¹ Bwikagha ,busi bwa sabato bukumanwa bwimbili busoki,Yesu atingagha mu maswa ma ngano.Begheshibwa baghe babagha bakutomola mito sa ngano kusibunga mu maboko nu kulya. ² Bafalisayo bamoyi bababulagha :Buni bumwakita bitimilwa kukitwa busi bwa sabato? ³ Yesu abakulagha :Tamwasomile byakitagha Daudi, ghongwagha nsala,we nu babo babagha nawe, ⁴ anga bwingilagha mu numba sa Ghongo,atolagha tumpapa twa kukasanila, alyagha to ,nu kwelesha babagha nawe, nu bimilwa kulibwa na bisankogha bo binene ? ⁵ Nu ababulagha : Mwana wa muntu u Mukota wa sabato. ⁶ Bwikagha,bungo busi bwa sabato,Yesu ingilagha mu sinakoki,nu kweghesha.Kwabagha mulume umoi wite kuboko k'ohuma. ⁷ Batili nu Bafalisayo bengeleshagha Yesu,buno balole ndi analamya busi bwa sabato; bamane ku mutalikila. ⁸ Tondo amanagha milenganya sabo,nu abulagha ghoso mulume wa kuboko k'ohuma : Imaluka,nu imala mu kantighi .Imalukagha ,nu kwimala. ⁹ Nu Yesu 'ababulagha : Nababusha ndi bwatunganana,busi bwa sabato,kukita busogha ali bubi,konia muntu ali ku mwita. ¹⁰ Agho mu kutimbya miso maghe ku bansayi,abulagha ghoso mulume : Lambya kuboko kobe. Abukitagha,nu kuboko kwaghe kwalamagha . ¹¹ Bashibukagha ,nu kukulumana buno balole ki bakitile Yesu. ¹² Mwebyo bindi Yesu abakamagha mwinduko ende kusegha,nu atinjagha kindi kinsayi mu kusegha Ghongo. ¹³ Mu kucha kwa busi,amanagha begheshibwa baghe , nu kusombola ikumi nu babili ,beleshagha ishina lya ntumwa: ¹⁴ Simoni amumanile buno Petelo;Andele mubuto waghe;Yakobo;Filipo;Matoloma; ¹⁵ Matayo;Toma;Yakobo musikila wa Lufayo;Simoni wamanaghwa Selote; ¹⁶ Yuda,musikila wa Yakobo;nu Yuda Ishikaloti,olya ukamwitya. ¹⁷ Akumbagha ghamoi nabo,nu imalagha gha chumbo cha mwinduko, ghabagha kikembe kinene cha begheshibwa baghe,nu kikembe cha bantu ba Yudea insayi,ba Yelusalema,nu ba mitili sa Tilo nu Sidona . Bashwagha kumwongwilila nu kulama nsambo sabo. ¹⁸ Babo babagha batetembwa na basumbu,balamagha. ¹⁹ Nu kikembe kinsayi cha londagha kw'itubya kuwe,kubuno maghala mendagha matuka muwe nu u malamyagha bansayi. ²⁰ Agho Yesu,imaluchagha miso ku begheshibwa baghe,nu kutenda : Mukasanilwe benywe bakene,kubuno bukota bwa Ghongo buli bwinu! ²¹ Mukasanilwe benywe bite nsala,kubuno mukikuta ! Mukasanilwe benywe be kulila,kubuno mukaba mu mboghimboghi. ²² Mukasanilwe gha mukasombwa na bantu,gha mukatibitwa,gha mukatukwa,nu kwenegha ishina linu, kubushi bwa Mwana wa muntu ! ²³ Mwebyo bindi, mubogheboghe,nu kusaghaluka,kubuno indigho linu likaba linene mw'ighulu; Ubo u bwakitilwagha balenganya na b'ise babo. ²⁴ Tondo,musambo kwinu benywe batumba,kubuno mwite bubobelelo bwinu! ²⁵ Musambo kwinu benywe bikutile,kubuno mukakwa nsala!Musambo kwinu benywe bekuseka eno mpina,kubuno mwabe mw'indilo nu bisoshi. ²⁶ Musambo kwinu benywe mukutatwa