¹ Ki chaswaghila Bayuda, ali ki u busogha bwa kumonyeshibwa? ² Buli bunene ku nsila insayi,kubuno bitondo bya Ghongo beleshibwe byo tanga. ³ Nu ndi bamoyi kubo ta ba katisha,bwaghi bwabo bunashimya bulili bwa Ghongo ? ⁴ Tobo!tondo Ghongo ekumanililwa wa bulili,nu muntu unsayi u wa bwisa, anga bwatililwe: Buno usangwe wa bulili ku bitondo byobe,nu wakindagha gha bakukughaya. ⁵ Tondo ndi kwinda kusanana kwitu ndi kwimika kusanana kwa Ghongo, tutende ki? Ghongo nta sanana mu mushibu waghe? (nkutenda anga bantu). ⁶ Tobo! buni bwakaghaya kisi we Ghongo? ⁷ Nu ndi, ku bwisa bwani, bulili bwa Ghongo bukumoneka ko ku lukumbu lwaghe ,buni bunaghibwa lingo anga mwisa bwaghi? ⁸ Ki kinasula nakita bubi nu busogha kimoneke ko, anga bamoyi kubo bakutushingila bwisa, buno tukubitenda?Kwaghibwa kwabo kuli kwa bulili. ⁹ Ki lino !Tuli basogha ? ¹⁰ Tobo. Kubuno twaloshishe kalayi buno bansayi, Bayuda nu Bagiliki beli mu bukota bwa bwaghi,anga bwatililwe:Taku wa bulili,ta wampa. ¹¹ Taku mulenganya,ta wampa ukulonda Ghongo;bansayi baabukile,bansayi babulughanile; ¹² taku wampa ukukita busogha,ta n'umoyi; ¹³ Mwegho wabo uli nsinda sighulwa; ndame sabo sili sa kwengelela bango.Ku milomo sabo kuli busungu bwa nsoka; ¹⁴ kanywa kabo kisala bishulilo nu lubaba; ¹⁵ Bite maghulu masasha mu kwitila mikila; ¹⁶ busambya nu musambo byeli mu nsila sabo; ¹⁷ Tabakumana nsila sa boolo; ¹⁸ Mu miso mabo tabakukwa Ghongo boba. ¹⁹ Nu tukumana binsai byatendwa mu mulembe ,akubula babo beli mugho, kubuno kanywa kansayi kashiba ,nu bansayi bamanwe na Ghongo buno bantu ba bwaghi. ²⁰ Kubuno ta kweli ukasanana kutingila milimo sa mulembe,tondo nti kutingila mulembe u kweli kumana bwaghi. ²¹ Tondo ,ghe teli mulembe u kweli bulili bwa Ghongo,bukutenenekwa na Mulembe nu balenganya, ²² Bulili bya Ghongo kutingila lukatisho kweli Yesu Kilishitu ku bansayi bakatisha,takweli kusombola. ²³ Kubuno bansayi bakitile bwaghi, nu kwimwa lukumbu lwa Ghongo; ²⁴ Nu bansayi bamanwa ba bulili ku mpang'inene,kutingila kalamo ka bulili keli mu Yesu Kilishitu. ²⁵ We u wabikwagha na Ghongo,ku tingila mikila saghe,buno abe kisansa ku babo bakakatisha,buno aloshe bulili bwaghe , kubuno ashighililagha bwaghi bwakitwagha kalayi , ²⁶ buno aloshe bu bulili bwaghe lelo k'olya wamukatisha. ²⁷ Ki uchakwitatila?Bwashilile ubo.Ku mulembe ki? Ku mikolo sa milembe? Aye, tondo ku mulembe wa lukatisho. ²⁸ Kubuno tukulenganya buno muntu asanana kutingila lukatisho,ta ku mikolo sa mulembe. ²⁹ Nu Ghongo eli tughu Ghongo wa Bayuda ? Nteli nuwe wa Babilongo? Naki, eli nuwe wa bilongo, ³⁰ kubuno kweli Ghongo umoyi, ukaghansa babo ba bulili,bamonywile nu batamonywile. ³¹ Twashimya mulembe kutingila lukatisho? Tobo ! tondo twimika mulembe.