kutingila Muusa Musogha uteleshibwe. ⁶ Kubuno ghatwabagha tatwite maghala, Kilishitu ,ku bindi bikumanwa, akwile ku myanya sa bantu babi. ⁷ Ta kusoshu muntu kukwila muntu mubi; tondo bu busoshu kukwila muntu musogha. ⁸ Tondo Ghongo akulosha lutundo lwaghe ku tweli, kubuno, gha twabagha tucheli baghi, Kilishitu atukwilinde. ⁹ Nu bwingi kubo, lola twasanana kutingila mikilha saghe, nu akatonia mu mushibu waghe. ¹⁰ Kubuno ndi, ghatwabagha baghini, twalonganilwe na Ghongo kutingila lukwo lwa mwana waghe,nu busogha k'obo,mu kulongomana nawe,tu kona kutingila kalamilo kaghe. ¹¹ Ta nubo umpanga, tondo tukw'itatila mu Ghongo kutingila Mukota witu Yesu Kilishitu ,muwe umut weleshibwe malongano. ¹² Uchasula,kutingila muntu umoyi bwaghi bwinginde mu kisi,nu kubo bwaghi lukwo, nu lukwo lweninde ku bantu bansayi,kubuno bantu bansayi bakitagha bwaghi, ¹³ Kubuno kutukila mulembe bwaghi bwabinde mu kisi, nu bwaghi ta bwaghanswa gheteli mulembe. ¹⁴ Kutukila agho lukwo lwangatile kisi tukila Adamu kwikila ku Musa, nu ku babo batakitagha bwaghi,anga Adamu,wasusana anga olya ukika. ¹⁵ Tondo ta bwa lukaso lwa tughu anga kukita bwaghi;kubuno bwaghi bwa muntu umoyi,bengi bakwile,nu lukaso lwa mpang'inene kutukila mu ntu umoyi Yesu Kilishitu,kalamo kalamishe bantu bengi. ¹⁶ Nu ta ku lukaso lwatukagha ku muntu umoyi wakitagha bwaghi;tondo ku bwaghi bumoyi ukwatukinde kughayibwa,tondo kutingila lukaso lwa tughu,bantu bengi bashighilindwe bwaghimbwabo. ¹⁷ Ndi ku bwaghi bwa muntu umoyi ,lukwo lwikile mu kisi,bwingi kobo bantu beleshibwe mpang'inene nu lukaso lwa bulili bakaba na kalamo kutingila Yesu w'inene. ¹⁸ Agho lino,kutingila ku bwaghi bumoyi kwaghibwa kwikile ku bantu bansayi.Nu ku kitondo kimoyi cha bulili,kushighililwa bwaghi kwikile ku bantu bansayi. ¹⁹ Kubuno kwinda kongwa kwa muntu moyi,bengi bakitile bwaghi,nu kwongwilila kwa muntu umoyi, bantu bengi bakaghulukile basanana. ²⁰ Tondo, mulembe wabikilwe buno bwaghi bube bwingi, tondo gha gheli bwaghi, mpang'inene sabinde ningi, ²¹ Kubuno ,bwaghi bwashwile na lukwo,mpang'inene sa bulili,sikile na kalamo ka milyalya kutingila Yesu Kilishitu Mukota witu.