¹ Kitondo kinene ku bibyo byatendwa, buno twite Sankogha munene ,u wikala kw'indume lya kishumbi cha bukota bwa Ghongo mw'ighulu, ² mukiti wa nkashi mu kishiki cha sanana cha Ghongo ,nu hema sa bulili,sobakilwe na Mukota nu ta na bantu. ³ Sankogha munene unsayi akubikwa buno atule nkaso nu binsasa;u bwaswagha nuwe abe na kikayi cha kutula. ⁴ Ndi anabinde ghano ghansi,ntanabinde Sankogha,kubuno agho gheli babo bakutula nkaso kuyangana na mulembe. ⁵ (Babo bakukumbamila,kilimelime cha byeli mw'ighulu,anga bwakengeshwagha Musa na Ghongo ghabagha akwenda koboka hema sa Ghongo : Abulwagha,kumbilila busogha,wakitagha anga buwabulwagha ghantata gha mwinduko ). ⁶ Tondo lelo eleshibwa nkashi nene sakuba mukulumanya mu lununsano lwa bulili lwa bikilwe mwindaghi lisogha. ⁷ Bulili ndi lununsano lutangi talwabagha bubi,lungo talunabikilwe kumbusa kwalo. ⁸ Tondo nti ghamoyi na kitondo cha kusughila,u bwabulwagha Isilaeli na Mukota:Lola bindi byashwa, bwa tenda Mukota: Nkanusana lingo na numba sa Isilaeli nu numba sa Yuda, ⁹ ta anga ubo bunanunsanagha na b'ise, busi bunabakatililagha mu kuboko buno nibatuche mu kisi cha Misili, buno tabinkatilishagha bubibu mu lununsano lwani,nw'ine nshabalenganyagha ko, bwatenda Mukota. ¹⁰ Tondo lola lununsano lunikakita na numba sa Isilaeli,kushila ibyo bindi,bwatenda Mukota:Nkabika milembe sani mu mitima sabo,nkasitilya mu mutima wabo,nu nkaba Ghongo wabo, nubo bakaba bantu bani. ¹¹ Taku muntu ukeghesha munabo,ali mwisakwabo wampa mu kutenda:Mana Mukota!Buno bansayi bakanimana, kulingila mwana muto kwikila ku mukulu kubo; ¹² Kubuno nkashighilila mabi mabo, nu nshikakengela lingo bwaghi bwabo. ¹³ Mukutenda: Lununsano lutangi lwatingile,lola lwa lelo;cha kalayi ,cha chakungugha ,kashi nti cheli bwighi na kushimila.