¹ Yesu ,mu kwimika miso,alolagha batumba bakubika nkaso sabo mu chanshi. ² Alolagha nu musumbakashi' umoyi mukene , akubika bichele bibili. ³ Nu ik'atenda : Nkubabula bulili, ghoso musumbakashi mukene atucha bya ghimba bansayi. ⁴ Kubuno batucha bikeke ku bingi bibite, tondo we atucha byaghe binsayi bya kalamo kaghe. ⁵ Ubo bwabagha bamoyi bakutenda ku makoyi masogha nu nkaso satondile numba sa kukumbamila,Yesu atendagha ; ⁶ Bindi bikashwa , ku binsayi bimwalola ko,ta kukashighala ikoyi ghantata na lingo litak'enduka. ⁷ Bamubushagha ,Mwegheshi, mu bindi ki mukatinga'ibyo,nu bikamanililwa buni ? ⁸ Yesu abakulagha :Mwindange,tamwengelelwe,kubuno bengi bakashwa kw'ishina lyani,mu kutenda,ine ghono ,nu bindi byeli bwighibwighi .Mubayangaghe. ⁹ Gha mukongwa ku misaghu sa bita nu tubilikito ,ta mukwe boba,kubuno ibyo byemana bike tanga .Tondo ta busi bushinda. ¹⁰ Agho ababulagha : Kilongo kikimalilana na kingo kilongo,nu bukota bukalwana na bungo bukota; ¹¹ kukatinga tulingini twingi ku bishiki bingi,nsambo,nu nsala, kukaba bitemonekagha ko nenshi,nu tumanililo twingi mw'ighulu. ¹² Tondo, gha busho n'ibyo,bakabakata,nu kubanubya ; bakabasigha ku masinakoki,nu kubalekela mu kahombo,nu bakabimika kuli bami nu bakulu ba myelo,kubushi bw'ishina lyani. ¹³ Mukatinga mw'ibyo buno mube bateneneki. ¹⁴ Mwamanagha mu mutima buno tamulonde bimwatende, ¹⁵ kubuno,nkabelesha kitondo nu bulenganya bitakananwa na baghini binu. ¹⁶ Mukesanwa na babuti binu,na bisakwinu,na beli na benywe ghamoi,na binda binu,nu bak'ita bengi ku benywe. ¹⁷ Mukasombwa na bansayi, kubushi bw' ishina lyani. ¹⁸ Tondo ta lushuli lwinu lumoyi lw'itwe lukashimila, ¹⁹ Mu kw'inya mitima u mu mukonia mitima sinu . ²⁰ Gha mukalola Yelusalema atimbwa na bita ,mwamanagha buno nsunsu seli bwighi. ²¹ Agho,ba bakasangwa ku Yudea batinile ku minduko,nu bakasangwa mu Yelusalema batuke mo,nu bakasangwa ku maswa bingilaghe mu musumba . ²² Kubuno u bukaba bindi bya kwishungula inga bya kuka bya byatililwe. ²³ Musambo ku bakashi bakaba bemeshu nu ku babo bakumomya mu byo bindi !Kubuno kukaba musambo munene mu kisi,nu mushibu ku bantu. ²⁴ Bakakwa na mwele,nu bak'ekwa ku bingo bisi ,nu Yelusalema akanantwa na bisi, kw'ikila bindi bikuke. ²⁵ Kukaba tumanililo mu musi,mu mweshi nu mu tumbalumbalu.Nu mu kisi,mukaba munubo mu bilongo,bikinda bya kukita, ku lwayo lwa kitatenge nu lwa bimpumu. ²⁶ Bantu bakakwa na boba bunene mu kulindila bikatinga mu kisi,kubuno bwangato bw'ighulu bukayunjwayujwa. ²⁷ Agho,bakalola Mwana wa muntu ashwa mu lubhu na maghala nu lukumbu lunene. ²⁸ Gha kika ibyo bitondo ,mwimalagha nu mwimaluche matwe minu kubuno kalamo kinu kika. ²⁹ Nu ababulagha mu kulingika bitondo : Mulole muti wa mutini nu miti insai. ³⁰ Gha kuba sa'sa ,mukumana benywe binene buno kilimo cheli bwighi . ³¹ U bubo gha mukamona ibyo bitondo bika,mwamanagha buno bukota bwa Ghongo bwise bwighibwighi. ³² Na babula bulili ,luno lughiso talukatinga nu bino bitondo ta bika. ³³ Ighulu nu kisi bikatinga,tondo bitondo byani ta bikatinga . ³⁴ Mwindange , mitima sinu sibaghe sa buthugu bwa kulya nu kunywa, nu nkasa sa kalamo,nu busi'ubo bunika nu tamukumana ; ³⁵ kubuno akika anga kakilha ku bantu bansayi beli mu kisi. ³⁶ Muyamaghe kashi,museghe mu bindi binsayi ,inga mwaba na maghala ma kutina ibyo bikashwa ,nu muloleke ko mwimalile mu miso na Mwana wa muntu. ³⁷ Mu musi,Yesu abagha akweghesha mu numba sa kukumbamila nu kwenda kuyama ku mwinduko ukumanwa wa Miseituni. ³⁸ Nu bantu bansayi kulingila nindunindu bendagha kweli ku numba sa kukumbamila buno bamwongwilile.