¹ Mwebyo bindi, mughanso wa bagheshibwa wabagha mwingi,Bagiliki bashibukilagha Babulania,kubuno basumbakashi babo bebelelwagha mwa mukubeghanya bikayi bya busi na busi. ² Abo ikumi na babili bamanagha begheshibwa bengi,nu kubabula: Ta bwaswagha tushighe kitondo cha Ghongo mu kubeghanya malya. ³ Uchasula,bisakwitu,tusombole ku benywe bantu mutubakamo ,ba bite buteneneki busogha,bisalilana na Muusa Musogha nu mulenganya musogha, bakite ghoso mulimo. ⁴ Nu beshwe, twakatilila masegho nu kusansa kitondo cha Ghongo. ⁵ Musanganano unsayi wimilagha ghoso mulenganya .Basombolagha,Setefano,muntu wisalilana na lukatisho nu Muusa Musogha,Filipo,Polokolo,Nikanola,Timoni,Palamenasi,nu Nikola ,mukatisha wa ku Antiokia. ⁶ Babaloshagha kweli ntumwa,nu mu kushila kusegha,ba babikilagha maboko. ⁷ Kitondo cha Ghongo kikagha kulayi, mughanso wa begheshibwa wabagha mwingi mu Yelusalema,nu kikembe kinene cha Basankogha kimilagha lukatisho. ⁸ Setefano,wisalilanagha na mpang'inene nu bwangato,akitagha bighanaghana nu bitangalo bingi mu bantu. ⁹ Bantu bamoyi ba Sinakoki bakubulwa buno beme,ba ku Kulene nu kuko ku Lekisandele,ghamoyi na Bayuda ba ku Silisia,nu ku Asia,bendagha myango nawe; ¹⁰ tondo ta banamukoshishe ku mulenganya nu ku Muusa wa kumutendya. ¹¹ Agho balhutagha bantu batende :Twa mongwagha akutenda bitondo bya kwenegha Musa nu Ghongo. ¹² Ba kusamanyagha bantu,bakungu,nu Basanshi,nubamulengelagha,bamukatagha,nu bendagha nawe ku lusu lwa matenda. ¹³ Ba mutalikilagha buteneneki bwa bwisa,kutenda : Muntu ghono nta kushigha kutenda bitondo bibi ku numba sa kukumbamila nu ku milembe; ¹⁴ buno twamongwile akutenda buno,Yesu wa Nasaleti,akendula numba sa kukumbamila, akaghalula ntungo sa tushighilagha Musa. ¹⁵ Babo bansayi babagha mu lusu lwa matenda bengeleshagha Setefano bubibu,nu malanga maghe mabaghalukilagha anga ma mughenshi.