¹ Bantu ba kisungu bansai nu bisa myanya mbi bashighelelagha kweli Yesu bamwongwilile. ² Bafalisayo nu basanshi bakitagha manungunungu,mu kutenda : Muntu ghono akusekela bantu ba myanya mbi,nu ekulya nabo. ³ Tondo abakalilagha mango mashumo : ⁴ Nayi muntu gha musambana ,nd'ite mbuli ighana,nu ashimish' emoyi, ntanashigha makumi mwenda nu mwenda mwa mu kalula,nu kwenda kulonda seso sashiminde,kwikila gha mone so ? ⁵ Gha kuba asimona ,nti'aseka ku kituli na mboghimboghi, ⁶ nu mu kwika mu numba,nti amana binda baghe nu banabo,nu ku babula: Mubogheboghe nine kubuno namonile mbuli sani sashimilagha. ⁷ Ububo nababula,kukaba mboghimboghi mw'ighulu ndi mwisa bwaghi umoyi ashigha bwagi bwaghe,kughimba babo makumi mwenda nu mwenda basanana batite nkasa sa kw'isungula mu mutima. . ⁸ Ali nayi mukashi ,nd'ite bichel'ikumi,nu ashimisha kimoyi,ntakubanja tala, kukukula numba nu kusilonda busoghabusogha kwikila asimone ? ⁹ Ghakuba asimona,nti amana binda baghe nu banabo,nu kubabula : Mubogheboghe nine,kubuno namona kichele chani kinashimishagha. ¹⁰ Ubo nubo nkubabula,kuli mboghimboghi ku baghenshi ba Ghongo ndi mwisa bwaghi 'umoyi ashigha bwaghi bwaghe. ¹¹ Atenda lingo : Muntu moi abagha na basikila baghe babili. ¹² Wa mwana muto abulagha ise : Tata ,neleshe kibhu chani. Nu ise ababeghanishagha butumba bwaghe. ¹³ Mu bindi bikeke,ghoso mwana muto,akunsumanyagha byaghe binsayi,endagha mu kisi cha kulayi,uko ashililishagha bikulo byaghe binsayi mu luwawa. ¹⁴ Gha shilagha binsayi,nsala inene sabagha mw'icho kisi,nu isangile mu bukene. ¹⁵ Endagha ku kitila muntu umoyi wa kisi mulimo, ghoso amusingagha ku maswa maghe kulanga mpunu saghe. ¹⁶ Ashimagha ikutye nda saghe n'indya lya mpunu , tondo taku wamweleshishe byo. ¹⁷ Mu kwighanisha,isitendya : bakiti banga beli kwitu bakulya tumpampa twingi ,nw'ine , ghano ,nkukwa na nsala ! ¹⁸ Nkimaluka ,nkenda kwa tata,nu nkamubula : Tata nakitile bwaghi mw'ighulu nu ku weli , ¹⁹ nshinakosha lingo kumanwa mwana wobe ;nkate ang'umoyi wa bakiti bobe. ²⁰ Nu imalukagha,nu kwenda kweli 'ise. Bwabagha echeli bulayi,ise amumonagha ko,nu akatwagha na chombo,endagha lubilo nu kumukumbatila nu ku mumuma. ²¹ Mwana amubulagha : Tata wani,nakitagha bwaghi munda n'ighulu nu kobe,nshatunganana ku manwa lingo mwana wobe, ²² Tondo ise abulagha bakiti baghe : Mulishe lubilo lopo lusogha,nu mumushwaliche ; mumushwaliche lupete ku munywe ,nu bilato ku manshinshi . ²³ Mushwe na nkambu sa nona,nu muketule so. Tulye nu tubogheboghe ; ²⁴ kubuno mwana wani ghono akwagha,nu atuka ku bakuyi,ashimilagha ,nu amoneka.Nu ba boghaboghagha. ²⁵ .Nu nkulha abagha ku maswa.Gha kulukagha,nu kwika bwighi na numba, ongwililagha nembo nu mamina. ²⁶ Amanagha umoyi ku bakiti ,nu kumubusha ki chabinde. ²⁷ Ghoso mukiti amubulagha : Muto wobe u wika,nu kubuno echeli anaka,so ita nkambu sa nona. ²⁸ Ashibukagha ,nu ntashimagha kw'ingila. Ise akukukagha ,nu kumusegha ingile. ²⁹ Tondo a akulagha ise : Lola, myaka ningi nkukukitila milimo ,nu nsha tingile kulayi na milembe sobe,nukilo busi buwaneleshishe shampene ni bogheboghe na binda bani. ³⁰ Nu ghika mwana wobe,ghoso washilile bikulo byobe na baluwawa ,wamuketulila nkambu sa nona ! ³¹ Ise amubulagha: Mwana wani,uli n'ine bindi binsai,nu binsayi binite byeli byobe ; ³² tondo twema kuboghabogha,kubuno muto wobe akwagha nu akuluka mughimaghima ,kubuno ashimilagha nu amoneka lingo.