¹ Natenda lingo: Ghongo asombile kilongo chaghe ?Tobo,bulayi noko!Kubuno nw'ine nili Muisilaeli,mu kibuti cha Bulaimu mu lusu lwa Benyamina. ² Ghongo nta sombile kilongo chaghe,cha sombologha mwa kalayi.Tamukengele Kitondo cha Ghongo chatendwagha ku Elia,buni bwatalikilagha Isilaeli kweli Ghongo: ³ Mukota,bitile balenganya bobe,bendulile tusasa tobe;nashighinde ine nene ,nu bakulonda kunita? ⁴ Tondo buni bwamusubishagha Ghongo?N'imbikinde bantu elefu mutubakamo ,ba takomelagha Baali mashwe. ⁵ Ubo nubo, mu bino bindi kwashighala bakeke kubo,kuyangana na mpang'inene sa kusombolwa. ⁶ Tondo,ndi ku mpanga,ta ku mikolo kashi;kutenda bungo, mpanga tasinaba lingo mpanga.Ndi ku mikolo, kashi ta mpanga lingo;kutenda bungo mukolo ta weli mukolo lingo. ⁷ Kiki lingo? Cha kikulonda Isilaeli, ntachamonekile,tondo kusombola kwa kimonile;bango beleshibwe mitima mbibu, ⁸ anga bwatililwe :Kalagha abeleshishe mutima wa kunsensela,miso ma ta kumona,nu matuyi matakwongwa,kwikila buno busi.Nu Daudi atenda: ⁹ Mesa mabo mabaghalukinde kategho,kakilha,ikitalo ,nu indigho! ¹⁰ Miso mabo mashibwe,nu tamekumona lingo,nu mugongo wabo ukumbame bindi binsayi. ¹¹ Natenda lino:Ndi mu kukitala,u mubalondagha kuwa?Bulayi noko ! Tondo ku ikitalo lyabo,lonio lwikinde Bilongo,kubuno babuche lughi. ¹² Ndi ikitalo lyabo,lyabagha butumba bwa kisi,nu bukeke bwako butumba bya bilongo, bakashighala banga gha bakisungula ku mutima? ¹³ Nababula byo benywe ,bilongo ;Ubo buneli mtumwa sa bilongo,natata mulimo wani kwa Ghongo, ¹⁴ ndi bwakoshibwa,nibuche lughi lwabo babo ba kilongo chani,nu konia bamoyi kubo. ¹⁵ Kubuno,ndi kusombwa kwabo kwabinde malongano mu kisi,buni bukaba kukuluchwa kwabo,ndi ta kalamo mu nkatighi na bakui? ¹⁶ Nu ndi bitangi bikeke bi bisogha,binsai bingi bya kumbusa nti bisogha nubyo; nu ndi mushi u musogha, ntabe nuso seli nsogha. ¹⁷ Tondo ndi lutabe lumoyi lwakalwa,nu we,musabibu wa mbala,wabikwa gha satuka,nu wise ghamoyi na mushi nu matongu ma musabibu, ¹⁸ ntwitate mu kutebwa kweso ntabe.Ndi wintata,mana buno towe u nene uso mushi,tondo mushi uwa kweka. ¹⁹ Ukatenda lino: Ntabe saketulwagha buno nighelekwe. ²⁰ Ubo buli bulili; sakalwagha kutingila ku takatisha kwabo,nuwe weli gho kutingila lukatisho.Ntube mutumbitumbi ,tondo kwagha boba; ²¹ kubuno Ghongo nte ndelinde ntabe, nuwe ta ka kwendelela nuwe. ²² Lola lino busogha nu kusugha kwa Ghongo;kusugha ku babo bitukishe kuwe ,nu busogha bwa Ghongo kuwe, ndi wikala nu ku kokomesha mu bubo busogha;ndi tobo nuwe ukakalwa. ²³ Bo nubo, ndi tabindisha mwa mukwitucha kuwe,nubo nti bakakuluchwa lingo,kubuno Ghongo ite maghala ma ku bingisha lingo. ²⁴ Ndi uwe wakalwagha ku musabibu wa mbala bulili,nu bakuluchwa mu musabibu wa bulili takuyangana na buweli, nubo bemana ku kuluchwa ku musabibu wabo kuyangana na bu bikala. ²⁵ Buno bisakwitu,nshikushima mwinde kumana icho kindo kubuno mwindolaghe anga bite mulenganya,buno bamoyi ku Baisilaeli babinde na mutima mubibu, kwikila bilongo bingo binsayi bingile . ²⁶ .Nubo,Isilaeli unsayi akona,anga bwatililwe :Mulamya akatuka ku Siona,nu akabembucha Yakobo ku mabi ; ²⁷ nu nkanunsana nabo gha nkatucha bwaghi bwabo. ²⁸ .Mu musaghu musogha ,beli baghini kutingila benywe;tondo mwa mu kusombolwa,bashimwa kutingila b'ise babo. ²⁹ .Kubuno Kalagha nti kuluche mo ku byelesha, nu ku byamanila muntu. ³⁰ Nubo tabimilagha Ghongo kalayi nu mwa ku munana mweleshibwagha lukogho, ³¹ Nubo lelo tabiminde kubuno kutingila lukogho lumweleshibwagha,nubo beleshibwe lukogho. ³² Kubuno Ghongo abikile bansayi ghamoyi mu kumunana,kubuno abakwile bansayi lukogho. ³³ Ee butumba bunene,bulenganya nu bwenge bwingi bwa Ghongo;nu kwaghya kwaghe takunaghelekwa,nu nsila saghe tasikumanililwa! Kubuno , ³⁴ nayi wamanile mulenganya wa Ghongo,ali nayi wabagha mukungu waghe? ³⁵ Nayi wamweleshagha mutangi,buno akulukishwe? ³⁶ Kwaghe,kutingila we,nu kuwe u kweli binsayi.Lukumbu kwaghe mu kinko insayi.Amina!