¹ Ghi ngilagha Yesu mu numba sa mukulu umoyi wa Bafalisayo,busi bwa sabato, buno alye indya, Bafalisayo babagha bakumunghensha. ² Nu lola muntu wa lusambo lwa kabunda ikalagha bwighi nawe . ³ Mwa kutenda Yesu ,abulagha ngatu sa milembe nu Bafalisayo : Bwimilwa, ali tobo kulamya busi bwa sabato ? ⁴ Bakobagha .Agho lino Yesu alambyagha kuboko kwa ghoso muntu,kumulamya nu kumubula iyendele. ⁵ Nu ika babulagha : Nayi umoyi ku benywe ndi mwana waghe ali nkambu saghe sakolokela mu mushinga,ntanamutucha mo ,busi bwa sabato ? ⁶ Nu bindagha bya kumwakula . ⁷ Abakalilagha mashumo babo bamanaghwa , mu kulola buno bashima bishumbi bya ghabusho ; ik'ababula : ⁸ Gha ukamanwa na muntu ku kisaghulo k'isonga, ntwikale kushiki kisoki ,kubuno ku bamanwagha kunaba muntu wakughimba, ⁹ nu' olya wabamanagha anashwa ku kubula : Shighila ghono muntu icho kishumbi .Ukakwa nsoni sa kwenda kwikala ku kishumbi cha kumbusa. ¹⁰ Tondo gha ukamanwa,nda wikale ku kishiki cha kumbusa ,ghakika wakumanagha,akubule: Mwinda wani ,shwa wikale ku kubusho. Nw'agho,ukaba na lwanso kwabo baukulya nabo. ¹¹ Olya w'intumbya ak'eneghwa,nu olya weneghwa,akatelulwa. ¹² Abulagha wamumanagha : Ghongwa ukwelesha bantu kw'indya lya munkatighi na musi ali l'igholigholo,ntumanaghe binda bobe,mibuto sobe ali babuti bobe,aba batumba beli ghantungo nowe,banashwa kukumana nu kukukitila ubo. ¹³ Tondo,ndi wite kisaghulo,mana bakene,booma,babensekile,nu biiku. ¹⁴ Nu ukaba mukasanilwa kubuno abo tabanakosha kukukitila ubo ; kubuno ukakulukishwa ibyo busi bwa kutuka basanana ku bakuyi. ¹⁵ Umoyi ku babo babagha bekulya nabo,ghongwile bibyo bitondo,ikabula Yesu : Akasanilwe ghoso ukalya indya mwa mu bukota bwa Ghongo ! ¹⁶ Nu Yesu amwakulagha : Munt'umoyi ayikagha indya lingi l'igholigholo,nu ikamana bantu bengi. ¹⁷ Mu nkungu sa kulya,asingagha mukiti waghe kubula bantu ; Mushwe,binsayi byalongomana. ¹⁸ Tondo bo bansayi ,bananagha.Musoki amubulagha: Naghulile iswa ,nu nemana kwenda kulisona;nakulilila,nshighe. ¹⁹ Ungo ikaamubula : Naghulile ighimba lya nkabu;mabuti matano nu balume batano,nkwenda kusilisha;nakulilila nshighe. ²⁰ Ungo ik'atenda: Nasongile mu bino bindi uchasula nsishwe. ²¹ Mukiti,mwa mu kukuluka,asambalilagha nene kisaghula.Agho ,nene kisaghulo ashibukagha nu kubula mukiti waghe :Nda mu bishiki nu mu musumba,shwa na bakene ,bite bighansa biuuma,biiku,babesekile bighansa. ²² Mukiti atendagha : Mukota,nakitile binsayi biwambulagha,nu bishiki bicheli mu numba. ²³ Nu mukulu wa kisaghulo abulagha mukiti : Nda mu nsila ningi nu bwighibwighi na mikolo, nu bawasange wabakakishagha kw'ingila buno numba sani sisale . ²⁴ Kubuno, nababula ,nu kilo muntu wampa ku babo bamanwagha ukasonda kw'indya lyani l'igholo. ²⁵ Kikembe kingi chendagha na Yesu.Mu kukebatuka ,nu ik'ababula: ²⁶ Ndi muntu anjanga nu ntasomba ise,nina,mughole waghe,bana baghe,mibuto nu babitu baghe,aba kalamo kaghe tanga,ntanaba mwegheshibwa wani. ²⁷ Nu olya ute'ka musalaba waghe,nu ntanjanga,ntanaba mwegheshibwa wani. ²⁸ Kubuno,nayi ku benywe ukulonda kobaka numba , ntikala tanga nu kughansha bikulo bite nu ndi binashila mulimo , ²⁹ anaba ashindila mukantighi na mobako,nu nti asekwa na bantu ³⁰ mu kutenda: ghono muntu akomagha numba,nu ntasitoshishe ? ³¹ Ali nayi ghoso mwami, ukulonda kulwana n'ungo mwami,ntikala ghansi tanga nu kulola ndi anakosha,kutingila elefu saghe ikumi sa balume ,kulwana na ghoso washwa na elefu makumi mabili ? ³² Ndi ntanakosha, nu mukuba munabo echeli bulai, ntiamusingila muntu ku malonga ma boolo. ³³ U byeli ,ku benywe olya utashighilila binsayi bite,ntanaba mwegheshibwa wani. ³⁴ Munkange weli kikayi kisogha ; tondo ndi washimisha nse saghe,ki kiunalunga lingo ? ³⁵ Tawaswagha lingo kw'itete nu kw'ishala ; nti watebwa kumbugha. Olya wite matui ma kwongwa,ongwe.