¹ Kuni kwatuka ku lwana, nu nsaki gha musambana,?Ta mu nkasa sa bighansa binu ? ² Mu kwelama bya bene nu ta mwite byo;muli biti nu mwashima bingi,nu tamuna kosha kubimona; mukukita nsaki nu mukulwana, nu tamwite kena,kubuno tamukusegha. ³ Mukusegha, nu tamukweleshibwa,kubushi mukusegha bubi, mu kulonda mukale nkasa sinu. ⁴ Benywe bakukita matensha !Ta mukumana buno lutundo lwa kisi lwasombwa na Ghongo?Olya washima kuba mwinda wa kisi,nti imbika mughini wa Ghongo. ⁵ Mukumana buno Kitondo cha Ghongo chatenda bwisa? Nti ghamoyi na buyongwa bunene Ghongo akulonda mutima watweleshishe. ⁶ Mu kingo kibe,akwesana mpang'inene nsogha;uchasula kitondo cha Ghongo kikutenda:Ghongo ntakushima batumitumbi;tondo akwesana mpang'inene ku ba babota. ⁷ Mwimbotye kashi kweli Ghongo; mukinde musumbu, nu akenda bulayi na benywe. ⁸ Mushighelele bwighi na Ghongo , nuwe akashighelele bwighi na benywe. Mwoghye maboko minu, bisa bwaghi, mwengye mitima sinu,bantu binda mulenganya. ⁹ Mulole bukene bwinu; mube mw'indilo nu mu bitengetenge; maseka minu maghaluke indilo, nu mboghombogho si ghaluke lubabasho lwa mutima. ¹⁰ Wimbotye mu miso ma Mukota,nuwe akakwimalucha. ¹¹ Bisakwitu,mubulanaghe bubi . Olya wabula mwisakwabo bubi ali aghya mwisakwabo,nti atenda bubi ku mulembe nu nti aghya mulembe. Kubuno, ndi waghaya mulembe,nti ntukuyanga byeli mu mulembe, tondo nti waba shushi. ¹² Umoyi u wabikile mulembe nu unaghaya gho, u ghoso unonia nu kushimisha. Tondo uwe,uwe u nayi u kwaghya muninu? ¹³ Benywe lelo bakutenda : Buno busi ali munindu twende mu musumba mulebe,twatinje mu mwaka,twatingetinge mu kutimbula,nu twamone bikulo! ¹⁴ Benywe batakumana byabe munindu! Buno, kalamo kinu u ki? Benywe mwasusana na muki ukutuka mu masi ma kubila,ukumoneka ko mu nkungu nkeke,nu ghano nu ghano nti washimila . ¹⁵ Munatendile buno: Ndi Kalagha ashima, twabe gho, nu twakite kikino ali kilya . ¹⁶ Tondo lelo,mukwitatila milenganya sinu sa butumbitumbi.Bweli bubi kwitata ubo. ¹⁷ Kashi ,olya ukumana kukita cheli kisogha,nu nta kikita,nti akita bwaghi.