¹ Nalolagha,ghakandulagha Chana cha mbuli kamoyi ku oto tumanililo mutubakamu,nu nongwagha umoyi ku bibumbwa binayi byeli gho akutenda anga n'ishuki lya mikulumilo:Shwa! ² Nalolagha,nu lola,mpunda senga sa pamukagha .Wabagha gha ntata naso,abagha na butati;eleshibwagha nkumbu,nu endagha mukindi buno akinde. ³ Mu kukandula kamanililo ka tubili,nongwagha kibumbwa cha babili cheli gho kikutenda: Shwa. ⁴ Nu kwapamukagha engo mpunda sasusa mikilha, wabagha ghantata naso ,eleshibwagha bwangato bwakutucha boolo mu kisi kubuno bantu baketulane ;nu eleshibwagha mbotela inene. ⁵ Ghighulagha kamanililo kisatu,nongwagha kibumbwa cha b'isatu cheli gho kikutenda:Shwa.Nalolagha,nu lola kwapamukagha mpunda sina,nu wabagha gha ntata naso,abagha na kipimo cha kulingimanya mu kuboko kwaghe. ⁶ Nu nongwagha mu kantighi na bibumbi binayi byeli gho ishuki likutenda: kipimo kimoyi cha ngano kikughulwa lufalanga lumoyi ku busi,nu bipimo bisatu bya masaka ku lufalanga lumoyi ku busi,tondo ukitilaghe makiti nu maku bubi. ⁷ Ghighulagha kamanililo k'inayi,nongwagha ishuki lya kibumbwa k'inayi cheli gho kikutenda:Shwa. ⁸ Nalolagha,nu lola,kwapamukagha mpunda sasusa masi ma ntungu.Wabagha gha ntata naso,iyanikile ishina Lukwo,nu kishiki cha bakui cha mwelekeshishe.Beleshibwagha bwangato ku mulenga w'inayi ku kisi ,buno bashiche bantu na mbotela,na nsala,na nkwo,nu na nama sa mbala sa kisi. ⁹ Gh'ighulagha kamanililo k'itano,namonagha munda na kasasa,mitima sa babo baketulwagha bisansa kubushi bwa kitondo cha Ghongo nu kubushi bwa buteneneki bu bakitagha. ¹⁰ Balekelagha mulenge mubibu mu kutenda:Mpina ki,Mukota wasanana nu wa bulili ukindisha kughaya nu kulighya mikilha situ ku bantu ba kisi? ¹¹ Nu umoyi kubo eleshibwagha lopo lwenga;nu babulwagha bomulwe bindi bikeke lingo,kwikila busi bukakuka mughanso wa banabo ba mulimo nu bisakwabo bemanagha kukwa anga bo. ¹² Nalolagha,gh'ighulagha kamanililo ka mutuba,nu kwatingagha kalingini kanene mu kisi,musi winagha anga kampilo ,nu mweshi waghalukagha anga mikilha, ¹³ nu tumbalumbalu twakolokagha ghansi kutuka kw'ighulu anga mutini wa yungwayungwa na lumpumpu lunene lukukolocha bighuma byaghe. ¹⁴ Ighulu linshigheleshagha anga kitabo kikughondwa;Nu mindiko insayi nu tukishi byatukagha ku bishiki byabo. ¹⁵ Bami ba kisi,bakulu ,bakulu ba basula,batumba,bite maghala,bakobe bansayi nu bantu bashighililwa,bimbisagha mu lukunda lwa mindiko. ¹⁶ Nu babulagha mindiko nu makoyi manene:Mutubhukile,nu mutubise mu miso ma ghoso wikalile mu kishumbi cha bukota,nu mu miso ma mushibu wa Chana cha Mbuli; ¹⁷ Kubuno busi bunene bwa mushibu waghe bwika,nayi unakosha kulindila?