¹ Kwinu batumba lelo! Mulile nu musekume , kubushi bwa misambo sikabikila . ² Butumba bwinu bwa bola, nu nshulu sinu salibwa na tughembe. ³ Nolo sinu nu bikulo binu bisala nkisa; nu nkisa sabyo sikabatenenekela, nu sikaghisha mibili sinu anga kaya. Mwakunsumanyagha butumba mu bindi bishinda! ⁴ Lola, indigho lya bakiti bakanagha maswa minu,nu mwabitya boba ,balaka,nu milenge sa bakanagha maswa sika mu matui ma Mukota Nene maghana. ⁵ Mwikalagha mu kisi mwite bingi nu mwimbikilagha butumba,mwikutyagha mitima sinu anga busi bwa kisaghulo. ⁶ Mwaghayagha,mwitagha wa bulili,utabananilagha. ⁷ Mulindile lino,bisakwitu busi bukika Mukota. Lola, mulimi akulindila buse, mu kulindila mbula siloke elya ntangi n'elya nshinda. ⁸ Nu benywe,mulindile, mukokomeshe mitima sinu, kubuno kushwa kwa Mukota kwa lembekela. ⁹ Mulakelake ghamusambana, bisa kwitu, kubuno munashwa kwaghibwa; lola, shushi eli gha kitiko. ¹⁰ Mulole nu muyange munubo mu kulindila bubibu anga balenganya babo batendagha mw'ishina lya Mukota. ¹¹ Lola,tukumana bakasanilwa babo banubagha bindi bingi. Mwongwagha bwalindilagha bubibu Yobu, nu mwalolagha bwabagha bindi byaghe bishinda byabikilwagha na Mukota, kubuno Mukota u nene lukogho nu chombo. ¹² Ghabusho gha binsayi,bisakwitu, mulumbilaghe ali kutingila ighulu,ali kutingila kisi, aba kulumbila bungo. Tondo kitondo kinu kibe kwimila kwinu kube kwimila,nu kunana kwinu kube kunana,kubuno munashwa kughayibwa. ¹³ Ndi umoyi ku benywe akunuba?Aseghe.Umoyi ku benywe eli mu mboghimboghi? Embe nembo. ¹⁴ Umoyi ku benywe e musambi? Amane bakungu ba Kanisa, nu bakungu bamuseghele,mu kumubongya mwambo mw'ishina lya Mukota; ¹⁵ isegho lya mu lukatisho likalamya musambi, nu Mukota akamwimalucha; nu ndi akitagha bwaghi, akashighililwa bo. ¹⁶ Musambalilane bwaghi bwinu gha musambana,mukitilane masegho kubuno mulame.Isegho lisogha nu lya muntu wa bulili likukita nkashi nene. ¹⁷ Elia abagha muntu anga beshwe; aseghagha na lukakisho buno mbula silokaghe, nu mbula tasalokile mu kisi myaka esatu nu myeshi mutuba. ¹⁸ Aseghagha lingo, nu kw'ighulu kwatukagha mbula ,nw'itete lyakushagha indya. ¹⁹ Bisakwitu, ndi umoyi ku benywe ashighile bulili, nu ungo amukulucha mubo, ²⁰ amane buno olya wakulucha mukiti wa bwaghi mu nsila sashighagha nti atucha mutima mu lukwo nu nti abukila bwaghi bwingi.