¹ Bulili, mulembe wite kilimelime cha bisogha bikashwa, nu ta buno u kulosha busoghabusogha bikayi, tauna kosha, kutingila bisansa bi bakutula myaka nu myaka kwicha bantu ku busanana. ² Nu lingo ta binashighwa kutulwa , kubuno babo bakwela,ndi bishila kwenga,banalenganya lingo ku bwaghi bwabo? ³ Tondo makengelo ma bwaghi meli gho mwaka nu mwaka kutingila ibyo bisansa; ⁴ Kubuno tabunakoshibwa buno mikalha sa nkambu na sa bilimba situche bwaghi. ⁵ Uchasula Kilishitu mu kwingila mu kisi, atendile: Ntwashimagha kisansa ali lukaso, tondo wampinde mubili ; ⁶ Ntwimilagha nkaso sa kutula nu bisansa kubushi bwa bwaghi. ⁷ Agho natendagha : lola, nashwa (mu kitabu cha ghondwa ine natendwa mo)buno nikite e Ghongo biwashima. ⁸ Kushila tanga kutenda ubo: Ntwimilagha nkaso nu bisansa bituche bwaghi(bikutulwagha kuyangana na mulembe), ⁹ Atendagha lingo: Lola nashwa nikite biwashima,ashimya kitangi buno imike kishinda. ¹⁰ Nti kutingila ubo bwashima u mutwasanana,kutingila lukaso lwa mubili wa Yesu Kilishitu limoyi umpanga. ¹¹ Nu nsakogha unsai akukita mulimo bindi binsayi nu akutula ibyo binsansa bimoyi,bitinakosha kutucha bwaghi, ¹² we, kushila kutucha kisansa elyo limoyi ikalile bindi binsayi kw'indume lya Ghongo, ¹³ mukulindila agho baghini baghe baghaluke kinantilo chaghe. ¹⁴ Kubuno, kutingila ulo lukaso lumoyi, ikishe mu busanana bindi binsayi babo basanana. ¹⁵ Ubibyo bikutubula Muusa Musogha nuwe ;kubuno,mu kushila kutenda: ¹⁶ Lola lununsano lunkukita ghamoyi nabo,kumbusa kwebyo bindi,bwatenda Mukota: Nkabika milembe sani mu mitima sabo, nu nkasitila mu mutima wabo,ubwatalikila; ¹⁷ Nu nshikakengela lingo bwaghi bwabo ali mabi mabo. ¹⁸ Nu gheli kushighililwa bwaghi, taghanaba lingo lukaso lwa kutucha bwaghi. ¹⁹ Agho lino bisakwitu, buno butwite kutingila mikilha sa Yesu,kwingila bwasibwasi mu kishiki cha sanana, ²⁰ kuyanga mwaaka walambya uwatuliminde munda na nshulu ukutenda buno mubili waghe, ²¹ nu buno twite Sankogha munene wimikilwe mu numba sa Ghongo, ²² tushighelele na mutima wa bulili, mu lukatisho lwisala,na mitima senga,nu mubili wogha masi mulenganzya mubi nu mubili wogha masi masongokelwa. ²³ Tuyangilile bubibu meghesha ma malelamilo mitu,buno olya watulaghile eli wa bulili. ²⁴ Tukatililane mu lutundo nu mikolo nsogha. ²⁵ Nu tatushighe musanganano witu anga bweli bango;twanane mu kulola buno bindi byeli bwighi. ²⁶ Ndi twakita bwaghi bwa butwashima nu tukumana bulili,takuli lingo kisansa cha kutucha bwaghi, ²⁷ tondo kulindila kwayibwa bubibu mu kaya ka kubanga bubibu ka kashicha batakwongwa Ghongo. ²⁸ Olya utayangile mulembe wa Musa nti akwa nteleshibwa lukogho,ku bateneneki babili ali basatu; ²⁹ minubo ki inene sitakashila sikeleshibwa ghoso ukata bulayi Mwana wa Ghongo,ukenegha mikilha sa lununsano sa mwenjagha,nu ukutuka Muusa wa Mpanga inene? ³⁰ Kubuno tukumana ghoso ukutenda:Ine nkuana nkukulukisha muntu mab'i maghe,ku neli u kweli indigho!Nu lingo:Mukota akaghya bantu baghe. ³¹ Bweli bwana ku kolokela mu maboko ma Ghongo. ³² Mukengele bindi bitangi mukushila kweleshibwa chengeshi,mwakitile ishibo linene mu minubo, ³³ kibe kimoi kwitwa nsoni mu mulungu nu kunuba,kingo kibe,kukomya lingo na bakitagha bubo. ³⁴ Bulili,mwakwilagha bakandwa lukogho,nu mwimilagha na mboghombogho kunaghwa binu,mukumana buno mwite binu bisogha bitakashila. ³⁵ Tamushighe kashi,malelamilo minu mabibu u mweli maligho minu manene. ³⁶ Kubuno mwemana kwikatilisha busogha,buno mu kushila kukita byashima Ghongo,mweleshibwe bi mwalaghwagha. ³⁷ Lingo bindi bikeke;olya wemana kushwa,ntakwindisha lingo. ³⁸ Nu olya wa bulili ku neli,ikala mu lukatisho,nu ndi itucha, mutima wani ta una muboghelaboghela. ³⁹ Beshwe, ta tuli mu babo bakwitucha buno bashimile,tondo mu babo bite lukatisho buno bonie mutima wabo.