¹ Tilila mughenshi wa Kanisa ka Efeso:Lola bukutenda ghoso wakatilinde tumbalumbalu mutubakamo mu kuboko kwaghe kw'indume ,olya ukutabanga munkatighi na byanikilo mutubakamo bya nolo; ² nkumana mikolo sobe,mulimo,nu kulindila kobe kwingi.Nkumana buno ntunakosha kwikala na bantu babi;nu walingikagha babo bakwimana ntumwa,nu tabo ,nu wabakungulile beli beki ba bwisa; ³ Buno ukulindila bwingi,buno wanubagha kubushi bw'ishina lyani nu ntwakutilwe. ⁴ Tondo ki nasomba ku weli,buno washighile lutundo lobe lutangi. ⁵ Kengela lino gha wawinde mu bwaghi, insungule nu kulukila mikolo sobe ntangi; ndi tobo,nkashwa kuweli,nu nkatucha chanikilo chobe gha kikala, ndi ntwisungula. ⁶ Wite kino,buno wasomba mikolo sa Banikolayi,mikolo sinasomba ninengo. ⁷ Olya wite matuyi ma kongwa ongwe bikubulwa Tunisa na Muusa: Olya ukakindagha nkamwelesha alye ku muti wa kalamo,weli mu Paladiso sa Ghongo. ⁸ Tilila mughenshi wa Kanisa ka Silimuna:Lola bukutenda mutangi nu mushinda,olya wakwagha nu watukile ku bakuyi; ⁹ nkumana munubo nu bukene bobe (kilo unaba mutumba),nu ukushingilwa bitondo na babo bakwimbula Bayuda nu tabeli bo,tondo u beli sinakoki sa Kahinga. ¹⁰ Ntukwe boba buno wanube.Lola,Musumbu akalekela bamoyi ku benywe mu kahombo, kubuno mulingikwe,nu mukayungwa bindi ikumi.Ikalagha wa bulili kwikila lukwo, nu nkakwelesha nkumbu sa kalamo. ¹¹ Olya wite matuyi ongwe bikubulwa Tunisa na Muusa :Olya ukakindagha ntakakwa lya ngendo imbili. ¹² Tilila mughenshi wa Kanisa ka Pelegamo:Lola bukutenda ghoso wite mbotela sa songoka ukutwa bibe bibili: ¹³ Nkumana kishiki chobe ,nkumana buno agho u gha kishumbi cha bukota bwa Kahinga.Ukumana busogha ishina lyani,nu twashighile lukatisho ku neli,aba mu bindi bya Antipa,muteneneki wani wa bulili witwagha kwinu,agho u gheli kishiki cha Kahinga. ¹⁴ Tondo nite kitondo kimoyi ku weli,buno wite uko bantu binkatilisha ku meghisha ma Balama aluthagha Balaka abike ikoyi lya kukitasha bana ba Isilaeli,buno balye nama sa kwela nu binshighilile mu matensha. ¹⁵ Nubo ,uwe nuwe ,wite bantu binkatilisha nubo ku meghisha ma Banikolai. ¹⁶ Insungule lino,ndi tobo nshindishe kushwa ku weli,nu nkalwana nabo na mbotela sa kanywa kani. ¹⁷ Olya wite matuyi ongwe bikubulwa Tunisa na Muusa :Olya ukakinda nkamwelesha mana mabisilwe, nu nkamwelesha ikoyi lyenga,nu ghantata nelw'ikoyi ghatilwa l'ingw'ishina ,litakumanwa na muntu wampa,ndi ta ghoso weleshibwa lyo. ¹⁸ Tilila mughenshi wa Kanisa ka Tuyatula:Lola bukutenda Mwana wa Ghongo,olya wite miso anga lwembe lwa kaya,nu manshinshi masusa anga nsubi sa tuka mu kaya; ¹⁹ nkumana mikolo sobe;lutundo lobe,lukatisho lobe,mulimo whobe wa bulili,kulindila kobe kwingi,nu mikolo sobe nshinda seli ningi kutinga elya ntangi. ²⁰ Tondo nite kitondo ku weli,buno washighilila mukashi Yesebeli,u kwimana mulenganya,u kweghesha nu kwabucha bakiti bani,buno binshighilile mu matensha nu kulya nama sa kutulwa. ²¹ Namweleshishe nkungu,buno insungule,nu ntakushima kushigha matensha maghe. ²² Lola,namulekele gha mughu,nu kusinga munubo munene ku babo bakutensha nawe,ndi ta bashigha bitondo byabo bibi. ²³ Nashiche bana baghe;nu Tunisa tunsai tukamana buno ine nkumanilila busogha milenganya nu nkasa sa muntu,nu nkaligha muntu kuyangana na mikolo saghe. ²⁴ Ku benywe ,ku bango bansayi beli ku Tiyatila,ba bakunana mamo meghisha,nu tabamanile myanya mbi sa Kahinga, anga bu bakusimana,nababula: Nshikubecha ungo mushigho; ²⁵ tondo bimwite mwabikatililagha kwikila nishwe. ²⁶ Olya ukakindagha nu ukakatilila mikolo sani ,nkamwelesha bukulu mu bilongo. ²⁷ Akabalanga na mushumbo wa chuma anga bukwatwagha malegha,anga buneleshibwagha bukulu na Tata. ²⁸ Nu nkamwelesha kambalumbalu ka nindunindu. ²⁹ Olya wite matuyi ,ongwe bikubulwa Tunisa na Muusa!