¹ Kutingil'ibyo,bantu bakulumanagha bikembe bikembe bya maghana nu kwikila kunantana ,Yesu abulagha begheshibwa baghe: Mu binsayi, mwindangagha na bwagho bwa Bafalisayo, u bwengelelo. ² Takuli chabisilwe ,kitaka bisulwa,ali kindo kitakamanililwa. ³ Uchasula,kinsayi kimukatenda mu bulimaswa ki kwongwililwa mu chengeshi,nu ki mukatendela ku matuyi mu chumba kika sanswa ghantata gha numba. ⁴ Nkubabula,benywe binda bani : Ta mukwe boba babo bakwita mubili nu,kushila ubo tabana kita bungo. ⁵ Nabaloshe nayi olya munakwa boba.Mukwe boba,ghoso ,kushila kwita ,ite bwangato bwakukulekela mu kaya ;naki,nababula,ghoso u mukwaghe boba. ⁶ Ta bakughushagha tusoni tutano ku tukulo tubili ? Tondo,taku wampa kubo ukwebelelwa na Ghongo. ⁷ Nu nshuli insayi s'itwe linu saghansilwe .Tamukwe boba lingo: Benywe mwaghimba tusoni twingi. ⁸ Nababula,olya ukanganula kuli bantu,Mwana wa muntu nuwe akamughanula mu miso ma baghenshi ba Ghongo ; ⁹ tondo olya ukantuna mu miso ma bantu akatunwa mu miso ma baghenshi ba Ghongo. ¹⁰ Nu olya ukatenda bubi ku Mwana wa muntu,akashighililwa;tondo olya ukenegha Muusa Musogha ntakashighililwa. ¹¹ Gha bakabicha mu ma Sinakoki,ku basushi ,nu bangati,tamwimbushe buni bumwishungule ali bumwatende; ¹² kubuno Muusa Musogha ukabegheshe mweso nkungu ki ki u cha kutenda. ¹³ Umoyi abulagha Yesu, munkatighi na kikembe : Mwegheshi, bula mubuto wani abeghanye mwandu witu ine nawe. ¹⁴ Yesu amwakulagha : E mulume,nayi wambikile Sushi winu,ali wakuba beghanisha? ¹⁵ Agho, ababulagha : Mwindange na butughu bunsayi, kubuno kalamo ka muntu ta kakutuka ku bintu byaghe ,anaba eli mu butumba. ¹⁶ Nu ababulagha mashumo seno: Maswa ma mutumba umoi makonamyagha bingi. ¹⁷ Nu ghabinde ekulenganya w'inene, mu kutenda : Nakite kiki ? Kubuno nshite gha kubikila buuse bwani. ¹⁸ Lola,nkumana binakite. Nasambule bigholo byani,nu kuluka binene,nakusamanye buuse bwani bunsayi nu bikayi byani binsayi; ¹⁹ nu n'itendye mu mutima : Mutima,wite bikayi bingi bisogha,byabikwa ku myaka ningi; omulwa,lya,nywa,nu boghabogha. ²⁰ Tondo Ghongo amub'ulagha : Mughasanga ! Mu kino kindi mutima wobe ukutolwa; nu biw'imbikinde ,bikaba bya na nai ? ²¹ U bweli muntu wakunsumanya butumba bwaghe ,nu nteli mutumba kwa Ghongo. ²² Yesu atendagha lingo na begheshibwa baghe : Uchasula nkubabula:Tamwighanyeghanyaghe ku kalamo kinu, ku bimwalye ,ali mibili sinu ki kimwashwale. ²³ Kalamo kaghimb'indya,nu mubili waghimba nshulu. ²⁴ Mulole tusoni ;tatukushika ali kukana,tatwite nshi ali bigholo;nu Ghongo akutwelesha indya.Ngendw'inga benywe bu mwaghimba tusoni ! ²⁵ Nayi ku benywe mu kw'inganyanganya,anakosha kwintalikila kindi kimoyi ku kalamo kaghe ? ²⁶ Ndi tamunakosha kukita kena ,buni bumukwinganyanganya ? ²⁷ Mulole bukukula bisughu; tabikukita nkashi ali kuluka ; tondo nkubabula buno Solomono mu butumba bwaghe bunsayi ,ntashwalile anga kimoi kubyo. ²⁸ Ndi Ghongo akushwalicha buno busi kisughu cheli mu maswa nu munindu chalekelwe mu kaya,buni bwak'inda ku bashwalicha benywe ba lukatisho lukeke? ²⁹ Nu benywe,tamwimbushe ki kimwalye nu kimwanywe,nu tamwinganyenganye. ³⁰ Kubuno ibyo binsayi