¹ Sankogha munene atendagha :U bweli bitondo ubo? ² Setefano aakulagha:Bisakwitu nu batata,mwongwilile! Ghongo wa lukumbu indoshagha kweli tata Bulaimu,gha bagha ku Mesopotamia,nti ntombulha ku Halani;nu inga amubula: ³ Shigha kisi chobe nu mubuto wobe,nu nda mu kisi kinkakulosha. ⁴ Ago atukagha mu kisi cha Bakaladeya,nu k'ombulha Kalani.Kumbusa kwa lukwo lw'ise,Ghongo amutinjagha mu kino kisi kimweli mo; ⁵ ntamweleshagha kakai kampa mu kino kisi ,ali gha kwikala,tondo amulaghagha buno akamwelesha gha kikala,nu kibuti chaghe kumbusa kwaghe,abagha ntite mwana. ⁶ Ghongo atendagha ubo:Kibuti chaghe kik'ombulha mu kisi cha basumba;bakabakita bakobe nu kubanubya mu myaka maghana manayi. ⁷ Tondo Ghongo ababulagha:Kilongo ki kabakita bakobe,ine ka ki besha .Kushila agho,bakenda nu bakankitila mulimo mu kino kishiki . ⁸ Nu Ghongo akasagha Bulaimu indaghi lya kumonya bwali bwa munganga,nu Bulahimu, gha butagha Isaka,amumonyishe bwali bwa munganga,ku bindi munani bwa kubutwa,Isaka abutagha nu kumonya bwali bwa munganga Yakobo,nu Yakobo bikulukulu ikumi na babili. ⁹ Bikulukulu ,mu kuyongwa Yosefu,ba mughushagha buno bende nawe ku Misili. ¹⁰ Tondo Ghongo abagha nawe,nu kumutucha mu nsunsu insayi;amweleshagha mulenganya musogha nu abagha na mpanga'inene kuli Falao,mwami wa Misili,u wamubikagha mukulu wa kisi cha Misili nu wa numba saghe insayi. ¹¹ Kwabagha nsala mu kisi kinsayi cha Misili,nu cha Kanana.Munubo munene, nu batata ta bamonagha bya kulya. ¹² Yakobo ongwagha buno ngano seli ku Misili, nu asingagha ko tanga batata. ¹³ Nu mu lya ngendw'imbili,Yosefu amanililwagha na bisakwabo ,nu Falao amanagha kilongo chaghe. ¹⁴ Agho Yosefu asingagha bantu kutola ise Yakobo nu bisakwabo, bansayi bantu makumi mutubakamo na batano. ¹⁵ Yakobo akumbilagha ku Misili u kwa kwilagha nu batata; ¹⁶ nu bekwagha ku Sikemu,nu kukundwa mu nsinda saghulagha Bulaimu ,ku bikulo bingi,ku bana ba Hemolo ise wa Sekemu. ¹⁷ Gha binde bindi b'indaghi byeleshagha Ghongo ku Bulaimu bise bwighibwighi,bantu babutwagha nu kuba bengi mu Misili, ¹⁸ Kwikagha ungo mwami utamanagha Yosefu. ¹⁹ Ghoso mwami,mu kusomba kilongo kitu,anubyagha batata nu kwelesha batata bite bana babo. ²⁰ Mwebyo bindi,abutwagha Musa,alolekagha musogha ku miso ma Ghongo.Alelwagha myeshi esatu mu numba s'ise; Nu mukulonda kumwita,mukinga wa Falao amutolagha,nu kumukusha anga mwana waghe. ²² Musa egheshwagha mu bulenganya bunsai bwa ba Misili,nu abagha wanaka mu matenda nu mu mikolo. ²³ Gha bagha na myaka makumi manai,mulenganya wamwikilagha wa kutabangila bisakwabo,bana ba Isilaeli. ²⁴ Alolagha ku umoi ukupundwa,nu mwa mukumukasha,itagha uso mu misili. ²⁵ Alenganyagha buno kutingila we bisakwabo bamane buno Ghongo akabatucha mu minubo;tondo bisakwabo ta bamanagha. ²⁶ Gha chagha busi,asangagha babili bakulwana,nu 'inga abanania,nu kubabula:Mweli mubuto umoyi,ki kimukwitanila? ²⁷ Tondo olya wemagha munabo maghala,amutundulagha nu kumubula:Nayi wakubikagha ube mwami nu shushi witu? ²⁸ Ukulonda unite anga buwitaile ghoso mu Misili? ²⁹ Mwecho kitondo,Musa atinagha,nu kwenda kombulha mu kisi cha Madiani,u kwabutilagha bana babili. ³⁰ Kumbusa kwa myaka makumi manayi,mughenshi umoi amupamukilagha mu kalula ka mwindiko wa Sinai, mu imbunda lyabagha likuya. ³¹ Mu kulola ku bubo,Musa aghanaghanagha ;nu mu kushighelela alole,ongwagha kw'ishuki lya Mukota ukutenda nawe: Ine Ghongo wa baso,Ghongo wa