¹ Nu andoshagha lusi lunene lwa masi ma kalamo lwenga anga kiyobo, lukutuka mu kishumbi cha bukota bwa Ghongo nu Cha chana cha Mbuli. ² Munkatighi na mulungu wa musumba nu ku mitili imbili sa lusi lunene,kwabagha muti wa kalamo,ukukonamya bighuma ngendo ikumi n'imbili,sikutucha bighuma mu mweshi ,nu nsamba saghe sabagha busakishi bwa kulamya bilongo. ³ Takukaba lingo kushulilwa.Kishumbi cha bukota bwa Ghongo nu cha Chana cha mbuli kikaba mu musumba;bakiti baghe bamukitila milimo nu bakamumona ko bweli, ⁴ Nu ishina lyaghe likaba ku malanga mabo. ⁵ Takukaba bulimaswa ;nu tabakaba na nkasa sa tala ali chengeshi,kubuno Mukota Ghongo akabasanya,nu bakema nkiko nu nkiko. ⁶ Nu ambulagha :Bino bitondo byeli gho nu bya bulili;nu Mukota,Ghongo wa miusa sa Balenganya,asingagha mughenshi waghe buno aloshe bakiti baghe bitondo byemana kushwa mu bindi bikeke._ ⁷ Nu lola,nashwa mu bindi bikeke._Akasanilwa ghoso walanga bitondo bya bulenganya bya kino kitabo! ⁸ Ine Yoani,nongwagha nu nalola ku bino bitondo.Nu gha nongwagha nu kulola,nawagha ku manshinshi ma mughenshi wandoshagha byo buno nimukumbamile. ⁹ Tondo ing'ambula:Ntukite bo!Nili muninu wa mulimo,nu wabisakwinu balenganya,nu wa babo bakulanga bitondo bya kino kitabo.Kumbamila Ghongo. ¹⁰ Nu ing'ambula:Ntubike kamanililo lingo mu bitondo bya bulenganya bwa kino kitabo.Buno bindi bise bwighibwighi. ¹¹ Olya wabigha imbiye lingo;nu wabulili akite lingo byeli bya bulili,nu wasanana isananie lingo. ¹² Lola,nashwa mu bindi bikeke ,nu nite indigho lyani,buno nilighe na muntu na kuyangana na mikolo saghe. ¹³ Ine Alufa nu Omega, mutangi nu mushinda,ndingililo nu kushinda. ¹⁴ Bakasanilwa babo bakusugha nopo sabo buno babe na kibhu ku muti wa kalamo,nu kwingila ku mw'ingilo wa musumba ! ¹⁵ Kumbugha kwashighala ,mbwa,bahanga,balimbya ,biti ba bantu,bakwela basumbu,nu olya washima nu kweka bwisa! ¹⁶ Ine,Yesu nasingile mughenshi wani buno ababule bino bitondo mu Tunisa.Ine u kishina nu kibuti cha Daudi,kambalumbalu ka munindunindu. ¹⁷ Nu Muusa nu Munamughole bakutenda:Shwa.Nu olya wongwa atenda:Shwa.Nu olye wite mpusha ashwe;nu olya washima ,atole masi ma kalamo ,bulyabulya. ¹⁸ Natonda k 'olya wongwa bitondo bya bulenganya bya kino kitabo :Ndi muntu atalikila kingo kitondo,Ghongo akamupunda na biswabo byatilwa mu kino kitabo; ¹⁹ nu ndi muntu akokola ku bitondo bya kitabo cha buno bulenganya,Ghongo akakokola kibhu chaghe cha muti wa kalamo nu cha musumba wasanana byatilwa mu kino kitabo. ²⁰ Olya watila bino bitondo atenda:Naki,nashwa mu bindi bikeke. Amina!Shwa ,Mukota Yesu! ²¹ Mpang'inene sa Mukota Yesu sibe ghamoi na benywe bansayi!