1
Kumbusa kwagho,nongwagha mw'ighulu ishuki linene lya kikembe kinene likutenda: Aleluya!Lonio,lukumbu nu bwangato byeli kwa Ghongo witu,
2
kubuno kwaghya kwaghe kweli kwa bulili nu kwa lingimana;kubushi aghyishe luwawa munene wa abuchagha kisi na matensha maghe,nu alighishe mikilha sa bakiti baghe mu kusisegha na kuboko kwaghe.
3
Nu batendagha lya ngendo imbili:Aleluya!Nu muuki waghe wabakama nkiko nu nkiko.
4
Nu abo bakungu makumi mabili na banayi nu bibumbwa binayi byeli gho bya komagha mashwe nu kukumbamila Ghongo wikalile mu kishumbi cha bukota,mu kutenda:Amina!Aleluya!
5
Nu ishuki lyatukagha mu kishumbi cha bukota,kutenda:Mwanse Ghongo witu,benywe bansayi bakiti baghe,benywe ba kumukwa boba, bana bato nu bakulu!
6
Nu nongwagha anga ishuki linene lya kikembe kinene ,anga ku kubila masi mengi,nu anga ishuki mikulumilo inene, kutenda:Aleluya!Kubuno,Mukota Ghongo witu Nene maghala ema mu bukota bwaghe.
7
Tubogheboghe nu tube mu chelele,nu tumweleshe lukumbu; kubuno bisaghulo b'isonga bya Chana cha mbuli bya shwa,nu mughole waghe ilongomanya.
8
nu abulilwe ashwale sa bota ,ngelingeli nu salangala.Kubuno nshulu sa bota,u mikolo sa bulili sa basanana.
9
Nu mughenshi ing'ambula:'Tila:Bakasanilwa babo bamanwa mu kisaghulo k'isonga cha Chana cha mbuli!Nu ing'ambula:Ibyo bitondo bya Ghongo byeli bya bulili.
10
Nu naghwagha ku manshinshi maghe buno ni mukumbamile;tondo ing'ambula:Ntukite ubo!Neli muninu wa mulimo,nu wa bisakwinu bakutenenekela Yesu.Kumbamila Ghongo.Kubuno buteneneki bwa Yesu u muusa wa bulenganya.
11
Nu namonagha ighulu ly'ighuka,nu lola,kwa pamuka mpunda senga.Olya wabagha gha ntata naso akumanwa BULILI nu WATUNGANANA,nu akwaghya nu kulwana mu bulili.
12
Miso maghe mabagha anga lwembe lwa kaya;kw'itwe lyaghe kwabagha nkumbu ningi;nu abagha n'ishina lyatilwa ,litakumanwa na muntu,ndi ta winene u mpanga;
13
nu ashwalagha nshulu site matondo ma mikilha.Ishina lyaghe u KITONDO cha Ghongo.
14
Ndwani seli mw'ighulu sa muyangagha na mpunda senga sa shwalile nshulu sa bota,senga,nu salangala.
15
Mu kanywa kaghe mwatukagha mwele wasongoka,buno wite bilongo;akabalanga mushumbo wa chuma; nu akananta indegha lya maku ma mushibu munene wa Ghongo Nene maghala .
16
Ku nshulu saghe nu mu kibelo chaghe kwabagha ishina lyatilwa :Mwami wa bami nu Mukota wa bakota.
17
Nu namonagha ku mughenshi wikalile mu musi.Nu atendagha n'ishuki linene,kubula tusoni tunsayi twabagha tukulengagha mw'ighulu:Mushwe,mukulumane ku kisaghulo kinene cha Ghongo,
18
buno mulye nama sa bami,nama sa bakulu ba basula,nama sa bite bwangato,nama sa mpunda nu sa ba beli ghantata naso,nama sa bansayi ,bashighililwa nu bakobe, bana nu bakulu.
19
Nu namonagha ku nama,nu bami ba kisi,nu ndwani sabo bakulumana buno balwane bita na ghoso wikalile ghantata gha mpunda nu ndwani saghe.
20
Nu Nama sakatwagha,ghamoi naso,Mulenganya wa bwisa,wakitagha bitangalo gha gheli,bya bya buchagha babo babagha na kama ka Nama nu bakumbamilagha chaso chaghe.Balekelwagha bo babili bansayi mw'ishiba linene lya kaya nu buusa.
21
Nu bango bitwagha na mwele ukutuka mu kanywa ka olya wabagha ikalile ghantata na mpunda; nu tusoni tunsayi twikutagha na nama sabo.