¹ Yesu ababulagha mano mashumo, buno abaloshe bwatunganana kusegha bindi binsayi. ² Ababulagha : Mu musumba umoyi mwabagha Sushi utakwagha Ghongo boba,nu nta ghalamilagha muntu. ³ Mwoso musumba mwabagha musumbakashi umoyi wendagha wamubula : Nkalile lumbansa na munitu. ⁴ Bindi bingi ananagha.Tondo ing'itendya : Ghanaba nshikukwa Ghongo boba nu nshikughalamila muntu, ⁵ tondo kubuno ghono musumbakashi anita na lwayo,namukalile lubansa lwaghe,anasula nasamba. ⁶ Mukota atendagha : Mwongwe bwatenda ghoso Sushi mubi. ⁷ Nu Ghongo ntakakitila bya bulili basombolwa baghe, babo bakumusegha musi nu kindi,nu nta k'indisha kubelesha ? ⁸ Nababula,akabakitila bisogha lubilo.Tondo,gha kika Mwana wa muntu akasanga lukatisho mu kisi? ⁹ Akalaha lingo mango mashumo, kubushi bwa bantu bamoyi bakwindolagha basogha,nu tabekulenganyagha ku bango : ¹⁰ Bantu babili bendagha mu numba sa kukumbamila kusegha ;umoyi abagha mufalisayo nu ungo muntu wa tughutughu. ¹¹ Mufalisayo,imalagha,nu kusegha buno : E Ghongo,nakukulukisha nshimwa kubuno nsheli anga bango bantu, banaghi nu batasanana,batensha, ali anga ghoso muntu wa tughutughu ; ¹² nkw'inan'indya ngendw'imbili mw'iyinga,nkutuchagha emoyi s'ikumi sa bikulo byani . ¹³ Muntu wa tughutughu,mu kwikala kulayi, ntaghelekile kulola kw'ighulu ; tondo abaha akwimpundapunda mu bukubha,mu kutenda: E Ghongo,kwile lukogho ine muntu wa bwaghi. ¹⁴ Nababula ,ghono akulukagha kwaghe ku numba asanana,olya ungo,tobo. Kubuno olya w'intumbya,akeneghwa nu olya weneghwa akatelulwa. ¹⁵ Bamwekelagha bana bato,buno abakate ko.Tondo begheshibwa, mu kulola kubo ,basughilagha ba bashwagha na bana. ¹⁶ Nu Yesu abamanagha ,nu kubabula : Mushighe bana bashwe ku neli,nu mubananilaghe ;kubuno bukota bwa Ghongo buli bwa babo ba basusa . ¹⁷ Nkubabula bulili,olya utasekela bukota bwa Ghongo anga mwana muto,ntakingila mo. ¹⁸ Mukulu umoyi abushagha Yesu nu kutenda: Mukota musogha,nikite ki nibe na kalamo ka milyalya? ¹⁹ Yesu amwakulagha : Buni buwamana musogha ? Taku musogha anga Ghongo w'inene. ²⁰ Ukumana nkakisho : Ntu tenshe, ntwite,ntwimbe,ntushingile muntu manko; ansa so nu noko. ²¹ Atendagha,nakitil'ibyo binsayi mu busikila bwani. ²² Yesu mu kwongwa kubo,amubulagha : Winda kintu kimoyi : Ghusha binsayi bi wite, beghanisha byo bakene,nu ukaba na butumba mw' ighulu.Nu ,shwa u njange. ²³ Mu kwongwa kw'ibyo bitondo, onganwagha; kubuno abagha na bikulo bingi . ²⁴ Yesu,mu kulola bwaba na bongwa, ik'atenda : Buli bubibu ku babo bite butumba kwingila mu bukota bwa Ghongo! ²⁵ Kubuno bweli busoshu ku ngamia kubutukana mu kiboto cha nshinge kughimba mutumba kwingila mu bukota bwa Ghongo. ²⁶ Babo babagha bakumwongwilila batendagha :Nu nayi uk'ona ? ²⁷ Yesu akulagha : Bi tanakoshibwa na bantu, binakoshibwa na Ghongo. ²⁸ Petelo atendagha :Lola, twashighile binsayi,nu kukuyanga. ²⁹ Nu Yesu ababubulagha :Nababula bulili, taku muntu unashigha numba saghe,ali mughole waghe,ali mibuto saghe,ali babuti baghe ali bana baghe kubushi bwa bukota bwa Ghongo, ³⁰ nta ghebwa bingi mu seno nkiko,nu seso sikashwa,kalamo ka milyalya. ³¹ Yesu atolagha ghamoyi nawe ikumi nu babili ,nu kubabula : Lola twabakama ku Yelusalema,nu kinsayi chatilwagha na balenganya kubushi bwa Mwana wa muntu bikabelelela. ³² Kubuno akasighwa ku batekatisha ;bakamuseka,nu kumutuka ,baka mushulila matayi. ³³ nu,kushila kumusunda tuti ,bakamwitya;nu ku bindi bisatu akatuka ku bakui. ³⁴ Tondo tabongwagha busogha bibyo ; byabagha anga kananga ku beli, bitondo bi batamanagha mighanikishi. ³⁵ Bwikagha Yesu bwighi na Yeliko,kiku kimoi chabagha kikalile bwighi na nsila, ki kwema. ³⁶ Mu kongwa kikembe ki kutinga,abushagha ki kicho. ³⁷ Abulwagha : Yesu wa Nasaleti u ukutinga. ³⁸ Nu alekelagha mulenge : Yesu,Mwana wa Daudi,nkwile lukogho ! ³⁹ Babagha ghabusho bamusughilagha,buno bamukobye. Tondo alekinde mulenge bubibu : Mwana wa Daudi,nkwile lukogho ! ⁴⁰ Yesu,mukuba imala,akakishagha bashwe nawe ;nu,ghi kagha bwighi nawe, ⁴¹ amubushagha : Kiki kiwashima nikukitile ? Amwakulagha :Mukota,nilole lingo. ⁴² Nu Yesu amubulagha : Lola ; lukatisho lobe lwa konia. ⁴³ Mwako kaluma alolagha,nu kuyanga Yesu,mu kughanula Ghongo. Bantu bansayi,mu kulola kubo,batatagha Ghongo.