¹ O Bagalatia,mwinda mulenganya! Nayi uwabaloghile,benywe aloshwagha mu miso minu anga olya windwagha ku musalaba? ² Lola tughu bu'nkushima nimame kutuka ku mweli:ndi kutingila mikolo sa milembe ukumweleshibwe Muusa ali kutingila megheshibwa ma lukatisho? ³ Mwinda bulili mulenganya?Mwalingilagha kutingila Muusa Musogha,mwise mwalonda mushile kutingila mubili? ⁴ Mwakutindwe tughu?Ndi bulili nti tughu tughu. ⁵ Ulya ukubelesha Muusa,nu ukukita bitangalo gha mweli, akusikita kutingila mikolo sa mulembe,ali kutingila megheshibwa ma lukatisho? ⁶ Anga Bulaimu bwakatishagha Ghongo,nu kubo aghanswagha wasanana, ⁷ mumanilile buno babo bite lukatisho u bana ba Bulaimu. ⁸ Lingo,kitondo cha Ghongo chakengesha buno Ghongo akamana ba bulili ku batakatisha kutingila lukatisho,nu alingagha kubula Bulaimu ghoso musaghu musogha: Kutingila uwe bilongo binsayi bikakasanilwa, ⁹ kubuno babo bakatisha bakasanilwa ghamoi na Bulaimu mukatisha. ¹⁰ Kubuno bansayi binkatilisha mu mikolo sa mulembe bashulilwa;tondo bwatililwe:Ashulilwa ghoso utakuyangana nu kukita bibyo binsayi byatililwe mu Kitabo cha mulembe. ¹¹ Nu taku wampa wasanana ku miso ma Ghongo kutingila mulembe,ubo bweli bulili,buno bwatendwa: Wasanana akaba gho kutingila lukatisho. ¹² Tondo ,mulembe ta ku lukatisho ;tondo watenda:Olya ukakita bibyo bitondo akaba gho kutingila ibyo bitondo. ¹³ Kilishitu atutukishe mu bukobe bwa mulembe,beshwe uchasulagha imbika mukobe._Buno bwatililwe:Ashulilwa whoso wakamilwagha ku muti,_ ¹⁴ Buno lukasanilo lwa Bulaimu lubelelele ku batakatisha mu Yesu Kilishitu,buno tusekele kutingila lukatisho Muusa utwalaghaghwa. ¹⁵ Bisakwitu(nkutenda anga bantu),byabikwa na Ghongo mu muntu,anaba muntu anabikita, muntu ntanabishililisha,nu muntu ntanabitalikila ko. ¹⁶ Tondo,indaghi lyalaghwagha Bulaimu nu ku kibuti chaghe kinsai .Tabwatendwagha;nu ku bibuti byaghe,anga bingi,tondo anga kimoyi;nu ku kibuti chobe,u kutenda Kilishitu. ¹⁷ Lola binongwa ko: Kitondo chaloshishwe bwasi mwakalayi nawe Ghongo,takina shimishwa, nu u bubo kw'indaghi lyabinde anga tughutughu,kutingila mulembe wabagha myaka maghana manai nu makumi masatu matinga kalayi. ¹⁸ Tondo ndi mwandu watukagha mu mulembe,tauna tukile lingo mw'indaghi;tondo ,Ghongo, kutingila indaghi lyaghe u mweleshagha Bulaimu lukaso lwa mpanga 'inene. ¹⁹ Ku buni lingo mulembe? Mu kuu nanta weleshibwagha lingo,kwikila kibuti cheleshibwe indaghi kiloleke ko; wasambalaghwa bwasi bwasi na Baghenshi kutingila mukulumanya umoyi. ²⁰ Nu,mukulumanya nta mukulumanya wa umoyi,tondo Ghongo eli w'umoyi. ²¹ Mulembe wasombana n' indaghi lya Kalagha?T'obo!Ndi kunabinde mulembe umoyi wakwesana kalamo,bulili bunatukinde mu mulembe. ²² Tondo,Kitondo cha Ghongo cha kandile binsayi mu bwaghi,buno chalaghwagha kweleshibwa kutingila lukatisho mu Yesu Kilishitu ku babo bakatisha. ²³ Ghabagha lukatisho taluba,twakandwagha na mulembe,mu kulindila lukatisho lwamonekile ko kumbusa. ²⁴ Ubo mulembe wabagha anga mweghesha buno atwiche kweli Kilishitu,kubuno tusanane kutingila lukatisho. ²⁵ Gha binde lukatisho lwika,tatweli lingo n'oso mweghesha. ²⁶ Kubuno mweli benywe bansayi bana ba Ghongo kutingila lukatisho mu Yesu Kilishitu; ²⁷ benywe bansayi,bapatishwagha mu Kilishitu,mwashwalile Kilishitu. ²⁸ Takuli lingo muyuda ali mugiliki,takuli lingo mukobe nu washighililwa ,takuli lingo mulume ali mukashi;kubuno benywe bansayi mweli muntu umoyi mu Yesu Kilishitu. ²⁹ Nu ndi mweli ba Kilishitu,mweli kashi kibuti cha Bulaimu,bisa mwandu kuyangana n'indaghi.