¹ Tondo mulume umoyi ukumanwa Anania,ghamoi na Safira mughole waghe,aghushagha kikayi chaghe, ² nu imbikilagha kibe ku bikulo,inga mughole waghe amana;agho ekagha byashighalagha ,nu kubicha ku maboko ma ntumwa. ³ Petelo amubulagha: Ananiya,buni bwisasha Kahinga mutima wobe,buno utende kweli Muusa Musogha,nu w'imbikila kibe ku bikulo b'iswa? ⁴ Ndi ta linaghushibwe,ta linashighalile lyobe? Nu gha lyaba lyaghushibwa,bikulo byalyo tabyeli ku maboko mobe? Buni bu wabika mulenganya anga ghoso mu mutima wobe?Ta bantu u bawengelinde,tondo Ghongo. ⁵ Anania,mu kwongwa kwibyo bitondo,awagha nu kukwa.Boba bunene bwakatagha bansayi bongwagha kubo. ⁶ Basikila, bimalukagha,bamughondagha mu nshulu,bamwekagha nu ku mukunda. ⁷ Kwatinga anga s'isatu,mugole waghe ingilagha ntakumana byatingile. ⁸ Petelo amubulagha:Mbule ,bino u bikulo binsai byaghushibwe ily'iswa? Amwakulagha,naki,u binsayi ibyo. ⁹ Agho Petelo amubulagha: Buni bumwakalile lwango mwengelele Muusa wa Mukota?Lola,babendagha kukunda munachobe beli gha kitiko;nuwe bakukweka. ¹⁰ Mwako kaluma, awagha mu manshinshi ma ntumwa,nu kukwa.Basikila mu kukuluka bamusangagha akwile;bamwekagha nu kumukunda bwighi na munachaghe. ¹¹ Musangano nu bansayi bongwagha ku ghoso musaghu,bwakatwagha na boba bunene. ¹² Bitangalo bingi nu bighanaghana byakitwagha na ntumwa gha sambana bantu.Bikalagha bansai gha mwingilo wa lusu lwa Solomono, ¹³ nu taku wampa ku bango waghelekagha kwikala nabo;tondo bantu ba batatagha bubibu. ¹⁴ Ighanso lya babo bakatishagha ku Mukota ,balume nu bakashi, lyabagha lingi ; ¹⁵ buno batuchagha basambi mu mitobo,nu kubeka ku mighu nu ngwaya,buno ghatinge Petelo,kilimelime chaghe kilamye bamoyi kubo. ¹⁶ Bantu bengi nubo batukagha mu misumba sa bwighibwighi na Yelusalema,bekile basambi nu babite basumbu;nu bansayi balamagha. ¹⁷ Agho Sankogha munene nu bansayi babagha ghamoyi nawe,kikembe cha Basadukayo,bimalukagha ,mu kuba na lughi, ¹⁸ bakatagha ntumwa nu kubalekela mu kahombo ka bantu bansayi. ¹⁹ Tondo mughenshi wa Mukota, ighulagha mu kindi lumbi lwa kahombo,ku bakukula,nu kubabula: ²⁰ Mwende nu mwikale mu numba sa kukumbamila, nu musambalile bantu bitondo bya kalamo kano. ²¹ Mukongwa ubo,bingilagha mu nindunindu mu numba sa kukumbamila,bikalagha bakweghesha.Mu kwika,Sankogha munene nu bansayi babagha ghamoyi nawe,akulumanyagha lusu lwa matenda nu bakungu bansayi ba bana ba Isilaeli,bendagha kutola ntumwa mu kahombo. ²² Ntumwa mu kwika kwabo,ta babasangagha mu kahombo.Bakulukagha nu kusambalila binsayi bi bamonagha ko, ²³ mu kutenda: Twasanga kahombo kighalilwe busogha,nu balangi beli gha kitiko tondo, mu kushila kw'ighula,tatwasangile muntu munda. ²⁴ Mu kushila kongwa kwibyo bitondo,mulangi wa numba sa kukumbamila nu Bansakogha banene bindagha bya kulenganya ku ntumwa nu ku lil'itenda. ²⁵ Muntu umoyi ashwagha kubabula:Lola,bantu bamwalekelagha mu kahombo beli mu numba sa kukumbamila nu bakweghesha bantu. ²⁶ Agho mulangi endagha ghamoyi na ntumwa,nu abekagha bukebuke,kubuno bakwagha boba buno anasundwa makoyi na bantu. ²⁷ Gha babichagha mu lusu lwa matenda, nsakogha munene ababushagha mu bino bitondo : ²⁸ Ta twabananyagha busogha busogha kweghesha mwel'ishina?Nu Lola mwisasha Yelusalema na meghesha minu, nu mukushima mutweche mikilha sa ghoso muntu ! ²⁹ Petelo nu ntumwa baakulagha:Bweli busogha kongwilila Ghongo kutinga kwongwilila bantu. ³⁰ Ghongo wa batata atukishe Yesu ku bakuyi,u mwitagha ,mu ku mukamila ku muti. ³¹ Ghongo amumaluchagha na kuboko kwaghe kw'indume anga Mwami nu Mukota,buno eleshe Isilaeli kw'insungula nu kushililila kwa bwaghi. ³² Beshwe bateneneki ba bibyo bitondo, ghamoi na Muusa Musogha,weleshibwagha na Ghongo ku babo bakumwongwilila. ³³ Mu kushibuka bubibu nebyo bitondo,balondagha ku bitya. ³⁴ Tondo,mufalisayo umoyi ,u kumanawa Gamalieli,ngatu wa mubiko,nu wabagha ashimwa bubibu na bantu imalukagha mu lusu lwa matenda,nu kukakisha bakukule ntumwa. ³⁵ Agho ababulagha :Ba Isilaeli,mulole busogha ku bi mukulonda kukitila bano bantu. ³⁶ Buno,takutinga bindi twalola ku Teuda wakitagha bingi,nu kwimbulutila bantu anga maghana manayi;bamwitile,nu bansayi bamuyangagha basandabanile nu kushililishwa. ³⁷ Kumbusa kwaghe, kwashwagha Yuda wa Galilaya mu bindi bya kughansa bantu;alhutagha bantu bengi kweli;akwagha nuwe,nu bansayi bamuyangagha basandabanile. ³⁸ Nu lelo, nababula muyangane na bano bantu,mubashighe bende.Ndi bino bibakita byatuka ku bantu,binkinshilikila; ³⁹ tondo ndi byatuka kwa Ghongo,ta munabishililisha.Munimbulhutila bita na Ghongo. ⁴⁰ Bimilagha mulenganya waghe. Nu mukuba bamana ntumwa,babapundagha na tuti,ba bananyagha kweghesha lingo mw'ishina lya Yesu,nu ba bashighililagha. ⁴¹ Ntumwa satukagha mu lusu lwa matenda,bisala na mboghimboghi buno bapundwa kw'ishina lya Yesu. ⁴² Nu bindi binsayi,mwa munumba sa kumbamila,nu mu mashumba,tabashighagha kweghesha,nu kusansa Musaghu Musogha wa Yesu- Kilishitu.