¹ Beshwe bankambwe twema kweka busoshu bwa babo bete bankambwe,ta kwindola beshwe binene. ² N'omoyi ku beshwe abogyebogye munabo ku bisogha kubuno amwimike. ³ Buno Kilishitu nt'indolagha w'inene, tondo anga byatililwe :bituko bya babo bakutukagha ,byabinde byani. ⁴ Tondo, kinsayi chatilwagha kalayi ,chabagha cha kutweghesha,kubuno kutingila nkiki nu bubobelelo bi tukweleshibwa na bitondo bya Ghongo,tulelamile. ⁵ Nu Ghongo wa nkiki nu bubobelelo abeleshe mulenganya umoyi gha musambana,anga Yesu Kilishitu, ⁶ Kubuno bansayi mu kitondo kimoyi ,mutate Ghongo nu Tata wa Mukota witu Yesu-Kilishitu . ⁷ Musekelane anga bwa basekelagha Kilishitu mu lukumbu lwa Ghongo. ⁸ Nkutenda buno,Kilishitu abagha mukiti wa bamonywa buno aloshe bulili bwa Ghongo nu kukucha indaghi lyeleshibwagha ba Tata, ⁹ buno bilongo batate Ghongo ku lukogho lwaghe,anga bwatililwe : Uchasula nkakutata mu bilongo nu n'kemba ku lukumbu lw'ishina lyobe. ¹⁰ Bwatendwa lingo :Bilongo muboghemboghe na bantu baghe! ¹¹ Nu lingo: mutate Mukota,benywe bilongo binsayi, bantu bansayi bamwembele na nkugho! ¹² Isaya nuwe atendagha :Mu kibuti cha Yese u'mukatuka olya ukabikwa buno imalile bilongo ;bilongo bika mulelamila. ¹³ Nu Ghongo wa malelamilo,abisashe mboghimboghi nu boolo mu lukatisho,inga musalilana na malemalilo ,kutingila bwangato bwa Muusa Musogha! ¹⁴ Ku benywe bisakwitu,n'kumana buno muli basogha,nu mwite mulenganya,nu munakosha kusungulana. ¹⁵ Kubungo,nabatilila na nkas'inene anga kubakengesha ku mpong' inene si neleshibwe na Ghongo, ¹⁶ nibe mukiti wa Yesu-Kilishitu mu kantighi na batekatisha,. mu kukita mulimo wa musaghu musogha wa Ghongo ,kubuno batekatisha babe lukaso lusogha nu lwa sanana,kutingila Muusa Musogha. ¹⁷ Nema kwitata,mu Yesu Kilishitu ku bikayi bya Ghongo. ¹⁸ Kubuno nshikakosha kutenda ku bingo bitondo,ndi ta bibyo byankitinde Yesu Kilishitu mu kashi sani,buno batekatisha bimile kutingila kutenda nu kukita, ¹⁹ kutingila bwangato bwa bitangalo nu bighanaghana,kutingila bwangato bwa Muusa wa Ghongo,kubuno kulingila Yelusalemu nu myelo sa bwighibwighi kwika ku kisi cha Uliliya, nisasishe uko kunsayi musaghu musogha wa Kilishitu. ²⁰ Nu nitatinde kusambala musaghu musogha kuko kwabagha Kilishitu ntongwibwa ko, kubuno inashwa kobaka kobakile bango,anga bwatililwe: ²¹ Ba batamwongwagha ko bakalola, babo batasambalindwe misaghu saghe,bakamana. ²² Icho u chanangilagha kwenda kwinu. ²³ Tondo lelo,nshite cha kunangila mwecho kibe,nu myaka ningi nkubagha na nkasa sa kwenda ku mweli. ²⁴ Nkulelamila buno nabalole ko mu kutinga gha nkenda Ishipania,nu kwelekeshibwa na benywe ,mu kushila nkasa sa kubamona ko. ²⁵ Lelo nenda ku Yelusalema, ku mulimo wa basanana. ²⁶ Kubuno,ku Makedonia nu ku Akaya,bantu bashimagha kukita mukongolo wa kwelesha bakene mu nkatighi sa basanana ba Yelusalemu. ²⁷ Bashimagha kubukita,nu lwabagha lukakisho kwabo; kubuno batekatisha beleshibwagha kibhu mu kitondo cha Ghongo, nubo bemana kubelesha ku bibyo bisogha bya mubili. ²⁸ Gha nkashila ibyo bitondo nu kushila kubelesha eso nkaso,nkenda ku Ishipania nu kutinga kwinu. ²⁹ Nkumana buno mu kwenda kwinu,lukasanilo lunene lwa Kilishitu u lunkenda nalo. ³⁰ Bisakwitu, nabema,kutingila Mukota Yesu Kilishitu nu lutundo lwa Muusa Musogha,mulwane ghamoyi n'ine, mu nkuseghela kwa Ghongo, ³¹ kubuno nisoghonoke mu maboko ma bantu babi ba Yudea, nu mulimo unenda ku kita ku Yelusalemu wimilwe na basanana, ³² buno nike kwinu na mboghimboghi,ndi u bwashima Ghongo,nu nomulwe gha mweli. ³³ Nu Ghongo wa boolo ikale na benywe bansayi! Amina !