¹ Bwisakwitu,kubaghe ku benywe bantu bengi bakweghesha ,kubuno mukumana buno tukaghayibwa bubibu. ² Nu tukukitala mu nsila ningi .Nu ndi muntu nta kitala mu bitondo nti eli wa bulili,anakosha ku kunga mubili waghe unsayi. ³ Ndi ,twatinja mushighi mu kanywa ka mpunda buno sitongwe, mibili sabo insayi sitwiche kunsayi kutwashima. ⁴ Lola ,bwato bunaba bunene bubibu,bukuyungwayungwa na kiswa,tondo kakungo ka olya ukulugha ukubulosha nsila. ⁵ Ububo,lulame ka kighansa kakeke,kakwitatila bingi.Lola kaya kakeke kanaghisha mbala . ⁶ Lulame nulo luli kaya; u kishiki cha bwaghi.Lulame nulo luli kighansa kimoyi ku bighansa bitu,musambya wa mubili unsayi,lukughisha kalamo ka mubili witu ghano gha kisi,nulo lukaya mu mw'ishiba lya kaya. ⁷ Nama insayi nu tusoni , bakwimbulutagha nu nama sa mulusi sikutughwa na bantu; ⁸ tondo lulame, taku muntu unakosha kulutugha ; bweli bubi butanakosha kusughilwa; lwisalila na na busungu bwa lukwo. ⁹ Kutingi lo, tukukasanila Mukota Tata witu, nu kutingila lo tukushulila bantu ba bumbilwe na Kalagha. ¹⁰ Nu bubo mu kanywa , mukutuka lukasanilo nu kushulila.Bisakwitu , ta bwaswagha kuba ubo. ¹¹ Mu kasi kamoyi muna tuka masi masogha nu masi ma lubaba? ¹² Bisa kwitu ,musabibu umoyi unakonamya kighuma cha musabibu nu kingo cha miseituni? Mu kasi kamoyi tamunataghwa masi ma munkange nu masi masogha. ¹³ Nai umoyi ku benywe weli mwenge nu wite bulenganya? Aloshe mikolo saghe kutingila myanya nsogha ghamoyi na kwimbotya,mu bwenge bwaghe. ¹⁴ Tondo ndi mwite mu mutima winu buyongwa bwa kasungu nu mutima wa nsaki, mwitataghe nu mwekaghe bwisa mu bulili. ¹⁵ Ubo bwenge ta u bubo bwatuka mw'ighulu , tondo bweli bwa ghano gha kisi,bwa mubili nu bw'isumbu. ¹⁶ Buno gha gheli bongwa bwa kasungu nu mutima wa nsaki, gha bulhughana nu ghisala bitondo bibi. ¹⁷ Bwenge bwa mw'ighulu bweli tanga bwa bulili,nu butashima nsaki,kushima bi wite,bu kukulumanya bantu,bwisala lukogho nu myanya nsogha,ta bwite milenganya imbili,tabukwengelela. ¹⁸ Myanya sa bulili seli munda na boolo,ku babo bashima boolo.