¹ Mwebyo bindi bantu babagha agho,baghanikishagha Yesu ku byatingagha ko ba Galilaya,bwaswanyagha Pilato mikilha ghamoyi na bisansa byabo. ² Abakulagha : Mwalenganya buno babo Bagalilaya u bisa bwaghi kughimba bango ba Galilaya,kubuno, banubagha ubo? ³ Tobo,nababula.Tondo ndi tamwinsungula mu mitima,mukashika ubo benywe bansayi . ⁴ Ali abo bantu ikumi nu munani bendukilwagha na munala wa Siloamu nu kubashicha ,mukulenganya buno abo u babi kughimba bantu bansayi ba Yelusalema ? ⁵ Tobo,nababula : Tondo ndi tamwinsungula mu mitima ,mukashika ubo nubo. ⁶ Abakalilagha lingo mano mashumo : Munt'umoi abagha na mutini washikwagha mw'iswa lyaghe lya misabibu.Ashwagha ko kulonda bighuma nu ntamonagha kena. ⁷ Agho ,abulagha mulangi w'iswa :Lola myaka isatu'ino nkushwa kulonda kighuma ku ghono mutini ,nu nshikumona kena.Shinda gho : Buni bu wikala muli nw' itete tughutughu? ⁸ Mulangi w'iswa amwakulagha : Mukota ,shigha gho tanga uno mwaka ; natime kushindashinda nu kubika itete lya munagho . ⁹ Nampu ku bindi byashwe ,uka konamya bighuma ; ndi tobo nti waushinda . ¹⁰ Yesu abagha akweghesha mu Sinakoki emoyi busi bwa Sabato. ¹¹ Nu lola,mukashi umoi wakitwagha kasokoluma na basumbu myaka ikumi nu munani,abagha akumbamile mughongo,nu ntanakoshishe kuwimalucha. ¹² Yesu mu kumumona ko ,amubulagha kino kitondo : Mukashi,walama busokoluma bobe. ¹³ Nu amubikilagha maboko.Mwako kaluma imikagha mughongo,nw'ing'aghanula Ghongo. ¹⁴ Tondo,mukulu wa Sinakoki mwa mu kulola Yesu alamya busi bwa sabato ,ashibukagha, abulagha kikembe : Kweli bindi mutuba bya mulimo,mushwe mulame mwibyo bindi, tondo ta busi bwa sabato. ¹⁵ Mukota amwakulagha:Bengelele ! Nayi umoi ku benywe ,utakukandulagha nkambu ali mpunda saghe busi bwa sabato,nu kusicha ku sinanywila masi ? ¹⁶ Nu ghono mukashi,weli nuwe mukinga wa Bulaimu,nu wakandilwe na Kahinga myaka ikumi nu munani,ta bwatunganana akandulwe busi bwa Sabato? ¹⁷ Gha bagha akutenda ,baghini baghe bansayi bakwagha nsoni,nu kikembe chaboghaboghagha ku binsayi bya byakitagha bya kughanula. ¹⁸ Atendagha lingo:Ki chasusana na bukota bwa Ghongo, nu nibulingike na ki? ¹⁹ Bwa susana na mubibho wa senewe watolwagha na munt'umoyi,nu kuubiba mw'iswa lyaghe ; wasagha,waghalukagha muti,nu tusoni tw'ighulu tobakile bishumba mu ntabe saghe. ²⁰ Atendagha lingo : Nilingike bukota bwa Ghongo na ki ? ²¹ Bwasusana na lughagho lwatolwagha na mukash'umoyi nu kulwinda mu kilianga binamagha basatu ba nshano,buno situmbye buntu bunsayi. ²² Yesu atingagha mu misumba nu myelo,mu kweghesha,nu kwenda ku Yelusalema. ²³ Munt 'umoyi amubulagha : Mukota, bakeke u bak'ona ? Abakulagha : ²⁴ Mwikake kwingila ku lumbi lukeke.Kubuno nababula bengi bakalonda kw'ingila,nu tabakakosha. ²⁵ Gha k'imala nene numba nu kwighala lumbi,nu benywe mweli gha mbugha, mukakokomola ku lumbi,nu kutenda : Mukota,Mukota twighulile !Akabaakula : Nshikumana kuni kumwatuka. ²⁶ Agho mukatenda : Twalyagha nu kunywa ghamoyi nowe, nu weghishagha bantu kwitu, ²⁷ Nu akabakula : Nababula:Nshikumana kumwatuka ; Muntukile benywe bansayi bakiti ba mabi . ²⁸ Uko u kukaba indilo nu kukala mino,gha mukamona Bulaimu,Isaka nu Yakobo nu balenganya bansayi mu bukota bwa Ghongo,nu benywe mwalekelwa kumbugha. ²⁹ Bakatukila ku kutukila musi nu ku ukuyamagha, kuntata nu kunsi,nu bak'ikala ku mesa ma bukota bwa Ghongo. ³⁰ Nu lola, bashinda bakaba basoki ,nu basoki bakaba bashinda. ³¹ Ubo busi Bafalisayo bamoyi bashwagha kumubula : Iyendele,tuka ghano,kubuno Helode ekulonda ku kwita. ³² Abakulagha : Mwende ,nu mubule kicho kisenge :Lola,nkutibita basumbu,nu nku lamya bantu buno busi nu munindu,nu ku bindi bisatu nti nashila. ³³ Tondo,bwatunganana nitabange lelo,munindu,nu busi bukushwa;kubuno tabwaswagha mulenganya akwile kubugha na Yelusalema. ³⁴ Yelusalema,Yelusalema,uwe ukwita balenganya nu kwita na makoyi babo basingwagha kobe,ngendw'inga nalondagha kukulumanya bana bobe,ang'imbuti lya nkoko likukunga bana baghe mu byubi byaghe,nu ntwashimagha. ³⁵ Lola, ukashighilwa numba sobe ; tondo, nababula : Tamukandola ko lingo ,ndi tamutenda : Akasanilwe olya washwa mw'ishina lya Mukota !