¹ Yesu,mu kwingila mu Yeliko,atingagha mu musumba . ² Nu lola,mutumba umoi ukumanwa Sakayo,mukulu wa bisa maligho alondagha amane Yesu u nai ; ³ Tondo ntakoshagha ,kubushi bwa kikembe kubuno abagha mwighi. ⁴ Endagha lubilo kubusho,nu kubakama ku muti wa mukuyu buno amulole ko,kubuno emanagha atinge agho. ⁵ Ghi kagha Yesu mwicho kishiki,aghalamilagha kw'ighulu nu ku mubula : Sakayo kumba lubilo, kubuno natunganana ningile mu numba sobe lelo. ⁶ Sakayo akumbagha ighilighili nu kumusekela na mboghimboghi . ⁷ Mu kulola kubo,bansayi bakitagha manungunungu,nu batendagha : endile kuyama ku numba sa muntu wa bwaghi. ⁸ Tondo Sakayo, mu kwikala bwighibwighi na Yesu,ik'amubula:Lola Mukota,nkwelesha bakene kibe ku bikulo byani,nu ndi nakitinde muntu bibi,nkumukulukisha ngw'inayi. ⁹ Yesu amubulagha : Lonio lwingila buno busi mweno numba, kubuno nuwe eli mwana wa Bulahimu . ¹⁰ Kubuno Mwana wa muntu ashwile kulonda nu konia chashiminde. ¹¹ Bongwililagha ibyo bitondo,nu Yesu abakalilagha mashumo mano,kubuno abagha bwighi na Yelusalema,nu bamanagha buno bukota bwa Ghongo bwenda ku loleka ko . ¹² Atendagha buno : Mweme umoi endagha mu kisi cha kulayi buno angate bukota,nu akakuluka lingo. ¹³ Amanagha bakiti ikumi ku bakiti baghe ik'abelesha bikulo ikumi,nu ku babula:Mutimbule nabyo kwikila busi bunkakuluka . ¹⁴ Tondo banabo bamukwilagha lughi,nu basingagha kumbusa kwaghe bantu batende : Tatukushima ghoso muntu abe mwami witu. ¹⁵ Gha kulukagha ,nu kuba ashila kwimikwa mwami,amanagha bakiti baghe bashighilagha bikulo, buno amane buni bubatimbulile nabyo. ¹⁶ Musoki ikagha,nu kumubula : Mukota,kakulo kobe kakulukishe mutali ungo w'ikumi . ¹⁷ Amubulagha : Busogha ubo ,mukiti musogha, kubuno wabinde wa bulili ku bikeke, ba mwami wa misumba ikumi. ¹⁸ Wababili ashwagha,nu kutenda : Mukota kakulo kobe kakulukishe mutali wa tutano. ¹⁹ Amubulagha :Nu we imalila misumba etano. ²⁰ Ungo ikagha ,nu katenda : Mukota lola kakulo kobe kanalangagha mu kabe ka nshulu ; ²¹ kubuno nakukwile boba,ku bushi weli mulume mubibu ,ukutola by'utabikagha,nu kukana byutashikagha. ²² Amubulagha : Nakughaya ku bitondo byobe,mukiti mubi; wamanagha buneli muntu mubibu ,nkutola bintabikagha,nu nkukana bintashikagha , ²³ kichakwangilagha ntubike bikulo byani ku banki, kubuno mu kukuluka kwani nibitole na mutali ? ²⁴ Nu abulagha babagha agho : Mumunaghe ako kakulo nu mweleshe ko olya wit'ikumi. ²⁵ Bamubulagha : Mukota,ite bikulo ikumi. ²⁶ Nkubabula,bakelesh'olya wite,tondo olya utite kena akanaghwa nu ka k'ite . ²⁷ Kushil'ubo, mushwe ghano na baghini bani ,batashimagha nibe mwami wabo,nu mubite nu nkulola. ²⁸ Gha shilagha kutenda ubo,Yesu endagha ghabusho na kikembe mu kwenda ku Yelusalema. ²⁹ .Ghi kagha bwighi na Betefake nu Betania,ku mwinduko ukumanwa wa miseituni,Yesu asingagha babili ku beghishibwa baghe , ³⁰ kubabula : Mwende ku mwelo weli bwighi,ghamwike mo,mwasange chana cha mpunda chakandilwe, kite bakamwagha ko na muntu;mwakisunulagha,nu mushwe nacho. ³¹ Ndi muntu ababusha ; buni bumwasunula cho? Mwamwakulagha : Mukota ite nkasa nacho. ³² Babo basingwagha bendagha ,nu kusanga bibabulwagha na Yesu. ³³ Gha binde bakukisunula ,bisa cho bababushagha :Kichasula mwasunula chana cha mpunda ? ³⁴ Ba bakulagha: Mukota ite nkasa nacho. ³⁵ Nu bekelagha Yesu chana cha mpunda,babikagha ghantata nacho nshulu sabo,nu kubakamya Yesu gha ntata nacho. ³⁶ Mwa mulughendo,bantu ba'nsagha nshulu sabo mu nsila. ³⁷ Nu ghabagha bwighi na Yelusalema,mu kukumba mushighulo wa Miseituni,kikembe kinsayi cha begheshibwa bakatwagha na boghimboghi,nu babagha bakutata Ghongo bubibu ku bitangalo binsayi bi bamonagha ko. ³⁸ Batendagha : Akasanilwe Mwami washwa mw'ishina lya Mukota ! Boolo kw'ighulu,nu lukumbu mu bishiki bya kw'ighulu! ³⁹ Mukantighi na kikembe Bafalisayo bamoyi babulagha Yesu : Mukota,kobya begheshibwa bobe. ⁴⁰ Nu abakulagha : Nababula,ndi ba koba,makoyi mano makalekela milenge ! ⁴¹ Bwabagha bwighi na musumba,Yesu ,kuumona ko,inga aulilila nu kutenda: ⁴² Nuwengo ,ndi unamanile ,mu bino bindi ,bu nakwelesha boolo ! Tondo byabisilwe ku miso mobe. ⁴³ Bikika bindi baghini bobe bakakutimba, nu kukukanda nu ku kukundeghelesha ; ⁴⁴ bakakusandabanya,uwe nu bana bobe, nu tabakashigha ikoyi ghantata na lingo ikoyi,kubuno ntwamanagha bindi biwatabangilwagha ko. ⁴⁵ Ingilagha mu numba sa kukumbamila,nu kutibita babagha bakughusha, ⁴⁶ mu kubabula : Bwatililwe : Numba sani sikaba numba sa masegho, tondo benywe,mwasighalula mukumba wa bimbi. ⁴⁷ Egheshagha bindi binsayi mu numba sa kukumbamila.Nu basankogha banene,batili,nu bakulu ba bantu,balondagha bwa ku mwitya ; ⁴⁸ tondo tabamanagha bwa kukita,kubuno bantu bansayi babagha bakumwongwilila nu ba kutangala.