¹ Busi bumoi kw'ibyo bindi,bwabagha Yesu ekweghesha bantu mu numba sa kukumbamila mu kusansa musaghu musogha,bisankogha banene,batili ghamoyi nu bakungu,bashwagha , ² nu kumubusha : Tubule,ku bwangato bwa nayi u buukukitila ko bino bitondo,nu nayi wakweleshi buno bwangato ? ³ Abakulagha : Ninengo nkubabusha . ⁴ Mumbule,lupatisho lwa Yoani lwatukagha kw'ighulu,ali ku bantu? ⁵ Tondo balenganyagha gha basambana : Ndi twamwakula : Lwa kw'ighulu, nti atubula : Chasulagha tamumukatishe ? ⁶ Nu ndi twamwakula : Lwa bantu,bantu bansayi nti batulekela makoyi,kubuno bekumana buno Yoani abagha mulenganya . ⁷ Agho bakulagha buno tabakumana ku lwatukinde . ⁸ Nu Yesu ik'abula : Ninengo,nshababule ku bwangato bwa nayi bu'nkukita bino bitondo. ⁹ Abulagha bantu seno mashumo : Muntu umoyi alimagha iswa lya musabibu,kulishighila,balimi nu kutuka mu kisi bindi bingi . ¹⁰ Mu bindi bya buuse,asingagha mukiti umoyi kuli balimi b'iswa, buno bamweleshe kibhu cha misabibu. Balimi ba misabibu bamupundagha,nu ku mukulucha maboko bwasi. ¹¹ Asingagha ungo mukiti ; bamupundagha ,kumutuka , nu kumukulucha maboko bwasi. ¹² Asingagha ungo wa basatu ; bamubelagha ,nu kumutibita. ¹³ Nen'iswa ik'atenda : Nikite ki?Nasinge mwana wani ; nampu babe na lwanso kuwe. ¹⁴ Tondo,balimi gha bamumonagha ko , ik'a balenganyagha gha basambana ,nu kutenda : Lola mwandula ; tumwite ,inga mwandu waba witu. ¹⁵ Nu bamulekelagha kushinda n'iswa,nu kumwita.Lino ,nene musabibu akabakita buni ? ¹⁶ Akashwa,kushicha balimi ,nu kwelesha bango iswa lyaghe. Gha bongwagha ko'bo,batendagha : Ta busogha kweli Ghongo. ¹⁷ Tondo,mwa mukubaghensha,Yesu atendagha : Byatenda buni bino bya tililwe : Ikoi lyatebwagha na bobaki u lyabind'iyango linene ? ¹⁸ Olya ukakitala kwily'ikoi, akabelekela , nu olya ulikendukila , akaghoghwa. ¹⁹ Basankogha banene nu batili balondagha kumukata mweso nkungu, tondo bakwagha bantu boba.Bamanagha buno kubushi bwabo u kwatendelagha Yesu amo mashumo. ²⁰ Bikalagha bakwengelesha Yesu ;nu basingagha bantu bindolagha buno ba bulili,mu kumutegha mu bitondo bamukate nu kumwesana ku basushi nu bakulu ba musumba. ²¹ Abo bantu bamubushagha : Mwegheshi , tukumana bu ukutenda nu kweghesha bya lingimana,nu ntuku ghalamila muntu,tondo ukweghesha bantu nsila sa Ghongo mu bulili. ²² Bwimilwa kuligha mpalata sa kisamba ali tobo ? ²³ Yesu,mu kumana bwengelele bwabo,abakulagha : Mundoshe kichele kimoi. ²⁴ Kama ka nayi nu mitilo wa nayi u kite ? Bamwakulagha: Wa kisamba. ²⁵ Ababulagha :Mweleshe Kisamba bya byaghe ,nu Ghongo byaghe. ²⁶ Bindagha gha ku mukatila mu miso ma bantu ; ku bitondo byaghe,tondo mu ku ghanaghana na mwakulo waghe,bakobagha. ²⁷ Bamoyi ku Basadukayo babo bakutendagha buno takuli bya kutuka ku bakuyi,bashighelelagha ,nu kubusha Yesu : ²⁸ Mwegheshi,lola bya tutililagha Musa : Ndi mubuto wa muntu akwa nu ashigha mukashi ntabuta nawe,muto waghe ak'ingilisha mukashi,nu kubutila mubuto waghe bana. ²⁹ Nu,kwabagha mibuto mutubakamo.Musoki asongagha,nu kukwa ntabuta. ³⁰ Wababili nu wa basatu bingilishagha ghoso musumbakashi ; ³¹ u bwabagha ubo ku bansayi mutubakamo,bakwagha tabashigha bana. ³² Kumbusa ,mukashi nuwe akwagha. ³³ Mu kutuka ku bakuyi, ghoso mukashi akaba mughole wa nayi,kubuno bansayi mutubakamo ba musongagha. ³⁴ Yesu abakulagha : Bana ba seno nkiko bakusongana ; ³⁵ tondo bakasangwa ba bulili mu nkiko sikashwa nu mu kutuka ku bakuyi ta bakasongana. ³⁶ Kubuno tabakakwa lingo bakasusa baghenshi,nu bakaba bana ba Ghongo ,mu kuba batuka ku bakuyi. ³⁷ Bakwile batuke ku bakui,u bwaloshishe Musa,ghabagha gh'imbunda,amanagha Mukota Ghongo wa Bulahimu,Ghongo wa Isaka,nu Ghongo wa Yakobo. ³⁸ Nu Ghongo ta Ghongo wa bakwile ,tondo wa beli gho;kubuno ku'we bansayi beli gho. ³⁹ Bamoi ku Batili,mu kutenda ,bamubulagha : Mukota watenda busogha. ⁴⁰ Nu ta bamubushishe lingo . ⁴¹ Yesu ababulagha : Buni bukutendwa Kilishitu eli mwana wa Daudi ? ⁴² Daudi w'inene akutenda mu kitabo cha Nembo : Mukota abulagha Mukota wani : Ikala kw'indume lyani, ⁴³ Kw'ikila gha nakite baghini bobe binantilo byobe. ⁴⁴ Daudi akumumana Mukota ; buni bwanaba lingo mwana waghe? ⁴⁵ Gha bagha bantu bansayi bakumwongwilila,abulagha begheshibwa baghe : ⁴⁶ Mw'indange na Batili, bakushima kutabanga na nopo ndaindai,nu bakaswe samba mu milungu ; bakulondagha bishumbi bya ghabusho mu ma Sinakoki,nu bishumbi bya ghabusho mu bisaghulo ; ⁴⁷ ba kububya numba sa basumbakashi ,nu bakwindosha na masegho malayimalayi. Bakaghayibwa bubibu.