¹ Nabasingila Foibe mubitu witu uli diakono mu Kanisa ka Ghongo ku Kankulia, ² buno mu musekele busogha mw'ishina lya Mukota witu,anga basanana,mumukashe na bintu bite nabyo nkasa kwinu,kubuno akashagha bengi nu ininene. ³ Mwankashisha samba Pilisika nu Akila,bankukita nabo nkashi mu Kilishitu. ⁴ Biyesanile buno nilame; nti n'inene u nkubakasanila,tondo Tunisa tunsayi twa bilongo. ⁵ Mwankashishagha samba Kanisa; keli mu numba sabo. ⁶ Mwankashishagha samba Malia wanubagha mu kubakitila mulimo. ⁷ Mwankashishagha samba Andoloniko nu Yunia babuti bani,nu banitu ba lukando,bakumanwa bantu banene mu nkatighi na ntumwa,nu balingagha kumana Kilishitu kw'ine. ⁸ Mwankashishagha samba Ampilisi mwinda wani mu Mukota. ⁹ Mwankashisha samba Ulibano munitu wa nkashi sa Kilishitu nu Sitansisi,mwinda wani. ¹⁰ Mwankashisha samba Apele wamanwa mukilishitu.Mwakashishagha samba bantu beli mu numba sa Alishitambule. ¹¹ Mwankashisha samba Helodiana ,mubuti wani.Mwankashishagha samba bantu beli mu numba sa Nalasisi ba bashima Mukota. ¹² Mwankashisha samba Tilifene nu Tulifosa bekukitila Mukota mulimo.Mwankashisha samba Peleshide,mwinda wani,wakitagha nkashi ningi sa Mukota. ¹³ Mwankashishagha samba Lufusi nsombolwa sa Mukota,nu nina ,u mama tondo. ¹⁴ Mwankashishagha samba Asikilida,Felegone,Helemeso,Patolobabi,Helemasi nu bisakwitu beli nabo. ¹⁵ Mwankashishagha samba Filologo nu Yuliani,Nelie nu mubitu waghe,nu Olempe,nu basanana bansayi beli ghamoyi nabo . ¹⁶ Mukashane samba gha musambana kutingila mpeshi.Tunisa tunsayi twa Kilishitu twa bakasa samba. ¹⁷ Bisakwitu,nabema,mwalolagha busogha ku babo bakulekanucha bantu nu bakukita mabala,ku megheshibwa ma mweleshishwe.Mwintuche kubo. ¹⁸ Buno bantu anga abo tabakukitila Kilishitu Mukota witu nkashi,tondo nda sabo;Nu ku bitondo byabo bya kutebeka,bakushimisha mitima sa batakokomela mu lukatisho. ¹⁹ Ku benywe,kwimila kwinu ku kumanwa na bansayi;na ba boghelaboghela,nu nkushima mube balenganya ku bili bisogha,nu ba bulili ku bitondo bibi. ²⁰ Nu Ghongo wa boolo akananta Kahinga ku manshinshi minu.Nu m'pang'inene sa Mukota witu Yesu Kilishitu sibe na benywe ! ²¹ Timote munitu wa nkashi abakasha samba, nu Lukiaso,Yasoni nu Sosipata babuti bani. ²² Nabakasha samba mu Mukota ,ine Telutulo natila mano maluba. ²³ Gaiso mugheni wani nu wa Kanisa kansayi ,babakasha samba.Elashito mulangi wa bikulo bya musumba abakasha samba, nu mubuto witu Kalitusi . ²⁴ Nu mpang 'inene sa Mukota witu Yesu Kilishitu sibe ghamoyi na benywe bansayi !Amina ! ²⁵ K'olya wakosha ku bakokomesha mu Musaghu musogha nu meghesha ma Yesu Kilishitu,kuyangana na kuloshwa ku bya biswagha kalayi , ²⁶ tondo byalimbulwa lelo kutingila mitilo sa balenganya, ku lukakisho lwa Ghongo wa milyalya ,nu lwekwa mu bulenganya wa bilongo binsayi,buno bimile lukatisho, ²⁷ Kweli Ghongo,mulenganya w'inene,lukumbu lube nkiko nu nkiko kutingila Yesu Kilishitu!Amina!