bikulondwa na batekatisha ba kisi.Tata winu ekumana bimwite nkasa nabyo. ³¹ Mwalondagha tughu bukota bwa Ghongo;nu mukeleshibwa binsayi . ³² Tamukwe boba ,kikembe kikeke;kubuno Tata winu ashima busogha mweleshibwe bukota. ³³ Mughushe bi mwite nu mwesane lukaso .Mwimbikilagha nsagho si tanakungugha,butumba bute bwa kushila mwa mw'ighulu, gha tenika mwimbi,nu kaghembe kuteta. ³⁴ Kubuno, gha gheli butumba bobe,u ghakaba mutima wobe. ³⁵ Mukokomeshe mitunda sinu,nu tala sinu sibange. ³⁶ Nu, benywe mususane na bantu bekulindila Mweghesha wabo atuke ku kisaghulo k'isonga,buno bamwighulile mu kwika kwaghe nu ku kokomola ku lumbi. ³⁷ Bakasanilwe bakiti bakasangwa na mukota wabo tabayamile ! Nababula bulili,ankishuka mutunda ,akababika gha mesa ,nu kubelesh'indya balye. ³⁸ Nd'ika mu kutalimuka lya ngendw'i imbili ali lya ngend'isatu,bakasanilwe abo bakiti bakasangwa ta bayamile. ³⁹ Mwamanagha buno ,ndi nene numba anamanile mu nkungu ki sinika mwimbi,ntanayamile nu kushigha numba saghe situkulhwe. ⁴⁰ Nu benywe ,mwikale ntende,kubuno Mwana wa muntu akika mu nkungu si mutakumana . ⁴¹ Petelo amubulagha : Mukota,ndi beshwe ali ku bansai u kuwakalila mano mashumo ? ⁴² Nu Mukota ababulagha: Nayi ghoso mulangi wa bikulo wateghelesha,ukabikwa na Mukota angate bantu baghe,buno abelesh' indya mu bindi bya tunganana ? v 43 Akasanilwe ghoso mukiti, ukasangwa na mukota waghe akukita ubo. ⁴⁴ Nkubabula bulili, akamubika mwangati wa bikayi byaghe binsayi. ⁴⁵ Tondo,ndi ghoso mukiti imbula w'inene : Mukota wani indisha kukuluka ;ndi ise apunda bakiti balume nu bakashi,kulya nu kunywa nu kuhunduka, ⁴⁶ Mukota wa ghoso mukiti a kika busi bwa takumana nu mu nkungu satakumana,akamutetembya nu kumwelesha kibhu chaghe ghamoyi na batekatisha. ⁴⁷ Mukiti ukumana bwashima Mukota waghe,nu ntalongomanyishe kena,nu nta kita bwashima mukota ,akapundwa bipundo bingi. ⁴⁸ tondo ghoso utamanagha bwashima, nu akita byemwa kupundwa,akapundwa bikeke.Bakasegha bingi ku olya weleshibwe bingi,nu bakakakisha bingi ku olya washighilwagha bingi. ⁴⁹ Nashwile kulekela kaya mu kisi,nu bunashima,ndi kabanga kalayi . ⁵⁰ Kweli lupatisho lunema kupatishibwa,nu buni bu lwindisha nikuche lo ! ⁵¹ Mu kulengenganya buno nashwile kwicha boolo mu kisi ? Tobo,nababula,tondo kwengukana. ⁵² Kubuno batano ba numba emoyi bakengukana,basatu ku babili,nu babili ku basatu, ⁵³ tata ku musikila waghe, nu musikila kw'ise.Nina ku mukinga waghe,nu mukinga ku nina,mabyala ku mwanakashi ,nu mwanakashi ku nina byala. ⁵⁴ Abulagha lingo kikembe: gha mu kumona lubhu lwatuka ku kuyamagha musi,nti mwatenda buno mbula sashwa.Nu nti bwab'obo. ⁵⁵ Nu ndi mwalola lumpumpu lwa mukatighi na musi lwatinga ,nti mwatenda : Musi wasughe.Nu nti wab' ubo . ⁵⁶ Bengelele ! Mukumanilila bya kisi nu b'ighulu;buni bu mutekumanilila bya bino bindi ? ⁵⁷ Nu buni bu mutekumanilila bisogha benywe binene ? ⁵⁸ Ndi wenda na mughini wobe kwa Shushi, kita buunamana kw'itucha kuwe mu nsila , anashwa kukwicha kuli Shushi,nu Shushi anakwesana kuli mukulu wa bitondo,nu ghono anakulekela mu kahombo. ⁵⁹ Nkukubula, ntukatuk'umo ndi ntuligha kakulo kashinda.