¹ Bulili na Sankogha munene wasombolwa mukantighi na bantu,imikwa ku bushi bwa bantu ku nkashi sa Ghongo, buno atule nkaso nu bisansa kubushi bwa bwaghi. ² Anakwila lukogho ku babo batakumana ku bashiminde,kubuno nuwe asangila busoshu nabo. ³ Nu kutingila ubo busoshu,ukikusula atucha kinsansa kubushi bwa bwaghi bwaghe anga bwa babo bantu. ⁴ Nu takuli wampa u niyelesha uso mulimo,ndi ntamanilwe na Ghongo,anga bwabagha Haluni. ⁵ Nu Kilishitu ntiyeleshishe lukumbu lwa kuba Sankogha Munene,tondo alutuchagha ku whoso wamubulagha: Weli Mwana wani,nakubuta buno busi! ⁶ Anga bwatendwa kungo :Weli Sankogha munene bindi binsayi,anga lughiso lwa Melikisedeki. ⁷ We ,ghabagha echeli gho mu mubili, mu kutula ghamoi na nkugho nu ghamoi na bisoshi,masegho nu kwema bubibu kweli ghoso unemile kumutucha mu lukwo,nu mu kongwililwa kubushi bwa busanana bwaghe, ⁸ eyegheshagha,mukuba Mwana,ongwililagha nu kwikumbya kutingila bitondo byanubilagha. ⁹ Nu we,mukuba abikwa mu busanana,aghaluka nene lonio lwa milyalya ku babo bansayi bakongwa ishuki lyaghe, ¹⁰ Ghongo,mu kumwimika bwasibwasi Sankogha munene,kuyangana na lughiso lwa Melekisedeki. ¹¹ Twite bingi bya kutenda agho,nu bingo bitondo bibibu mu kwatula,kubuno tamukongwa ighilighili. ¹² Bulili,benywe,kalayi munabinde bakota, mwite lingo nkasa buno babegheshe, twabitondo tutangi twa Ghongo,mwite nabyo nkasa anga mabele ta buno anga indya lya naka. ¹³ Buno ,olya ucheli wa moma,ntite mulenganya wa kitondo cha bulili cha Ghongo,buno echeli mwana. ¹⁴ Tondo indya lyanaka lyeli lya bantu bakula,babo bakumana kwensananya bitondo kumana bibi nu bisogha.