¹ Yesu abulagha begheshibwa baghe :Bweli bubibu makitalo minde; tondo musambo ku olya wamicha . ² Bwatunganana kuwe,ashukw'ikoyi lya kughoghela ko mwikoshi ,nu kumulekela mu kitatenge,ndi akitasha umoyi ku bano bakeke. ³ Mwindange benywe binene.Ndi mwisakwinu akita bwaghi,mumusungule,nu ndi ema nyomolo,nti wamunyomolela. ⁴ Nu ndi akukitila bwaghi ngendo mutubakamo kwa busi bumoi,nu ndi akuluka kobe ngendo mutubakamo mu kutenda : Nyomolele,nti wamunyomolela. ⁵ Ntumwa sabulagha Mukota : Tukukishe lukatisho . ⁶ Nu Mukota ababulagha : Ndi munabinde na lukatisho anga mubibo wa senewe munabulile uno muti : Intomole nu inkome mu kitatenge ; nu unabongwile. ⁷ Nayi ku benywe ,wite mukiti ukulima na nkungo ali ukulisha ntuko ,akamubula mu kutuka ku maswa : Shighelela lubilo,nu tulye ? ⁸ Ntakamubula tanga : Njikile indya l'igholo, inkokomeshe mutunda ,nu mpe indya kwikila gha nashile kulya nu kunywa ;Nu kushila agho ,nuwe, ukalya nu kunywa ? ⁹ Anaboghelaboghela uso mukiti kubuno akita bya bulwagha? ¹⁰ Nu benywe, gha mwakita bi mwabulwagha,mutende : Tweli bakiti ba tughutughu,twakitagha bi tunakitile. ¹¹ Yesu,mu kwenda ku Yelusalema atingagha gha sambana Samalia nu Galilaya. ¹² Mu kw'ingila mu mwelo,babembi ikumi bashwagha ku mukulumanya.Mwa mukwitunda,balekelagha mulenge,nu kutenda : ¹³ Yesu,Mwegheshi,tukwile lukogho. ¹⁴ Mu kubamona ko, ababulagha :Mwende, mwindoshe ku bisankogha.Nu ghabinde bakwenda ko,balamagha . ¹⁵ Umoyi kubo,kumona alama,akulukagha kughanula Ghongo n'ishuki linene. ¹⁶ Inamyagha itwe ku manshinshi ma Yesu,nu kumukasanila.Abagha Musamalia. ¹⁷ Yesu,abushagha : Abo Ikumi bansai tabalamile ?N'oso mwenda,kuni ku beli ? ¹⁸ Ta ghono mugheni u wakuluka,kushwa kughanula Ghongo ? ¹⁹ Ik'amubula lingo : Imaluka, nda ; lukatisho lobe lwa konia. ²⁰ Bafalisayo babushagha Yesu ku bindi biki ubukika bukota bwa Ghongo. Abakulagha : Bukota bwa Ghongo ta bukumoneka na miso. ²¹ Tabakatenda : Bweli ghano,ali :Bweli kukulya. Kubuno lola , bukota bwa Ghongo bweli mu kantighi na benywe. ²² Nu abulagha begheshibwa : Bindi bikashwa gha mukashima kulola kindi kimoyi cha Mwana wa muntu,nu tamukakimona ko . ²³ Mukabulwa : Eli ghano, eli kukulya. Tamwendaghe ko ,tamutibitilaghe ko . ²⁴ Kubuno,anga bu kukenukagha mulabyo nu kwenja kushinda kibe k'ighulu na kingo ,u bukaba Mwana wa muntu mu busi bwaghe. ²⁵ Tondo alinge kunuba bubibu,nu kunanwa na luno lughiso. ²⁶ Byabagha mu bindi bya Noa u bukaba ku bindi bya Mwana wa Muntu. ²⁷ Bantu balyagha,kunywa,kusonga nu kusongya bana babo,kwikila busi bwingilagha Noa mu bwato ; kiswabo kikagha nu kushicha bansayi. ²⁸ Byabagha mu bindi bya Loti bikaba ubonubo. Bantu balyagha,kunywa,kughula,kughusha,kushika,kobhaka ; ²⁹ tondo busi bwatukagha Loti mu Sodoma,mbula sa kaya nu nsasanya satukagha kw'ighulu,nu kushicha bansayi. ³⁰ Bukaba bubo bubo busi bukashwa Mwana wa muntu. ³¹ Mubo busi, olya ukaba gha ntata gha numba ,nu ashighile bikayi mu numba,ntakumbaghe kubitola ; nu olya ukasangwa ku maswa ,akulukaghe kumbusa. ³² Mukengele mukashi wa Loti. ³³ Olya ukashima konia kalamo kaghe,akakashimisha,nu olya ukakashimisha akakamona. ³⁴ Nababula,mw'icho kindi ,bantu babili bakaba ku mughu umoyi,umoyi akatolwa,nu'ngo akashighala , ³⁵ ku bakashi babili bakaba bakututa ghamoyi, umoyi akatolwa,nu'ngo akashighala. ³⁶ Ku balume babili bakaba mw'iswa,imoyi akatolwa nu'ngo akashighala. ³⁷ Begheshibwa bamubushagha : Mukota,kuni kukating'ibyo?Abasubishagha : Kwa kukaba kilunda,u ku kakulumanila ba ndyo.