¹ Kushila ubo,namonagha baghenshi banai bimalile kushinda ndenge inayi sa kisi;Bakushibila lumpupu inayi sa kisi,buno mu kisi mutingaghe lingo lumpumpu ali mu kitatenge,ali ku muti . ² Nu nalolagha ku ungo mughenshi,wabagha akubakama ku kutukilagha musi,nu uwakatilinde kamanililo ka Ghongo weli gho; alekelagha mulenge ku babo baghenshi banai ba babulwagha bakite bubi mu kisi nu ku kitatenge,nw'inga tenda: ³ Mukitaghe lingo bubi mu kisi,ali mu kitatenge,ali ku miti,kwikila busi butukashila kubika kamanililo ku malanga ma bakiti ba Ghongo. ⁴ Nu nongwagha mughanso wa babo babikwagha kamanililo,elefu ighana makumi manayi na banai ba bilongo binsayi bya bana ba Isilaeli; ⁵ ba kilongo cha Yuda,elefu ikuni na babili babikwagha kamanililo;ba kilongo cha Lubeni,elefu ikumi na babili;ba kilongo cha Gadi,elefu ikumi na babili; ⁶ ba kilongo cha Aseli,elefu ikumi na babili;ba kilongo cha Nafutali,elefu ikumi na babili;ba kilongo cha Manase ,elefu ikumi na babili; ⁷ ba kilongo cha Simioni,elefu ikumi na babili;ba kilongo cha Lawi,elefu ikumi na babili;ba kilongo cha Isakali,elefu ikumi na babili; ⁸ ba kilongo cha Sabuloni,elefu ikumi na babili;elefu ikumi na babili ba kilongo cha Yesefu;ba kilongo cha Benyamina,elefu ikumi na babili babikwagha kamanililo. ⁹ Kushila agho,nalolagha,nu lola,kwabagha kikembe kinene,kitanaghanswa na muntu,cha bisi binsai,cha bilongo binsayi,cha bantu bansayi nu cha mitendeshi insayi.Babagha bimalile bwighi na kishumbi cha bukota nu bwighi na Chana cha Mbuli,bashwalile nopo senga,nu bite mangalala mu maboko mabo. ¹⁰ Nu bakukugha n'ishuki linene,mu kutenda:Lonio lukutuka kweli Ghongo witu wikalile ku kishumbi cha bukota, nu kweli chana Cha Mbuli. ¹¹ Nu baghenshi bansayi babagha bikalile mu ntungo sa kishumbi cha bukota nu bakungu nu bibumbwa binayi byeli gho;nu bakomagha mashwe nu malanga mabo bwighi na kishumbi cha bukota,nu bakumbamilagha Ghongo, ¹² mu kutenda:Amina !Kwemba nembo,lukumbu,bulenganya,lukasanilo,lwanso,bwangato,nu maghala,bibe kweli Ghongo witu,mu kinko nu nkiko!Amina! ¹³ Nu umoyi kwabo bakungu ambushagha :Babo bashwalile nopo senga,u banayi,nu batuka kuni? ¹⁴ Namwakulagha : Mukota wani, ukumana.Nu ambulagha:Ubabo batuka mu munubo munene; basughile nopo sabo,nu basengishe mu mikilha sa Chana cha Mbuli. ¹⁵ Uchasula, beli bwighi na kishumbi cha Ghongo,nu bakumukitila nkashi musi nu kindi mu numba saghe sa kukumbamila.Olya wikalile ku kishumbi cha bukota akababhukila na hema saghe ; ¹⁶ Tabakwongwa nsala lingo,tabakakwa mpusha lingo,nu kilungu cha musi takikabaghisha lingo. ¹⁷ Kubuno Chana cha Mbuli cheli munkatighi na kishumbi cha bukota kikabalanga nu kubensha kweli masi ma kalamo, nu Ghongo akabatucha bitengetenge mu miso mabo.