¹ Tilila mughenshi wa Kanisa ka Saladi: Lola bukutenda ghoso wite myusa mutubakamo sa Ghongo nu tumbalumbalu mutubakamo:nkumana mikolo sobe.Nkumana buno windemba ucheli gho,nu kashi wakwile kalayi. ² Walolagha busogha,nu kokomesha byashighala bili bwighi na kukwa;kubuno nshasangile mikolo sobe nsogha kweli Ghongo. ³ Kengela lino buni buweleshibwagha nu bi wongwagha ko,katilila nu insungule.Ndi ntwalola busogha nkika anga mwimbi,nu ntukamana nkungu sinkika kobe. ⁴ Tondo wite bamoyi ku Saladi bantu bamoyi batabighishe nshulu sabo;bakatabanga ghamoyi nine na nshulu senga ,batunganana ku sishwala. ⁵ Olya ukakindagha akashwalishwa nshulu senga;Nshikashimya ishina lyaghe mu kitabo cha kalamo,nu nkatata ishina lyaghe mu miso ma Tata nu ma baghensi baghe. ⁶ Olya wite matuyi ongwe bikubulwa Tunisa na Muusa. ⁷ Tilila mughenshi wa Kanisa ka Filadelefia :Lola bukutenda wasanana ,wa bulili ,olya wite batoto ba Daudi,olya ukwighula,nu muntu nta k'ighala,olya ukwighala nu muntu nta k'ighula; ⁸ Nkumana mikolo sobe ,lola ,buno wite maghala makeke,nu walangile kitondo chani,nu ntwananile ishina lyani,nabikile ghabusho ghobe lumbi lw'ighulwa,nu takuli unakosha ku lwighala. ⁹ Lola,nakwelesha bamoyi ku babo ba Sinakoki sa Kahinga bakwimana Bayuda ,nu tabeli bo,tondo bakweka bwisa ;Lola nkabamana,bakumbamile ku mashinshi mobe,nu bamane buno nakushimagha. ¹⁰ Kubuno walangile kitondo cha kundindila bwingi,nkakukunga nwine mu nkungu sa kulingikwa si kashwa mu kisi kinsayi,buno silingike beli mu kisi. ¹¹ Nkushwa mu bindi bikeke.Katilila ki wite,buno muntu ntakunaghe nkumbu sobe. ¹² Olya ukakindagha ,nkamubika iyango mu numba sa Tata Ghongo, nu ntakatuka mo lingo;nkatila ku we ishina lya Ghongo wani,nu ishina lya musumba wa Ghongo wani,lyengo Yelusalemu ukutuka kw'ighulu kweli Ghongo wani,nu lingo ishina lyani. ¹³ Ulya wite matuyi ongwe bikubulwa Tunisa na Muusa ! ¹⁴ Tilila mughenshi wa Kanisa ka Laodekia:Lola bukutenda Amina,Muteneneki wa bulili,Ndingililo sa binsai bya bumbwagha na Ghongo. ¹⁵ Nkumana mikolo sobe,nkumana buno ntu kwasa ali kushika. Unabinde u kwasa ali ukushika! ¹⁶ Kubo,buweli wa kibembele,nu ntu kwasa ali kushika,nkakusala . ¹⁷ Kubuno wimbula:Nili mutumba, nighumishe,nu nshite nkasa sa kena,nu buno ntukumana bu weli mu musambo,twite kena, mukene,kiku,nu mundulu, ¹⁸ nakwema ughule ku neli,nolo satinga mu kaya,buno inga waghuma, nu nshulu senga,buno ushwale, nu nsoni sa mundulu wobe simonekaghe ko,nu muti wa miso, buno ulole . ¹⁹ Ine ,nkusughila nu kusungula babo bansai banashima,winkatilishe busogha nu w'insungule. ²⁰ Lola,nimala gha kitiko,nu nkushumya lumbi,ndi muntu ongwa ishuki lyani nu kw'ighula lumbi,nkingila mwaghe,kalya indya li gholigholo ghamoyi nawe,nuwe ghamoyi nine. ²¹ Olya ukakindagha,akikala ghamoyi nine gha kishumbi chani cha bukota,anga nine bunakindagha ,nu kwikala ghamoyi na Tata,ku kishumbi chaghe cha bukota . ²² Olya wite matuyi ongwe bikubulwa Tunisa na Muusa .