¹ Buno lukatisho luli malelamilo ma bulili bikai bitukulindila,kulimbulilwa bibyo bitakumoneka ko . ² Mukuba nalo,bakungu batenenekelwagha busogha. ³ Nti kutingila lukatisho u mutukumana buno kisi cha bumbwagha kutingila kitondo cha Ghongo ,kubuno kikumonaka ko tachakitwagha na bikumoneka ko. ⁴ Nti kutingila lukatisho, Abeli atulagha Ghongo kinsansa kisogha chaghimba kicho cha Kaini;nti kutingila lo amanwagha wa bulili,Ghongo alingikagha eso nkaso;Nu nti kutingila lo,akutenda lingo anaba akwa. ⁵ Nti kutingila lukatisho Enoke atolilwe mw'ighulu,buno amonaghe ku lukwo, nu nta monekile ko lingo, kubuno Ghongo umutolagha mw'ighulu; buno,ghabagha nte tolwa,abulwagha buno aboghyaboghyagha Ghongo. ⁶ Buno utite lukatisho, ntanaboghyaboghya Ghongo;bushi bwemana olya weli bwighi na Ghongo akatishe buno Ghongo eli gho,nu ukuligha babo bakumulonda. ⁷ Nti kutingila lukatisho Noa wakengeshwagha na Ghongo ku bitondo bitemonekagha ko lingo,nu mu kukwa boba bwa kwongwilila busogha ,abasagha bwato bunene buno onie bantu ba numba saghe;nti kutingila lo aghyagha kisi ,abagha nene mwandu wa bulili ukweleshibwa kutingila lukatisho. ⁸ Nti kutingila lukatisho Bulaimu mu kumanwa kwaghe, imilagha nu kwenda mu kishiki chaneleshibwe kibe mwandu, nu endagha kwetekumana. ⁹ Nti kutingila lukatisho, endagha kwombulha mu kisi ch'indaghi anga musumba, kuyama mu hema ghamoyi na Isaka nu Yakobo,basangila elyo indaghi. ¹⁰ Kubuno abagha akulindila mwelo munene wobakwa busogha,ghoso wabagha mulenganya wa Ghongo nu w'inene Ghongo u mobaki. ¹¹ Nti kutingila lukatisho u Sala w'inene,kilo anaba mukungu,eleshibwagha kibuti,kubuno akatishagha mu bulili bwa olya wamweleshagha indaghi. ¹² Uchasula ku mulume umoyi, mukungu,kwatukagha kibuti kinene anga tumbalumbalu tweli mw'ighulu ,anga miseghe seli mu muse wa kitatenge sitanaghanswa. ¹³ Nti mu lukatisho u mwakwilinde babo bansayi, nu tabeleshibwa bikayi bi balaghwagha;tondo babimonelagha ko kulayi nu kubiboghelaboghela,mu kumana buno beli bagheni nu bashwile kutabanga mu kisi. ¹⁴ Babo bakutenda ubo bakulosha buno bakulonda kisi kimoyi. ¹⁵ Ndi banaghalukile nu kulola ku bi bashighagha,banakulukile ko. ¹⁶ Tondo lelo, bakushima kisi kisogha, u kutenda buno cha Ghongo. Uchasula Ghongo, ntite nsoni kumanwa Ghongo wabo, buno ababikinde kisi kinene nu kisogha. ¹⁷ Nti kutingila lukatisho Bulaimu atulagha Isaka,gha lingikwagha, nu atulagha mwana waghe wa ngomo,u weleshibwagha indaghi, ¹⁸ uwabulilwe: Mu Isaka mukakutukila kibuti . ¹⁹ Amanagha buno Ghongo ite maghala, ma kutucha bantu ku bakuyi,amumonagha ko lingo anga watuka ku bakuyi. ²⁰ Nti kutingila lukatisho Isaka akasanilagha Yakobo nu Esau,mu kulola ku bitondo bikashwa . ²¹ Nti kutingila lukatisho Yakobo ,mu kulembekela kukwa,akasanilagha umoyimoyi bana ba Yosefu.Nu akumbamilagha,mu kwikatilisha mu mushumbo waghe. ²² Nti kutingila lukatisho Yosefu mu kulembekela kukwa,akengeshagha kutuka kwa bana ba Isilaeli mu Misili, abakakishagha kubushi bwa makwa maghe. ²³ Nti kutingila lukatisho Musa, mu kubutwa kwaghe,abiswagha myeshi esatu na babuti baghe, kubuno balolagha buno mwana eli mbangilwa, nu tabakwagha boba lukatisho lwa mwami. ²⁴ Nti kutingila lukatisho Musa, mu kuba akula,ananagha kumanwa mwana wa mukinga wa Falao, ²⁵ ashimagha kunuba ghamoyi na bantu ba Ghongo kuhimba kuboghelaboghela bwaghi mu nkungu bindi bikeke, ²⁶ mu kulola nsoni sa Kilishitu anga butumba bunene kughimba matumba ma Misili,kubuno alolagha indigho lili kubusho. ²⁷ Nti kutingila lukatisho atukagha mu Misili mutakukwa boba mishibu sa mwami, kubuno imbikagha buno wimala busogha,anga ukumona ghoso utekumonekagha ko. ²⁸ Nti kutingila lukatisho, akitagha pasaka nu kusansila mikilha kubuno mwiti ntitubye ku nkulya sa ba Isilaeli. ²⁹ Nti kutingila lukatisho, basokagha kitatenge cha mikilha anga lusi lwa kama , tondo bantu ba Misili babo baghelekagha, kusoka bamelwagha na masi. ³⁰ Nti kutingila lukatisho mikolo inene sa Yeliko sendukagha,mu kushila kusitimba bindi mutubakamo. ³¹ Nti kutingila lukatisho Lahaba we luwawa ntakwile ghamoyi na ndwani kubuno asekelagha basoni busogha. ³² Nu nitende buni lingo? Kubuno inindile nkungu sa kutenda ku bya Kideoni, ku bya Balaka, ku bya Samusoni, ku bya Yefuta,ku bya Daudi,ku bya Samwele,ku bya balenganya, ³³ bo,kutingila lukatisho bakindile nkota, bendile mu bulili,beleshibwe indaghi,bashibile kanywa ka mbunga, ³⁴ bashimishe maghala ma kaya , bintikishe ku mwele ukutwa ,balamile nsambo sabo, babinde ndwani mu bita, batibitile ndwani sa bingo bilongo. ³⁵ Bakashi bakulukishwagha bakuyi babo, bango balekindwe mu mutula wa kaya, nu tabiminde kutuka mo, buno batuke busogha ku bakuyi; ³⁶ Bango biminde kusekwa nu kupundwa, miyololo nu kulekelwa mu kahombo; ³⁷ kusundwa makoyi,ku ketulwaketulwa anga mbao si kwatwa,ku kamwa, ba kwagha na mwele, bendile kuno nu kuko nu bashwalile nkwe sa mbuli nu nkwe sa mpene,ku kungulwa binsayi ,kunuba,kukitilwa mabi, ³⁸ bo basombwagha na kisi, kutalatala mu tulula nu mu mindiko,mu nkunda nu mishinga s'itete. ³⁹ Abo bansayi,mu lukatisho mu ba tenenekelwagha,tabeleshibwe bi balwaghagha, ⁴⁰ Ghongo,mu kutubikila bisogha,tabana sanana ndi beshwe tatwanubagha.