¹ Kumbusa kwagho,nalolagha ungo mughenshi atuka kw'ighulu,wabagha na bukulu bunene ;nu kisi chasanagha na lukumbu lwaghe. ² Alekelagha mulenge munene,mu kutenda: Asambulwa,asambulwa,Babiloni munene!Ombulyagha na Basumbu,mbiso sa myuusa insayi mbi,mbiso sa tusoni tunsayi tubi nu twa nsoni. ³ Kubuno bisi binsayi banywile maku ma mantensha maghe ,nu atenshishe na bami ba kisi,nu batimbuli ba kisi baghumile kutingila butumba bwaghe. ⁴ Nu nongwagha mw'ighulu lingw'ishuki likutenda:Mutuke mu nkatighi nawe ,bantu bani,kubuno munashwa kusangila bwaghi bwaghe,nu tamughanswe nawe ku biswabo byaghe. ⁵ Kubuno bwaghi bwaghe bwika bwingi kw'ighulu,nu Ghongo akengela mabi maghe. ⁶ Mumulighe anga bwalighagha,nu mumukulukishe ngendo imbili kuyangana na mikolo saghe.Mu kaata ka kubhulilagha mo ,u mumukubhulile mo ngendo imbili. ⁷ Anga bwitagha nu kulosha butumba bwaghe,ubu mumutinjaghe mu nsusu nu indilo.Kubuno ekw'itendya mu mutima: nikala anga munamughole,nsheli musumbakashi,nu nshikalila ! ⁸ Kubushi bubo ,nu mukindi kimoyi, biswabo byaghe bikika, lukwo,indilo,nu nsala,nu akashilikila mu kaya.Buno ite maghana, Mukota Ghongo u wamwaghyagha. ⁹ Nu bami bansayi ba kisi batenshagha nawe nu butumba ,bakalila nu kwighanisha kubushi bwaghe,gha bakamona ku muuki wa kuya kwaghe. ¹⁰ Mu kwikala bulayi,ku boba bwa nsusu saghe,bakatenda: Musambo!musambo! Musumba munene Babilone ,musumba wite maghala mengi!Waghibwa mu nkungu emoi! ¹¹ Nu bakutimbula balila nu beli mw'indilo kubushi bwaghe,kubuno taku wampa u kughula mishigho sabo, ¹² mishigho sa nolo,sa bikulo,sa makoyi makukwa bikulo bingi,nu tutungwa,nshulu sa tambatamba, lopo,sa myosa sa nama,site matondo ma mikilha ,sa miti ,sa bikayi bya milamba,nu bikayi bya miti s'ikughulwa bubibu,sa nsubi,sa byuma nu mitalo. ¹³ sa mwambo,sa ngenge, sa bwagha,nu sa maku,sa makiti,sa nshano,sa ngano,sa nkambu,sa mbuli,sa mpunda,sa kamiyo,sa mibili nu mitima sa bantu. ¹⁴ Bya byashimagha mutima wobe byendile bulayi nowe,nu bintu binsayi bisogha nu bya mbangilwa,byashimila ,ntukabimona lingo. ¹⁵ Babakutimbula ibyo bikayi,u ba baghuminde mu we,bakikala kulayi,mu kukwa boba bwa munubo ;bakalila nu bakaba mw'indilo, ¹⁶ nu bakatenda:Musambo!Musambo!Musumba munene washwalagha nshulu sa bota,nopo,nu ngelingeli, nu byatondwa nolo,na makoi ma kughulwa bikulo bingi,nu tutungwa! Mu nkungu emoi butumba bwashililila! ¹⁷ Nu bekwenshagha anviyo bansayi, nu bansayi bakoghagha mu kwenda uko,nu binami,nu bansayi bakulondela bikulo mu kitatenge,bikalile bulayi, ¹⁸ nu bakughagha, mu kulola ku muuki wa kuya kobe:Musumba ki u wasusanagha na musumba munene ? ¹⁹ Bindekelagha mukungu ku matwe mabo, balilagha nu babagha mw'indilo,bakughagha nu batendagha :Musambo,!Musambo! Musumba munene ,u mu baghumilagha kutingila ighuma lyaghe,babo bansayi babagha na bwato mu kitatenge,mu nkungu emoyi ashililila! ²⁰ Ighulu,boghabogha kubushi bwaghe!Nu benywe basanana,ntumwa,nu balenganya, nu benywe mubogheboghe !Kubuno Ghongo abakalila lubansa mu kumwaghya. ²¹ Agho lino, mughensi wite maghala atolagha ikoyi lyasusana luyikililo lunene,nu kulilekela mu kitatenge,mu kutenda:Ubo bukalekelwa na mushibu munene Babiloni ,musumba munene,nu ta ukamoneka ko lingo. ²² Nu kobe ntakukongibwa ko mushumo wa baghombi ba kansambi,ba bembi,baghombi ba kapyelele,bakwipila mu tolompeta, kobe,takukasangwa mulenga, wa kukita nkashi,takukongwibwa ko lingo lwayo lwa luyikililo, ²³ kobe tala tasikabanga lingo,nu ishuki lya mulume nu lya mughole waghe talikongwiba ko lingo,kubuno ba bakutimbula kobe babagha bakulu ba kisi,kubushi bilongo binsayi byashiminde na buhanga bobe, ²⁴ nu kubuno kwaghe kwasangwagha mikilha sa balenganya nu sa basanana,nu sa babo bansayi baketulwagha mu kisi.