¹ Bwabagha Yesu bwighi na kitatenge cha Genasaleti,nu kikembe cha mukulumaninde ko buno chongwilile kitondo cha Ghongo, ² alolagha bwato imbili ku muse wa kitatenge nu balobi babagha batukile mu bwato bakukamya tukilha twabo. ³ Abakamagha mu bwato bumoi u bwa Simoni,nu kumubula abushigheleshe kulayi na muse.Agho,abundagha, nu kutukila mu bwato ,abagha ekweghesha kikembe cha bantu. ⁴ Mu kushila kutenda,abulagha Simoni : Shighelela kweli masi mengi,nu mulekele tukilha twinu, ⁵ Simoni amubulagha : Mweghesha, twakitagha nkashi kindi kinsai tatwitile kena , tondo ku kitondo chobe,nkulekela kakilha. ⁶ Mu kuba akalekela , bitagha bisonga bingi,nu kakilha kabagha kise kat'ika. ⁷ Bamanagha banabo babagha mu bungo bwato,bashwe ku bakasha. Bikagha nu kwisasha bwato imbili ,salondagha kuliba. ⁸ Gha monagha Simoni kubo,indekelagha ku mashwe ma Yesu nu kumubula : Mukota,tuka bwighi nine,kubuno nili muntu wa bwaghi. ⁹ Kubuno boba bwamukatagha we nu bansayi babagha nawe , kutingila bi bamonagha ko mu kuloba. ¹⁰ U bwabagha ku Yakobo nu Yoani ,basikila ba Sebedayo,banabo na Simoni. Agho Yesu abulagha Simoni : Ntukwe boba lingo ; Kulingila buno busi ukaba mulobhi wa bantu. ¹¹ Nu mu kwicha bwato ku muse, bashighagha binsayi,nu kumuyanga. ¹² Yesu abagha mu musumba umoi ;Nu lola mulume umoi wite bubembi,mu kumumona ko ,akomagha mashwe ghabusho nawe nu kusegha : Mukota ,ndi washima,una nengya. ¹³ Yesu alambyagha kuboko kwaghe ,kumukata ko nu kumubula : Nashima, enga .Mwako kaluma,bubembi bwamutukagha ko . ¹⁴ Nu agho amukakishagha ntasambalile muntu.Tondo,amubulagha ,nda windoshe kuli nsakogha,nu tula lukaso lwa kwenga kobe anga byatilwagha na Musa,kubuno bube buteneneki ku beli. ¹⁵ Lukumbu lwaghe lwasandabanagha,nu bantu bashwagha bengi ku mwongwilila nu kulama nsambo sabo. ¹⁶ Nu we,iyendinde mu tulula,nu kusegha. ¹⁷ Busi bumoyi Yesu abagha ekweghesha.Bafalisayo nu ngatu sa milembe babagha bikalile,batukagha ku myelo insayi sa Galilaya,sa Yudea nu sa Yelusalema;nu bwangato bwa Mukota bwamonekagha kutingila kulamya nsambo. ¹⁸ Nu lola , bantu,bekile ku mughu mulume wabensekile bighansa,balondagha kumwicha mu miso maghe. ¹⁹ Bubindagha gha kumwingisha, kubushi bwa kikembe ,babakamagha gha ntata gha numba,nu bamukumbyagha mw'itengu ghamoyi na mughu waghe, gha nkatinghi na musanganano,nu mu miso ma Yesu. ²⁰ Mu kulola lukatisho lwabo,Yesu atendagha : Mulume,bwaghi bobe bwashighililwa. ²¹ Batili nu Bafalisayo babinde bakwimbusha nu kutenda :Nayi ghono ukwenegha Ghongo? Nayi unashighilila bwaghi,ndi ta Ghongo w'inene? ²² Yesu, amanagha milenganya sabo ,atendagha nu kubabula : Milenganya ki si mwite mu mitima sinu? ²³ Ki u kisoshu kutenda : Bwaghi bobe bwa shighililwa,ali kutenda buno imaluka,nu tabanga ? ²⁴ Buno mumane buno Mwana wa muntu ite bwangato gha kisi kushighilila bwaghi : Abulagha wabensekile bighansa : Imaluka,tola mughu wobe,nu nda kobe. ²⁵ Nu,mweso nkungu,imalukagha mu miso mabo,atolagha mughu waghe ,nu kwenda kwaghe mu kutata Ghongo. ²⁶ Bansayi baghanileghanile nu kutata Ghongo ; mu kuba na boba bwingi batendagha : buno busi,twamona ku bitondo bitemonekagha ko. ²⁷ Mukutuk'agho,Yesu asangagha muntu'moyi wa kisungu ,ukumanwa Lawi,w'ikalile gha muligho wa mpalata . Amubulagha : Njange. ²⁸ Nu ,mu kushigha binsayi, imalukagha,nu kumuyanga. ²⁹ Lawi amukitilagha kisaghulo kinene mu numba saghe,nu bantu bengi ba kisungu nu bango bantu binginde kulya ghamoi nawe. ³⁰ Bafalisayo nu batili bakitagha manungunungu,nu kubula begheshibwa baghe : Buni bumukulya nu kunywa na bantu ba kisungu nu bantu babi. ³¹ Mwa mukutenda ika Yesu ,ababula :Ta bankambwe u bite nkasa na musakishi,tondo basambi. ³² Nshashwile kumana basanana buno binsungule mu mitima,tondo bisa bwaghi. ³³ Bamubulagha : Begheshibwa ba Yoani,anga babo ba Bafalisayo,bakwinania indya ngendo ningi nu bakukita masegho ,tondo bobe bekulya nu kunywa. ³⁴ Abakulagha : Muna nan'indya binda ba musongi,nu musongi echeli ghamoi nabo ? ³⁵ Bindi bikashwa musongi akashighana nabo,agho bakinan'indya mwibyo bindi . ³⁶ Ababulagha mashumo mano : Muntu ntanaketula kindi cha nshulu nsogha ,nu kusibika ku nshulu sindisha; kubuno akwata nshulhu nsogha ,nu kibe chatolagha takili ch'eso sindisha. ³⁷ Nu muntu ntanabika makhu mabisibisi mw'indegha lya kalai ; nti makhu mabisibisi nti mata malegha, nu nti mitika,nu malegha mashimila ; ³⁸ tondo bekubikagha makhu mabisibisi mu malegha masogha. ³⁹ Nu muntu, washila kunywa makhu mindisha ,ntanashima lingo mabisibisi, nti atenda: Mindisha u masogha.