¹ Nu beshwe lino,kubuno twatimbwa na lubhu lunene lwa batenenekiki,tute mushigho insayi nu bwaghi bwatukunukila ta bubibu,nu twende lubilo ghamoyi na kwinkatilisha bubibu mu mulimo utweleshibwe, ² mu kwengelesha kuli Yesu,Mwami u nene lukatisho,we,mu kulola ku mboghombogho sa bikindwe ,anubagha ku musalaba,kwitwa nsoni,nu kwikala kw'indume kwa kishumbi cha bukota bwa Ghongo. ³ Mukengele bulili, ghoso wiminde kutingila mubili waghe kweka bughini bwa bisa bwaghi,buno munashwa ku kutwa,nu mutima kwinda maghala. ⁴ Tamukita bita nenshi kwika kukubula mikilha,mu kulwana na bwaghi. ⁵ Nu mwebelinde bitondo bimwanwagha anga bana:Mwana wani ubengaghe munubo wa Mukota,nu twinde maghala ndi akusungula; ⁶ Kubuno Mukota akunubya olya washima, nu akupunda babo bansayi bakumana bana baghe. ⁷ Mwimile munubo;Ghongo akubakata anga bana baghe;kubuno nayi uso mwana utakukalaulwa n'ise? ⁸ Tondo ndi tamukukalaulwa anga bansayi,kashi nti tamweli bana ba bulili ,mweli ba kumbugha. ⁹ Anga butwasughilwagha na batata ba mubili,nu twabongwagha, tanalibana kwongwilila ghoso Tata wa mitima buno tube na kalamo? ¹⁰ Batata batukalaghulagha mu bindi bikeke,anga bubalolagha busogha;tondo Ghongo akutukalaghula buno tube na myanya nsogha,kubuno tusangile ku busanana bwaghe. ¹¹ Buli bulili kukalaghulwa kunsai kukumoneka tanga anga lubabasho,nu ta mboghombogho,tondo mu bindi bweli kubusho bikubuta bitondo bya bulili. ¹² Munache maboko ninu matambile nu mashwe ninu moghokile, ¹³ nu mwende mu nsila sa lingimana,kubuno cha kite bulema kinabuka,tondo kimale busogha. ¹⁴ Mwikale na boolo ghamoyi na bansayi,nu busanana,nu muntu utite busanana ntakamona ku Mukota. ¹⁵ Mwalolagha busogha kubaghe muntu ukunana mpang'inene sa Ghongo,kubuno muti wa lubabasho unashwa kwasa nu kunubya bantu bengi; ¹⁶ buno kubaghe malimbya ali ghoso utakumana Ghongo anga Esau,kutingila indya aghushagha bukulu bwaghe. ¹⁷ Mukumana buno ,mu bindi bingi ,mu kulonda akasanilwe ananwagha, gha bulondagha na bitengetenge;kubuno mukuba inkuluka mo,ntakitindwe kena. ¹⁸ Tamwashighelinde bwighi na mwinduko unakatilwe ko,nu wabagha ukuya,ali lubhu ali bulimaswa,ali malingi ma masi, ¹⁹ ali kughombwa kwa ngunga,ali lwayo,buno babo bongwagha kulo,batendagha babulwaghe kingo kitondo, ²⁰ kubuno tabakoshishe linw'itenda: Sinaba nama sintubya ku uso mwinduko nti sasundwa makoyi . ²¹ Nw'icho kitondo chitishe boba,chasulagha Musa atenda:Nakwa boba nu kughilimila! ²² Tondo mwashighelinde bwighi na mwindiko wa Siona,mwelo munene wa Ghongo weli gho,Yelusalema wa mw'ighulu, nu ma elefu ma baghenshi, ²³ musanganano ba batangi batilwa mw'ighulu,Shushi Ghongo wa bansai ,mitima sa basanana babo bushililile, ²⁴ sa Yesu weli mukulumanya wa lungo lununsano ,nu sa mikilha sa kusansilwa sikutenda busogha kughimba seso sa Abeli. ²⁵ Mwindange buno muninda kwongwa ghoso u kutenda; buno ndi babo bananagha kwongwa ghoso wasansagha bitangalo bya kisi ta bonile, buni butun'ona beshwe ndi twenda bulayi na ghoso ukutenda mw'ighulu, ²⁶ we , ishuki lyaghe lyatenjagha kisi,nu we lelo esana indaghi:nu lingo limoyi nkatenja ta kisi cho k'inene ,tondo nw'ighulu. ²⁷ Ibyo bitondo:nu lingo limoyi,byalosha kughaluka kwa bikayi bya kutenjatenja,anga bukutinga mu bindi bimoyi,inga bitakutenga bibe gho . ²⁸ Uchasula,mukweleshibwa bukota butakutenga,tuloshe lukasanilo lwitu kweli Ghongo mu kumukumbamila bwatunganana, ²⁹ ghamoyi na busanana nu ghamoyi na kukwa boba,kubuno Ghongo witu eli kaya ka kushililisha binsayi.