¹ Bisakwitu, lukatisho lwinu mu Sankumbu Mukota witu Yesu Kilishitu,lubaghe lwa kusombola bantu. ² Bulili,tutende buno, ndi muntu umoyi ingila mu musanganano winu ite lupete lwa nolo nu ashwalile nshulu nsogha,nu mwingila mukene washwalile tughutughu; ³ nu ndi mwalola ghoso washwalile busogha, mwa mubula: Uwe, ikala ghano gha kishumbi cha bukota! Nu ndi mwabula mekene : Uwe, imala kukulya! Ali : Bunda ghano ghansi ube kinantilo chani, ⁴ agho benywe binene ,tamwakita bulondolondo, nu ta mwaghya bantu na milenganya mbi? ⁵ Mwongwilile,bisakwitu batwashima : Ghongo nta sombolile bakene mu miso ma kisi, kubuno babe batumba mu lukatisho, nu bisa mwandu wa bukota bwalaghagha ku babo bamushima? ⁶ Nu benywe, mwabenga mukene ! Ta batumba u ba kubanubya, nu ubakubicha ku tulubinali? ⁷ Ta bo ubekwenegha ishina lisogha limwite ? ⁸ Ndi mwakita bukutenda mulembe wa bwami kuyangana na Kitondo cha Ghongo:Ukashima muninu anga buwishima uw'inene,mwakita busogha. ⁹ Tondo, ndi mwasombola bantu,nti mwakita bwaghi,nu nti mwaghibwa na mulembe anga baghini ba mulembe. ¹⁰ Buno olya wayangilila mulembe unsayi, tondo abunsa lukakisho lumoyi,nti abunsa nkakisho insayi . ¹¹ Olya watendagha buno ntukatensha,u watendagha:Ntukita muntu.Buno,ndi ntwatensha,tondo wita muntu,nti u mughini wa mulembe. ¹² Mutende nu mukite anga mukayibwa na mulembe wa kushighililwa, ¹³ buno mu kwayibwa ta mu lukogho k'olya utakitile lukogho.Lukogho lwaghimba bwaghi. ¹⁴ Bisakwitu,ki kisogha kinakitilwa muntu ndi atenda ite lukatisho,nu mikolo saghe nsogha tasikumoneka ko ? Lukatisho lunamonia? ¹⁵ Ndi ku bisakwitu mulume ali mukashi bite bwela bwa nshulu nu binda indya lya kulya bindi binsayi , ¹⁶ nu umoyi ku benywe ababula buno: Mwende na boolo, nu mongwe kaya nu mwikute! Nu tamwabelesha bi bite nabyo nkasa ku mibili sabo,bite nkashi ki kutenda ubo ? ¹⁷ Ubweli nubo lukatisho ndi mikolo salo tasikumoneka ko nti lwakwile. ¹⁸ Tondo ndi umoyi anatenda : Uwe, wite lukatisho; nw'ine nite mikolo nsogha. Ndoshe lukatisho lwitite mikolo, nw'ine nakuloshe lukatisho kutingila mikolo sani. ¹⁹ Wakatisha buno kweli Ghongo umoyi,wakita busogha ; basumbu nubo bakatisha ubo, nu bakughilimila. ²⁰ Ukulonda umane, eeh muntu wa tughutughu, buno lukatisho lwitite mikolo luli lwa tughutughu? ²¹ Bulaimu, tata witu, nta ghanswagha wa bulili mu kutingila mikolo,ghatulagha musikila waghe Isaka ghantata gha kasasa? ²² Twalola buno lukatisho lwakitagha nkashi ghamoyi na mikolo,nu kutingila mikolo,lukatisho lwabinde lwa bulili. ²³ Nu agho byakukagha byatendagha kitondo cha Ghongo;Bulaimu akatisha Ghongo,nu kwibyo aghanswagha wa bulili,nu amanwagha mwinda wa Ghongo. ²⁴ Mwalola lino ,muntu aghanswa wa bulili kutingila mikolo ta lukatisho lo lwinene. ²⁵ Lahaba wabagha luwawa,ntaghanswagha nuwe wa bulili kutingila mikolo,mwa mu kusekela basoni nu a'baloshagha engo nsila sa ku kulukila ko? ²⁶ Bweli mubili witite mutima nti wakwile, ubweli lukatisho lwinda mikolo, nti lwakwile.