¹ Lununsano lutangi lyabagha nulo na nkakisho sa kukumbamila Ghongo mu numba sa kukumbamila Ghongo sa ghano gha kisi. ² Bulili,hema sabagha,sobakwagha, munda naso,mukumanwa kishiki cha sanana,mwabikwagha chanikilo cha bwagha,mesa, nu tumpampa twa kalolesho twa Ghongo. ³ Kumbusa kwa nshulu s'imbili, kwabagha kibe cha hema kikumanwa kishiki cha sanana ku babo basanana, ⁴ chabisa kasasa ka nolo ghabikwa ngenge,nu sanduku sa lununsano sabukilwa insai na nolo. Mweso sanduku,mwabagha mwanshi wa nolo mweli mana,mushumbo wa Haluni, wengenga,nu mesa mengi ma lununsano. ⁵ Ghantata na hema kwabagha baghenshi ba lukumbu,bilimelime byabo bya bukila kishumbi cha lukogho.Ta nkungu sa kutenda binsayi. ⁶ Buno ibyo bikayi kubikwa ubo,bisankoka bakukita nkashi bakwingwila mo mu nkungu insayi mu kishiki kitangi cha hema; ⁷ nu mu kishiki ch'imbili nsakogha munene akwingila mo limoyi ku mwaka, nta ninda mikila sa kutula kubushi bwa bwaghi bwaghe nu bwaghi bwa bantu bansayi. ⁸ Muusa Musogha alosha agho buno nsila sa kishiki cha sanana ch'ighulwa lingo,ndi hema ntangi sicheli gho. ⁹ U kalolesho ka bino bindi,gha bakutula nkaso nu bisansa bitenakosha kusananya muntu,kutingila mulenganya wa ghoso u ku kumbamila, ¹⁰ nu we ,ghamoyi na malya, maku nu binsayi bya mubili, bya bagha nkakisho sa mubili sabikwagha kwikila bindi bya kughalulwa. ¹¹ Tondo Kilishitu ashwile anga Sankogha munene wa bisogha bikashwa;enduchagha hema nene nu nsogha,sitobakilwe na kuboko kwa muntu,u kutenda buno ta sa bino byeli gho; ¹² nu inginde limoyi mu kishiki chasanana,ta ghamoyi na mikilha sa bilimba ,nu sa byana bya nkambu,tondo ghamoyi na mikilha saghe,mu kweleshibwa kushighililwa milyalya. ¹³ Buno ndi mikilha sa balume ba nkambu nu bilimba, nu ito lya nkambu lyasansilwa ku babo bimbighya, soya nu kusanania mubili, ¹⁴ buni bweli mikilha sa Kilishitu,we na mutima wa Ghongo,intulile w'inene uwite kama kweli Ghongo,sikasugha milenganya sinu, na myanya sakwile,buno mukitile Ghongo weli gho nkashi! ¹⁵ Nu kubo uchasula eli mukulumanya wa luno lununsano,kubuno, lukwo lwashwile buno lutuche mabi makitwagha mu lunsano lutangi, babo bamanaghwa beleshibwa mwandu wa milyalya u balaghwagha. ¹⁶ buno gheli nkusako,bwaswagha lukwo lwa wakitagha nkusako lube tanga. ¹⁷ Bulili nkusako site nkashi,ndi lukwo lwaba,talwite maghala ndi walukitagha echeli gho. ¹⁸ Lola uchasula ghamoyi na mikilha lununsano lutangi lwasekelwagha. ¹⁹ Musa,mu kushilya kwelesha bantu nkakisho insayi sa mulembe,atolagha mikilha sa nkambu nu sa bilimba, ghamoyi na masi,nu nshulu sa myosa sengenga,nu kansansa sa kunsansila;ansansilagha w'inene kitabo masi nu bantu mu kutenda : ²⁰ Seno u mikilha sa lununsano si mwakakishibwa na Ghongo. ²¹ Asansilagha lingo masi ghamoyi na mikilha ku hema nu ku bikayi binsayi bya mu numba sa kukumbamila. ²² Nu binsayi kuyangana na mulembe byengagha kutingila mikilha ,nu ndi mikilha tasakubulwa, ta kweli kushighililwa bwaghi. ²³ Bwaswagha kashi,tulolesho twa bikayi byeli mw'ighulu,binasughwa anga ubo,bikayi bya mw'ighulu byo binene binasughwa kutingila binsasa bisogha kubi ghimba. ²⁴ Buno Kilishitu ntinginde mu numba sa Ghongo sobakilwe na kuboko kwa muntu,mu kuyanga bya bulili,tondo inginde mw'ighulu, buno atutendele mu miso ma Ghongo. ²⁵ Nu tabuno iyesane ngendo ningi ichasulagha ingila,anga nsakogha munene u kwingila mu kishishi cha sanana mu mwaka umoyi umoyi ghamoyi na mikilha site saghe; ²⁶ ndi ubo,ananubile ngendo ningi kulingila kubumbwa kwa kisi, tondo bino bindi bishinda amonekile ko limoyi buno abe kisansa cha kutucha bwaghi. ²⁷ Nu anga bwabikindwe bantu kukwa limoyi ,nu kushila agho kwaghibwa, ²⁸ Ubo nubo Kilishitu wiyesanile limoyi buno eke bwaghi bwa bengi,akamoneka ko lya ngendi imbili ntite bwaghi bwa babo bakumwongwilila kubushi bwa lonio lwabo.