¹ Nu nene mwandu anaba echeli mwana,nti echeli anga mukobe,kilo anaba u nene binsayi; ² Tondo eli kunsi kwa balangi nu bango bakulu,kwikila bindi byakimikwa n'ise. ³ Nu beshwe ubo nubo, gha twabagha bana twabagha mu bukobe bwa myanya sa kisi ; ⁴ Tondo gha binde bindi bya kuka Ghongo asingagha Mwana waghe wabutwagha na mukashi kunsi kwa mulembe, ⁵ buno akandule babo babagha mu mulembe,buno tughalulwe bana. ⁶ Nubo bumweli bana,Kalagha asingile mu mitima situ Muusa wa Mwana waghe, olya ukutenda: Aba!Tata! ⁷ Nubo ntweli lingo mukobe,tondo mwana,nu ndi weli mwana,weli nuwe nene mwandu kutingila mpanga inene sa Ghongo. ⁸ Mwakalayi mukwinda kumana Ghongo,mwakitinde byeko milimo bitanakitindwe eso milimo; ⁹ tondo mu bino bindi mwamana Ghongo,ali bumwamanwa nawe,buni bu mwakulukila eso myanya sa tughutughu si mukulonda mukatilile lingo? ¹⁰ Mukumanilila bindi,myeshi, nu myaka ! ¹¹ Nakwa boba buno nkubakitila milimo wa tughu. ¹² Mube ang'ine,tondo nwine neli anga benywe.Bisakwitu,nabalilila ubo. ¹³ Tamwankitinde bubi.Mukumana buno mu busoshu bwa mubili u munabasambalinde lya litangi musaghu musogha . ¹⁴ Nu mu kulingikwa na mubili wani,ta mwandoshishe mweneghana, ali kunana ; tondo mwansekinde anga mughenshi wa Ghongo,anga Yesu Kilishitu. ¹⁵ Ki chalosha ighuma linu? Kubuno ndi ubo bunakoshibwe,munintomolile miso minu buno mumpe mo. ¹⁶ Nabinde mughini winu mu kubabula bulili? ¹⁷ Kubakakanila ta kwa bulili,tondo bakulonda kubatucha ku beshwe,buno mubakakanile nubo. ¹⁸ Bwaswagha kukakanila bisogha,nu bindi binsayi,tabuno ghakuba neli ghamoyi na benywe. ¹⁹ Bana bani, lubabasho lwimbuta lunite kwinu,kwikila Kilishitu amoneke ko munda ninu, ²⁰ nkushima nibe ghamoyi na benywe,nu kughalula mutendeshi,kubushi nkughanaghana kubushi bwinu. ²¹ Mumbule,benywe mukushima mube kunsi kwa mulembe,ta mukongwa nenshi mulembe? ²² Kubuno bwatililwe buno Bulaimu abagha na bana babili,umoyi wa mukashi wa bukobe n'ungo wa mukashi washighililwa. ²³ Tondo ghoso wa mukobe abutwagha kuyangana na mubili nu ghoso wa mukashi washighililwa abutwagha kuyangana n'indaghi. ²⁴ Ibyo bitondo bili kananga;,kubuno babo bakashi babili beli kununsana ngendw'imbili.Umoyi u mwindiko wa Sinai, abutagha mu bukobe, u Agali._ ²⁵ Kubuno Agali u mwindiko wa Sinai ku Alabia,_nu uwasusana na Yelusalema sa bino bindi,weli mu bukobe ghamoyi na bana baghe. ²⁶ Tondo Yelusalema wa kw'ighulu ashighililwa ,u mama witu; ²⁷ Kubuno byatililwe: Boghabogha , mughumba, utakubuta!Seka nu lekela mulenge uwe utongwile ku lubaba lwa kubuta! Kubuno bana ba mughilwa bakaba bengi kughimba ba ghoso wasongilwe. ²⁸ Kuwe bisakwitu,anga Isaka,mweli bana b'indaghi; ²⁹ nubo ghoso wabutwagha kuyangana na mubili,anubyagha ghoso wa butwagha ku yangana na Muusa , u bucheli ubo. ³⁰ Tondo buni bwatenda Kitondo cha Ghongo?Tibita mukobe nu mwana waghe, kubuno mwana wa mukobe ntakasangila mwandu ghamoyi na mwana wa mukashi washighililwa. ³¹ Uchasula,bisakwitu, tatweli bana ba mukobe,tondo ba mukashi washighililwa.