na bantu,kubuno b'ise babo ubu bakitilagha balenganya babi . ²⁷ Tondo nkubabula,benywe bakunongwilila : Mushime baghini binu,mukitile bisogha babo babasomba, ²⁸ mukasanile babo bekubashulila,museghele babo bekubanubya. ²⁹ Ndi muntu akulangula lubighi kw'i tama,mughalulile lya lingo.Ndi muntu akunagha kankamba kobe, ntumunanile lopo. ³⁰ Elesha olya wakusegha,nu ntu bushe byobe ku olya wiyaangika nabyo. ³¹ Bi mwashima bantu babakitile,mwabakitilagha nubo ubo. ³² Ndi mwashima babo bekubashima,ki kisogha ki munamona?Bisa bwaghi nubo bekushima babo ba bashima. ³³ Ndi mwakitila busogha babo bakubakitila busogha,ki kisogha ki munamona?Bisa bwaghi nubo bakukita ubo. ³⁴ Nu ndi mwasombya babo bana bakulukisha,ki kisogha kimunamona?Bisa bwaghi nubo baku sombya bisabwaghi,buno babe na lukaso anga lulo. ³⁵ Tondo mushime baghini binu,mukite bisogha,nu musombye nu tamulelamile kena.Nu lukaso lwinu lukaba lunene,nu mukaba bana ba Olya wa kw'ighulu,kubuno eli musogha ku babo bata kushimagha nu ku babibu. ³⁶ Mube na lukogho,anga So winu eli wa lukogho . ³⁷ Tamughaye muntu wampa,munashwa kughayibwa nu benywe;tamukinde wampa, munashwa kukindwa;mushighilile,nu bakabashighilila. ³⁸ Mwesane ,nu muk'eleshibwa;bakaba kubulila ku bukubha isegha lya kokomela,lya tengeshibwa nu kw'isalilana;kubuno mukeleshibwa kibhu kigheshe na ki mwesanagha. ³⁹ Ababulagha mashumo seno:Kiku kin'ensha kingo kiku?Taba kakolokela bo babili mu mushinga? ⁴⁰ Mwegheshibwa nta ghimba mweghesha;tondo mwegheshibwa unsayi wa bulili akaba anga mweghesha waghe. ⁴¹ Buni buwamona kisughu cheli mu liso lya muninu, nu ntukumona ku kiti kili mu lyobe? ⁴² Ali buni bu unabula muninu:Munitu,shigha nituche kisughu cheli mu liso lyobe,nuwe ntukumona kiti cheli mu lyobe?Mwengelele,tucha tanga kiti cheli mu liso lyobe inga wamana kutucha kisughu cheli muliso lya muninu . ⁴³ Ta muti musogha u ukukonamyagha kighuma kibi,ali ta muti mubi u kukonamyagha kighuma kisogha. ⁴⁴ Kubuno,muti ukumanililwa ku kighuma chaghe.Taba kukolagha bighuma bya mutini ku mikele,nu ta bakukanagha misabibu ku mikele. ⁴⁵ Muntu musogha akutuchagha bintu byakoma mu mutima waghe,nu mubi akutuchagha mabi mu mutima waghe; Kubuno ku bingi byeli mu mutima u bikutendagha wa kanywa. ⁴⁶ Buni bu munikumana Mukota,Mukota!nu ta mukukita bi nkubabula ? ⁴⁷ Nabaloshe muntu wasusana n'olya washwa ku neli,akwongwilila bitondo byani,nu kubikita. ⁴⁸ Asusana na muntu umoyi,mu kwobaka numba,atima bubibu ,nu kukom' iyango mw'ikoi .Mw'isalo washwile ,nu kiswa kisundile ku numba, tachasendulile ,kubuno sobakilwe busogha. ⁴⁹ Tondo olya ukwongwilila,nu ntakukita ,asusana na muntu umoyi wobakile numba sitite'iyango lyakomwa mw'itete.Kiswa kisundile ku'so nu ku sendula, nu busambya bwiyenduka bweso numba bwa binde bunene.