¹ Ntukwe boba lino, kubuno indaghi lya kwika mu kishiki cha komwulila ko licheli lingo, t'omoi ku benywe aloleke buno akika kumbusa. ² Kubuno twasambalindwe uno musaghu musogha anga bo; tondo kitondo kisogha kibasambalindwe tachabakitinde kena, kubuno tachasangile lukatisho kweli babo bachongwagha ko. ³ Ku beshwe bakatishagha, twingila mu kishiki cha komwulilwa ko,anga bwatenda: Nkalumbila mu mushibu wani: Tabakika mu kishiki chani cha komwolilwa ko! Atenda lingo,bunaba nkashi saghe sashilile kulingila kubumbwa kwa kisi. ⁴ Buno atenda ghango ku kicho kindi cha mutubakamo :Nu Ghongo omulwagha kindi cha mutubakamo. ⁵ Nu ghano lingo: tabakika mu kishiki chani cha komwulilwa ko! ⁶ Kubuno,chabikindwe bamoyi kwika ko, nu ku babo beleshibwagha tanga indaghi,tabikile ko kubushi bwa kwinda kongwa ishuki lyaghe, ⁷ Ghongo abika lingo kingo kindi_buno busi_ mu kukengesha bwatendagha Daudi mu bindi byatingagha,anga bwatilwa tanga: Buno busi ,ndi mwongwa ishuki lyaghe,mukitaghe mitima sinu kuba mbibu. ⁸ Kubuno,ndi Yoshuwa abomushwagha, ntanatendile ubo ku kingo kindi. ⁹ Kweli lino kwomulwa mu sabato kwabikindwe bantu ba Ghongo. ¹⁰ Kubuno olya womushwa na Ghongo nti omulwa ku milimo saghe,anga Ghongo bwomulwagha ku saghe. ¹¹ Twikokomeshe lino komushwa nawe, kubuno muntu anashwa kulosha myanya sa kwinda kongwa ishuki lya Ghongo. ¹² Kubuno kitondo cha Ghongo kile gho nu cha naka, chatinga mwele u kutwa kuno nu kuno,kikwingila bubibu mu muntu,nu kubeghanya mutima nu muusa,ngihino nu bungongo,ki kumana milenganya nu byashima muntu. ¹³ Takweli chabumbilwe chabiswa mu miso maghe ,tondo kinsayi cheli bwasi, nu kinsayi kikumoneka ko mu miso ma ghoso utwemana kwikisha binsayi. ¹⁴ Nubo,ubo bu twite Nsakogha Munene watingile mw'ighulu, Yesu, Mwana wa Ghongo, tukokomeshe bubibu mu lukatisho lu tukughanula. ¹⁵ Buno tatwite Nsakogha munene uninda kutukasha mu busoshu bwitu;tondo, aghelekwagha anga beshwe mu binsayi nu we ntakitagha bwaghi. ¹⁶ Twishigheleshe lino ghamoyi na mutima wa kokomela bwighi na kishiki cha bukota cha mpanga inene, buno tweleshibwe lukogho nu mpanga inene,buno tukashwe mu nkasa situ.