¹ Busi bumoyi, Yesu abagha akusegha ku kishiki kimoyi. Ghashilagha,umoyi ku begheshibwa baghe amubulagha : Mukota twegheshe kusegha,anga bwegheshishe Yoani beghesha baghe. ² Ababulagha: Gha mukusegha,mutende : Tata, Ishina lyobe l'isanane;bukota bobe bwike. ³ Tweleshe kampapa kitu ka bindi binsayi ; ⁴ shighilila bwaghi bwitu , anga bu tukushighilila ghoso watukisikinde mabi ; nu ntutushighe ku malingiko. ⁵ Ababulagha lingo : Ndi umoyi winu ite mwinda waghe wenda kwaghe mu kantighi na kindi nu kumubula buno : Mwinda,ns'ombe tumpapa tusatu, ⁶ kubuno umoyi ku binda bani atuka lughendo,nu nshite bya kumwelesha, ⁷ nu ndi amwakula munda na numba saghe : Nshighe,lumbi lwighalilwe kalayi,bana bani nu'ine twayamile ,nshin'imaluka buno nende ku kwelesha tumpapa, ⁸ nkubabula,nu ndi ntanabuka nu kumwelesha kubuno eli mwinda waghe,ak'imaluka kubushi bwa kumubucha nu nti amwelesha binsayi bite nabyo nkasa . ⁹ Nu ine,nkubabula : Museghe, nu mukeleshibwa ; mulonde,nu mukamona ; mukokomole,nu mu kighulilwa. ¹⁰ Kubuno olya wasegha,nti eleshibwa ,nu walonda nti amona,nu akwighulilwa olya wa kokomola. ¹¹ Nai whoso tata u nelesha mwana waghe ikoi nu ndi amusegha kampapa ?Ali,nu ndi asegha kisonga,amweleshe bulhighi nu kisonga cheli gho? ¹² Ali ,ndi asegha iyungu,anamwelesha malikanga ? ¹³ Ndi benywe babibu,mukumana kwelesha bana binu bisogha,nu ki kinaghimba Tata winu wa mw'ighulu nteleshe Muusa Musogha ku babo ba musegha? ¹⁴ Yesu atibitagha isumbu lya kalumbu.Gha tukagha ily'isumbu,kalumbu katendagha,nu kikembe cha ghanaghana. ¹⁵ Tondo,bamoi batendagha : nti kutingila Belesebuli,mukulu wa basumbu,u mwakutibita basumbu. ¹⁶ Nu bango mu kumutegha,bamusegha'gha kama kamoi k'ighulu. ¹⁷ Bwamanagha Yesu milenganya sibite,ababulagha :Bukota bw'ibeghanya bo bw'inene nti bwashilha,nu numba nti s'endukila kw'engo. ¹⁸ Ndi Kahinga imbeghanya,buni bunalinda bukota bwaghe ,kubuno mukutenda nkutibita basumbu kutingila Belesebuli ? ¹⁹ Ndi nkutibita basumbu kutingila Belesebuli,bana binu bakubatibita na ki ?Uchasula, bakaba bo binene basushi binu. ²⁰ Nu ndi kutingila munywe wa Ghongo u mu nkutibita basumbu,kashi bukota bwa Ghongo bwika kwinu. ²¹ Ndi mulume wite maghala nu ngabo akulanga numba saghe, byakulanga nti byalangwa busogha. ²² Tondo,ndi wamutinga maghala amughulukila nu kumukinda ,nti amunagha ngabo insai salelamilagha, nu nti abeghanya byatukhulagha. ²³ Olya uteli ghamoi n'ine nti anginika ko,nu utakunsamanya n'ine,nti asandabanya. ²⁴ Gha kuba musumbu atuka mu muntu,nti enda ku bishiki bya mpegho,buno alonde gha komulilwa.Ndi ntasanga kena,nt' itendya : Nakulukile mu numba sani si natukilagha mo, ²⁵ nu mu kwika nti asanga sakukulilwe nu satondilwe mo. ²⁶ Agho nti' enda, kulhuta bango basumbu babibu mutubakamo ba mughimba ; nti bingila mu numba, kombhulha mo,nu nti abigha bubibu kutinga bwabagha litangi. ²⁷ Mukuba Yesu akutend' ubo,mukashi umoi,atendagha munkatighi na kikembe,nu ku mubula: Sikasanilwe nda sakwekagha ! Makasanilwe mabele ma wamomagha ko ! ²⁸ Nu ik'amubula : Bakasanilwe babo bekwongwilila kitondo cha Ghongo,nu kukilanga mu mutima! ²⁹ Gha bagha bantu bakwinkusamanya, ikatenda : Lughiso luno lweli lubibu,lukusegha kitangalo ; takikeleshibwa kingo kitangalo ndi ta kicho cha Yona. ³⁰ Kubuno,bwabagha Yona kama kamoi ku bisa Ninawe,u bukaba Mwana wa muntu mu luno lughiso. ³¹ Mukashi-Mwami wa Seba,akimala busi bwa lubansa na bantu ba luno lughiso nu akabayungya , kubuno atukile kushinda kisi kwongwilila bwenge bwa Solomono;nu lola ghano waghimba Solomono. ³² Bantu baNinawe bakimala ku lubansa na luno lughiso nu kuluyungya,kubuno baghalukagha ku busambashi bwa Yona;nu lola waghimba Yona eli ghano. ³³ Muntu ntanabanja tala nu kusibukila tondo tya sibika gha kasasa,kubuno bekwingila bamone chengeshi . ³⁴ Liso u tala sa mubili.Ndi liso lyobe lyeli lisogha,mubili ghobe unsai ukusanishibwa ; tondo ndi liso lyobe ta lisogha,mubili unsai weli mu bulimaswa. ³⁵ Walolagha busogha chengi chobe ,kinaghaluka bulimaswa. ³⁶ Ndi mubili unsai wasanibwa,nu tawite gheli bulimaswa bukeke, nti wasanishibwa busogha,anga bukusanisha tala na chengeshi chaghe. ³⁷ Gha binde Yesu akutenda,mufalisayo umoi amumanagha ende kulya kwaghe.Ingilagha,nu kulya . ³⁸ Mufalisayo aghanaghanagha mu kulola alya ntoghile. ³⁹ Tondo Yesu ik'amubula : Benywe Bafalisayo,mukusughagha ku mughongo wa kata nu lughe,nu mwa munda mwisala nkuna nu bubi bwingi. ⁴⁰ Mighasanga!Olya wakitagha bya kumbugha,ntakitagha nu bya munda? ⁴¹ Mweleshe ku lukaso bibyo bili munda,nu lola ibyo bikai binsai bikenga kwinu. ⁴² Tondo musambo kwinu ,Bafalisayo kubuno mukuligha emoyi l'ikumi lya bitembele nu bya munsila,nu bisughu binsai mukubenga kw'isanana nu lutundo lwa Ghongo : U bimunalingile kukita, nu ta kushigha bingo . ⁴³ Musambo kwinu,Bafalisayo! Kubuno mwashima bishiki bya kubusho mu Sinakoki,nu kweleshibwa samba mu milingu. ⁴⁴ Musambo kwinu !muli anga nsinda sabukilwa,nu bekutabanga gha ntata gha so nu tabekumana. ⁴⁵ Mwa mukutenda, ngatu umoi wa mulimbe ,amubulagha : Mukota,mu kutenda ubo, watutuka. ⁴⁶ Nu Yesu amwakulagha : Musambo kwinu benywe begheshi ba milembe ! Kubuno mukwecha bantu mishigho sashitogha ,nu simute 'kukata ko . ⁴⁷ Musambo kwinu ! Kubuno mukobaka nsinda sa balenganya,bitwagha na ba so. ⁴⁸ Mukuteneneka kashi ku mikolo sa baso binu,nu mwimila;kubuno,u bitagha balenganya ,nu benywe mukobaka nsinda sabo. ⁴⁹ Uchasula bulenganya bwa Ghongo bwatendagha : Nkabasingila balenganya nu ntumwa ; bakita bamoi nu kunubya bango, ⁵⁰ inga luno lughiso lwabushibwa,ku mikilha sa balenganya bansai sakubukagha kutukila kubumbwa kwa kisi, ⁵¹ kulingila mikilha sa Abeli kwika sa Sakalia,w'itwagha gha sambana kasasa nu numba sa kukumbamila ;naki,nkubabula,bakabushibwa ba luno lughiso. ⁵² Musambo kwinu ngatu sa milembe !Kubuno mwabisulile batoto ba bumanililo; ta mwingilagha benywe binene nu mwashibagha nsila ku balondagha kw'ingila. ⁵³ Mu kutuka agho, batili nu Bafalisayo bamukakishagha bubibu,nu kumutendya bingi, ⁵⁴ mwa mu kumutegha mu bitondo bikutuka mu kanywa kaghe.