¹ Kumbusa kwa'gho ,Mukota asombolagha bango begheshibwa makumi mutubakamo ,nu kusinga babili balili gha busho nawe bende mu misumba nu bishiki binsai kwanendile w'inene. ² Ababulagha :Buuse bweli bwingi ,tondo bakiti u bakeke. Museghe kashi nene buuse asinge bakiti mu buuse bwaghe . ³ Mwende ;lola ,nabasinga anga mbuli munkatighi na mpagha. ⁴ Tamweke bikulo ali nsagho,aba kilato,nu ta mukase muntu samba mu nsila. ⁵ Mu numba si mwingila mo,mutende tanga : Boolo bube mu numba seno! ⁶ Nu ndi mweli mwana wa boolo,boolo bwinu nti bwaba muwe, ndi toobo,nti bwabakulukila. ⁷ Mwikalagha mweso numba,kulya nu kunywa binsai bimweleshibwa ; kubuno,mukiti emana indigho lwaghe. Mwingilaghe mu numba seno nu seso. ⁸ Mu musumba mu mwingila mo ,nu wa basekela,mulyaghe bimweleshibwa , ⁹ mulamye basambi beli mo,nu mwababulagha : bukota bwa Ghongo bwise bwighi na benywe. ¹⁰ Tondo mu musumba u mwingila mo, ndi ta babasekela,mwende mu nsila sagho,nu kutenda : ¹¹ Twabatitulila mukungu wa musumba winu walandagha ku manshinshi mitu ; mumane buno bukota bwa Ghongo bwise bwighibwighi. ¹² Nkubabula buno ubo busi Sodoma akasungibwa bukebuke kughimba ghoso musumba. ¹³ Musambo kobe,Kolasini ! Musambo kobe Betesaida ! Kubuno,bitangalo byakitwagha munkatighi sinu binakitilwe mu Tilo nu mu Sidona, bindi bingi songo nbisungulile, mu kushwala ikunia nu kubong'ito. ¹⁴ Uchasula,busi bwa kwaya,Tilo nu Sidona bakasungibwa bikeke kubatinga benywe. ¹⁵ N'uwe,Kapelenaumu, watelulwagha kw'ighulu,bakakukumbya ku kishiki cha bakui. ¹⁶ Olya wabongwa nti anongwa,nu olya wa banana nti aninana; nu olya wa ninana nti anana olya wansingagha. ¹⁷ Abo makumi mutubakamo bakulukagha na mboghimboghi nu kumubula : Mukota,kw'ishina lyobe basumbu nubo batwongwilinde . ¹⁸ Yesu ababulagha : Nalolagha Kahinga akoloka kw'ighulu anga mulabyo. ¹⁹ Lola,nabeleshishe bwangato bwa kunanta malighi nu malikanga,nu bwangato bunsayi bwa mughini ;nu takweli ki kabanubya. ²⁰ Tondo,mubogheboghaghe buno basumbu ba bongwilinde,tondo mubogheboghe kubuno mashina minu matilwa mw'ighulu. ²¹ Mwako kaluma,Yesu aboghaboghagha kutingila Muusa Musogha,nu ikatenda: Nakutata,Tata,Mukota wa Mw'ighulu nu wa kisi,kubuno wabisile bino bitondo ku bengegha nu ku balenganya,nu wabibisula ku bana. Naki,Tata,nakutata kubuno u buwashimagha ubo. ²² Neleshibwe binsai `na Tata,nu taku muntu ukumana Mwana,ndi ta Tata, ali ukumana Tata, ndi nta Mwana nu olya walimbulilwa na Mwana. ²³ Mu kughalukila begheshibwa ,ababulagha bo b'inene : Makasanilwe miso malola bibyo bi mwalola ko. ²⁴ Kubuno balenganya bengi nu bami bashimagha balole ku bino bimukulola ko,nu tabalolile kwibyo ,nu kongwa ku bimukwongwa ko,nu tabongwile kubyo. ²⁵ Ngatu umoi wa mulembe imalukagha nu kubula Yesu buno amuteghe: Mukota,nikite ki nibe na kalamo ka milyalya ? ²⁶ Yesu amubushagha :Ki chatilwa mu mulembe ?Kiwa soma mucho ? ²⁷ Amwakulagha : U kashima Mukota Ghongo na mutima wobe unsai,nu mulenganya wobe unsani,na maghala mobe mansai ,nu makengelo mobe mansai ; nu muninu anga bubo buw'inshima uw'inene. ²⁸ Yesu amubulagha:Waakula busogha:Kita ubo nu, u kalama. ²⁹ Tondo we,mu kulonda indoshe buno asanana ,abulagha Yesu : Nayi u munitu ? ³⁰ Mukutenda Yesu amubulagha : Muntu umoi atukagha ku Yelusalema nu kwenda ku Yeliko.Akulumanagha na bisungu ,byamunaghagha binsai ,kumupunda, nu kwiyendela,kumushigha anga kilunda. ³¹ Sankogha umoi ,watingagha mweso nsila,mu kumona ku ghoso muntu ,atingagha bulai. ³² Mulawi umoi ,ikagha nuwe mwecho kishiki,mukumumona ko,atingagha bulai. ³³ Tondo musamalia umoi,wabagha mu lughendo, mu kwika agho,amukwila lukogho mu kumumona ko. ³⁴ A shighelelagha,nu kumukanda byulu,mu kumubonja mwambo nu mu nfinyo ;nu amutelulilagha ku mpunda saghe, kwenda nawe ku numba sa bagheni, nu kumusakilila. ³⁵ Gha chagha busi, atuchagha falang'imbili nu kwelesha nene numba,nu kumubula : Wamusakililagha ,bi watuche kughimba bino,nakukulukishe byo mu ku kuluka. ³⁶ Nayi ku babo basatu u mwisakwabo wa ghoso wakulumanagha na bisungu ? ³⁷ Ngatu wa milembe amwakulagha: Ghoso wamukwilagha lukogho.Nu Yesu amubulagha : Nda, nuwe,kita bubo. ³⁸ Bwa bagha Yesu na begheshibwa baghe mu lughendo,ingilagha mu mwelo umoyi,nu mukashi umoyi,ukumanwa Malita,amusekelagha mu numba saghe. ³⁹ Abagha na muto waghe ukumanwa Malia,wabagha ikalile ku manshinshi ma Mukota,mu kwongwilila kitondo chaghe. ⁴⁰ Malita,mukuba na milimo ningi sa numba,ashighelelagha Yesu nu kumubula : Mukota, washimile bubo bwanshighilila muto wani na mulimo? Mubule ankashe. ⁴¹ Mukota amwakulagha : Malita,Malita, winkutya nu kutubatuba na bitondo bingi. ⁴² Kintu kimoyi u chatunganana.Malia asombolile kibhu kisogha nta kanaghwa cho.