¹ Lingo namonagha mughenshi watuka kw'ighulu,wabagha wite batoto ba mushinga munene nu munyololo munene mu kuboko kwaghe. ² Akatagha na kuboko Bulighi bunene ,Bulighi bwa kalayi,u Musumbu nu Kahinga,abukandagha myaka elefu . ³ Abulekelagha mu mushinga, ighalagha nu kwinda kamanililo gha mwingilo ghantata nawe,buno ntabuche lingo bilongo,kwikila myaka elefu emoyi si kuke.Kumbusa kwagho,bwatunganana akandulwe bindi bikeke. ⁴ Nu namonagha bishumbi bya bukota;nu babo babagha bikalile kubyo beleshibwagha bwangato bwa kwaghya.Nu nalolagha ku mitima sa babo baketulwagha kubushi bwa kutenenekela Yesu,nu kubushi bwa kitondo cha Ghongo,nu sa babo bata kukumbamilagha Nama ali chaso chaghe,nu bat'indwagha kama ku malanga mabo nu ku maboko mabo.Batukagha ku bakuyi,nu kwema ghamoyi na Kilishitu myaka elefu emoyi. ⁵ Bango bakuyi tabatukile ko ,mu kulindila myaka elefu emoyi sikuke.U kutuka ku bakuyi lya litangi ilyo. ⁶ Bakasanilwa nu basanana babo bite kibhu mu kutuka ku bakuyi lya litangi!Lukwo lwa ngendo imbili taluna bwangato kubo;tondo bakaba Ba nsakogha ba Ghongo nu ba Kilishitu,nu bakema ghamoyi nawe myaka elefu emoyi. ⁷ Gha katinga eso myaka elefu emoi,Kahinga akatuchwa mu kahombo kaghe. ⁸ Nu akatuchwa buno ashimishe bilongo byeli bibe binai bya kisi,Gogi nu Magogi, buno abakulumanye mu kulwana;mughanso wabo weli anga museghe wa kitatenge. ⁹ Nu bo ba bakamagha mu kisi,nu ku timba mwelo wa basanana nu musumba washimwa.Tondo kaya katukagha kw'ighulu nu kubashililisha. ¹⁰ Nu Musumbu,wabashimishagha,alekelwagha mw'ishiba linene lya kaya nu buusa,mweli Nama nu Mulenganya wa bwisa.Nu bakanuba musi nu kindi nkiko nu nkiko. ¹¹ Nu nalolagha lingo ku kishumbi kinene cha bukota chenga,nu olya wabagha ikalile gha ntata nacho.Kisi nw' ighulu byendagha kulayi na miso maghe,nu takwabinde lingo kishiki chabo. ¹² Nu nalolagha ku bakwile ,bakulu nu bana ,bikalile bwighi na kishumbi cha bukota.Bitabo byakandulwagha.Nu kingo kitabo cha kandulwagha,kicho cheli cha kalamo.Nu bakuyi baghibwagha kuyangana na mikolo sabo,kulembana na byatilwa mu bibyo bitabo. ¹³ Kitatenge cha kuluchagha bakuyi bakwilagha mo,lukwo nu kishiki cha bakuyi bakuluchagha bakuyi ba babagha ku beli;n'omoyi kubo aghibwagha kuyangana na mikolo saghe. ¹⁴ Nu lukwo nu kishiki cha bakuyi byalekelwagha mw'ishiba linene lya kaya.U lukwo lwa ngendo imbili,ishiba lya kaya. ¹⁵ Olya ishina lyaghe lyasangilwe talyatilwa mu kitabo cha kalamo,nti alekelwa mw'ishiba linene lya kaya.