¹ Na nalolagha lingo ighulu nu kingo kisi ,buno ighulu litangi nu kisi kitangi byabagha byatinga kalai,nu kitatenge tachabinde lingo gho. ² Nalolagha lingo kwatuka kw'ighulu kweli Ghongo,musumba wasanana, u ungo Yelusalema witonda anga namughole kubushi bwa munachaghe. ³ Nu nongwagha mu kishumbi cha bukota mwatuka ishuki linene likutenda: Lola kishiki cha Ghongo ghamoyi na bantu !Akikala ghamoyi nabo nu bakaba bantu baghe,nu Ghongo w'inene akikala ghamoyi nabo. ⁴ Akabatucha bitengetenge mu miso mabo,nu lukwo talukaba agho lingo, nw'indilo talikabagha gho lingo,ali kulakalaka,ali lubabasho ,kubuno bitondo binsai byatinga. ⁵ Nu olya wabagha ikalile mu kishumbi cha bukota atendagha :Lola ,naghalula bitondo binsai bya kalai,nu ingatenda: Tila;kubuno bino bitondo byeli gho nu bya bulili. ⁶ Nu ing'ambula:Bwashila ubo!Ine u Alufa nu Omega,ndingilo nu kushinda.Olya wite mpusha nkamwelesha masi ma kalamo bulyabulya. ⁷ Olya ukakinda akaba na mwandu mu bino bitondo; Nkaba Ghongo waghe,nuwe akaba mwana wani. ⁸ Tondo babo bite boba,batakatisha,babo babi,bitani,balimbya,baghanga,bakwela basumbu, nu beki ba bwisa bansayi kibhu chabo cheli mw'ishiba linene lya kaya nu buusa, u lukwo lwa ngendo imbili. ⁹ Nu Lingo umoyi kwabo baghenshi mutubakamo ba babagha bite twaata mutubakamo twisala na biswabo mutubakamo bishinda,ikagha nu kumbula mu kutenda:Shwa,nkakulosha mughole u mukashi wa Chana cha mbuli. ¹⁰ Nu anekagha mu muusa,nu anichagha gha ntata gha mwindiko munene nu watoghama.Nu andoshagha musumba wa sanana,Yelusalema, u kutuka kw'ighulu kweli Ghongo ,ite lukumbu lwa Ghongo . ¹¹ Kusana kwaghe kwabagha kwa susana n'ikoyi linaghulwa bikulo bingi,ikoyi lya yasipi lyenga anga kiyobo. ¹² Wabagha na mukolo munene nu mulai.Wabagha na numbi ikumi n'imbili,nu nwiso numbi,Baghenshi ikumi na babili,nu mashina matilwa ma babo bilongo ikumi nu bibili bya bana ba Isilaeli; ¹³ Ku kutukilagha musi,numbi esatu,ku ntata numbi esatu, mu munkatighi na musi numbi esatu,nu ku kuyamilagha musi,numbi esatu. ¹⁴ Mukolo wa musumba wabagha na mango ikumi na mabili,nu ku mo mashina ma ntumwa sa Chana cha mbuli. ¹⁵ Olya watendagha nine,abagha na kamilali ka nolo ka kulingika,buno alingike musumba ,mumbi saghe nu mukolo waghe. ¹⁶ Musumba wabagha na bisusu binayi bya lingimana,lulenge nu kisusu byabagha byalingimana.Alingikagha musumba na kamilali,ikasanga masomolelo elefu ikumi na mabili;lulenge,kisusu , bulayi bwa kuntata byabaghe bigheshe. ¹⁷ Alingimanyagha mukolo,ingasanga maboko ighana nu makumi manayi nu manayi,bukulingikagha muntu,u bwabagha nubo bwa mughenshi. ¹⁸ Mukolo wabagha wobakwagha na yasipi,nu musumba na nolo sa sughukalilwa sasusana na kiyobo chenga. ¹⁹ Mango ma mukolo wa musumba mabagha matondwa na makoyi ma bikulo bingi matasusana: Iyango litangi lyabagha lya yasipi,lya limbili lyabagha lya safilo,lisatu kaledoni,linayi emelodi. ²⁰ l'itano salodoniki,lya mutuba salodoni,lya mutubakamo kilisoliti,lya munani belile,lya mwenda topaso,likumi kilisopase,l'ikumi na limoi iyakinte,l'ikumi n'imbili amitishite. ²¹ Numbi ikumi n'imbili sabagha tutungwa ikumi nu tubili; na lumbi lumoyi lwabagha lwa katungwa kamoyi.Mulungu wa musumba wabagha wa nolo sa sughulwa,anga kiyobo cha kwindola mo. ²² Nshalolile ku numba sa kukumbamila mu musumba;kubuno Mukota Ghongo Nene maghala u numba sa kukumbamila,nu Chana cha mbuli nucho. ²³ Musumba ta wite nkasa sa musi ali mweshi bya kuusanya;buno lukumbu lwa Ghongo u luku usanya,nu Chana cha mbuli u kasuku kaghe. ²⁴ Bilongo bikatabanga mu chengeshi chaghe ,nu bami ba kisi bakicha mo nkumbu sabo. ²⁵ Numbi samo tasik'ighalwa lingo mu musi,kubuno takukaba kindi lingo. ²⁶ Bakicha mo lukumbu nu lwanso lwa bilongo. ²⁷ Takuk'ingila kwaghe ,kinsayi chabigha ,ali muntu mubi ali mweki wa bwisa;muk'ingila tughu babo batilwa mu kitabo cha kalamo Chana cha mbuli.