¹ Bulili, ghoso Melekisedeki mwami wa ku Salemu, Sankogha wa Ghongo uli w'ighulu , wendile ghabusho na Bulaimu mu kutuka kukinda bami, nu amukasanilagha, ² nu eleshibwagha na Bulaimu kamoyi kikumi ka binsayi byakulukagha nabyo,_we u weli mwami wa bulili, kuyangana na bwatenda ilyo ishina lyaghe,kubusa kobo Mwami wa ku Salemu,ukutenda buno Mwami wa boolo, ³ nte n'ise, nte na nina,nte na kibuti, utite ndingililo ali kindi kishinda_, tondo abinde wasusana na Mwama wa Ghongo, ghoso Melisedeki eli Sankogha munene bindi binsayi. ⁴ Mulole buni bweli mukulu olya weleshibwagha na tatangulu Bulaimu kamoi k'ikumi, ku byatukagha nabyo ku bita. ⁵ Babo bana ba Lawi bakukitagha milimo sa kwela Ghongo,bite, kuyangana na mulembe,lukakisho lwa kutola kamoyi kw'ikumi ku bya shwa na bantu, ukutenda buno, kweli bisakwabo, beli ba kibuti cha Bulaimu; ⁶ nu we,uteli w'echo kibuti, atolagha kamoyi k'ikumiku kweli Bulaimu, nu akasanilagha ghoso weleshibwagha indaghi. ⁷ Buno ta myango, mwana muto u kukasanilwa na mukulu. ⁸ Nu ghano, babo bakutola kamoi kikumi beli bakuyi; tondo agho,olya watenenekwagha u utakakwa. ⁹ Lingo, Lawi, u kutolagha kamoyi kikumi, akalighile, u kutenda buno, kutingila Bulaimu; ¹⁰ kubuno abagha icheli mu kibunda k'ise, ghamonekagha ko Melisedeki mu miso ma Bulaimu. ¹¹ Ndi lino, kushililila kwakoshibwa na mulimo wa kwela Ghongo kukukitwa na balawi, kubuno mweso mulimo wakwela u mwikalila mulembe weleshibwe ku bantu,kinasulile ungo Sankogha amoneka ko?Kuyangana na lukakisho lwa Melekisedeki ta lulo lwa Aloni ? ¹² Buno mulimo wa kwela mu kuba waghalulwa ,bwaswagha mulembe nugho ughalulwe. ¹³ Bulili,olya ukubulwa ibyo bitondo eli wa kingo kilongo,nu taku muntu wacho wakitile mulimo wa kwela; ¹⁴ Buno bu byamoneka ko buno Mukota witu atukile mu kilongo cha Yuda, kilongo kitatekulwagha na Musa mu mulimo wa kwela Ghongo. ¹⁵ Ubo bwaba bulili lingo,buno ungo Sankogha amoneke ko wasusana na Melekisedeki, ¹⁶ wimikilwe,ta mu kuyangana na mulembe wa bya mubili, tondo,kuyangana na bwangato bwa kalamo katakashila. ¹⁷ Buno atenekilwe:weli Sankogha bindi binsayi kuyangana na lughiso lwa Melikisediki. ¹⁸ Kashi, mubiko wa kalayi watebwa,kubushi winda maghala nu waghaluka wa tughutughu, ¹⁹ kubuno mulembe tawikishe kampa mu bya kusanana,wabinde ndingililo nsogha sa malelamilo ma kutushighelesha bwighi na Ghongo. ²⁰ Nu u bwabinde kutingila kulumbila, ²¹ kubuno,balawi baghalukile Bisankogha banene,ta mu kulumbila,Yesu abinde we ghamoyi na kulumbila kwa ghoso wamubulagha: Mukota alumbinde , nu ntakisungula:weli Sankogha munene bindi binsayi,mu lughiso lwa Malekisedeki. ²² Kubo Yesu u wimalila lununsano lwa bulili. ²³ Nu lingo, kwabagha Bisankogha bengi ,lukwo talwabashighililagha bikale bindi binsai. ²⁴ Tondo we, buno eli gho bindi binsayi ,ite nkashi sa kwela Ghongo sitakumoneka ko. ²⁵ Nu kubo, we,anonia bulili babo beli bwighi na Ghongo,mu kuba eli gho akubaseghela bindi binsayi. ²⁶ Bulili,bwemanagha tube na Sankogha munene anga we,wa sanana,utakitile kitondo kibi,utite kama,windekanukishe na bwaghi, nu aghimba ighulu, ²⁷ ntite nkasa ,anga Bisankogha banene ,kutula bisansa bindi binsayi , tanga kubushi bwa bwaghi bwaghe ,nu lingo bwa bantu nubo,kubuno iyesanile winene limoyi umpanga . ²⁸ Bulili, mulembe u kwimika bantu bite bwaghi babe binsakogha banene; tondo kitondo cha kulumbila chashwile kumbusa kwa mulembe,kimikile Mwana,u weli wasanana nu wa milyalya.