Bulaimu,wa Isaka nu Yakobo.Nu Musa ,mu kughilimila ntakoshagha kulola lingo. ³³ Mukota amubulagha: Onola bilato byobe, buno kubuno kishiki ki weli mo cheli kishiki cha sanana. ³⁴ Nalolile nsusu sa bantu bani beli ku Misili,nongwile indilo lyabo,nu nashwa ku bakandula.Lola, nda,nakusinge ku Misili. ³⁵ Ghoso u bananagha mu kumubula: Nai wakubikile mwami nu shushi?U ghoso wasingwagha na Ghongo abe anga mwami nu anga mukandushi kutingila molulo wa mughenshi wa mupamukilagha mw'imbunda l'ikuya. ³⁶ U ghoso wabatuchagha mu Misili mu kukita bighanaghana nu bitangalo mu kisi cha Misili bwighi na kitatenge cha mikila,nu mu kalula, mu myaka makumi manai. ³⁷ U ghoso Musa abulagha bana BaIsilaeli :Ghongo akatucha mu benywe mulenganya anga ine. ³⁸ U ghoso,mu musanganano mu kalula,abagha na mughenshi watendagha nawe,ku mwindiko wa Sinai ghamoyi na ba tata ,bamweleshagha mibiko buno atweleshe so. ³⁹ Batata ta bashimagha kumwongwilila,abatibitagha,nu baghalulagha mitima sabo ku Misili, ⁴⁰ mu kubula Aluni: Tukitile byeko byende ghamoyi na beshwe;kubuno Musa watutuchagha mu kisi cha Misili,ta tukumana bwa binde. ⁴¹ Nu,mwebyo bindi,babumbagha chana cha nkambu ki batulilagha kisansa,nu ba boghaboghagha na mikolo sa maboko . ⁴² Agho,Ghongo abashighagha,nu kubesana belele ndwani s'ighulu,anga bwatilwagha mu kitabo cha balenganya: Mwantulagha bilunda nu binsasa, mu mwaka makumi manayi mwa mu kalula, numba s'Isilaeli? ⁴³ Mwekagha kambala ka Moloko nu kambalumbalu ka cheko Lamfani,bilimelime bimwakitagha buno mu byele!Nu ine nkabeka kulayi na Babiloni. ⁴⁴ Batata babagha na Kasumilo ka buteneneki,anga bwa kakishwagha Musa okobake anga bwa kalolagha ko. ⁴⁵ Nu batata,gha beleshwagha ko,bakabikagha ku maboko ma Yoshua mu kisi ki kalwagha ko na bilongo byatibitwagha na Ghongo mu miso mabo nu ikalagha ko kwikila bindi bya Daudi. ⁴⁶ Daudi abagha na mpang' inene kweli Ghongo,nu aseghagha kobaka numba sa Ghongo wa Yakobo. ⁴⁷ Nu Solomono u wamobakilagha numba. ⁴⁸ Tondo Ghongo wa mw'ighulu nta kwikalagha mu numba sobakwa na kuboko kwa muntu,anga bwatenda mulenganya: ⁴⁹ Ighulu u kishumbi chani,nu kisi u kinantilo chani.Mukota atenda:Numba ki u si mukanobakila?Nu kuni kweli kishiki cha komulila ko? ⁵⁰ Ta kuboko kwani u kwakitagha bino binsayi? ⁵¹ Bantu ba makoshi mabibu,ba bite mitima mbibu nu matuyi mashibwa !Bindi binsayi mu kwengukana na Muusa Musogha.Bwabagha baso ,u bu mweli nu benywe. ⁵² Nayi ku balenganya utitwagha na baso ?Bitagha tanga bansai basansagha musaghu wa kwika kwa Wa sanana,nu benywe mwabesanile,nu mwabinde biiti babo, ⁵³ benywe mweleshibwagha mulembe kutingila nkakisho sa baghenshi,nu tamwabikile so mu mitima! ⁵⁴ Mu kwongwa kwebyo bitondo,bashibukagha bubibu mu mitima ,nu bamukalilagha mino. ⁵⁵ Tondo Setefano ,wisala Muusa Musogha,nu mu kwengelesha kw'ighulu,alolagha ku lukumbu lwa Ghongo nu Yesu imalile kw'indume lya Ghongo. Nu ingatenda: Lola,namona ighulu l'ighuka,nu Mwana wa muntu imalile kw'indume lya Ghongo. ⁵⁷ Bansayi bakughagha bubibu,mu kwishiba matuyi,bamulengela bansayi, ⁵⁸ bamubulutilagha kushinda musumba,bamwitagha na makoyi.Bateneneki babikagha nshulu sabo ku manshinshi ma musikila umoyi ukumanwa Saulo. ⁵⁹ Nu bitagha Setefano na makoyi wa bagha ukusegha nu kutenda:Mukota Yesu,katilila mutima wani ! ⁶⁰ Agho, mu kukoma mashwe,atendagha bubibu :Mukota,ntubaghansile ubo bwaghi ! Nu ,kushila kutenda ibyo bitondo amesagha mutima.