¹ Petelo nu Yoani babagha becheli batenda na bantu,bikagha Bansakogha,nu mulangi wa numba sa kukumbamila nu Basadukayo, ² batashimagha bya bagha bikwegheshwa bantu buno Yesu atukagha ku bakubi . ³ Babakatagha ,nu kubalekela mu kahombo kwikila munindu;kubuno bwabagha ise igholigholo. ⁴ Tondo,bengi ku ba bongwagha kitondo bakatishagha nu ighanso lya bantu likagha anga ku elefu itano. ⁵ Mu nindunindu, bakulu ba bantu ,bakungu nu basanshi,bakulumanagha ku Yelusalema, ⁶ ghamoyi na Ana,Sankogha munene,Kayafa,Yoani,Likisandele nu bansayi babagha ba lughiso lwa Basankogha banene. ⁷ Babikagha Petelo nu Yoani munkatighi nabo,nu kubabusha:Ku bwangato ki,ali kw'ishina lya nayi ukumwakitila ibyo? ⁸ Agho Petelo,wisalagha na Muusa Musogha,ababulagha :Bami ,nu bakungu ba Isilaeli, ⁹ mwatubusha buno busi ku busogha butwakitila musambi,buno tutende buni bwalamile, ¹⁰ mumane benywe bansayi,nu bantu ba Isilaeli nubo bamane! Kutingila ishina lya Yesu Kilishitu wa Nasaleti,u mwitagha ku musalaba,nu watuchwagha na Ghongo ku bakuyi,ku we uchasula ghoso muntu alama. ¹¹ Yesu u ikoyi lyatebwile na benywe bobaki,u limashishe numba. ¹² Taku lonio mu ungo muntu;buno ghansi takweli lingo'ishina lyeleshishwe bantu, buno kutingila lyo bone. ¹³ Gha balolagha mpumba sa Petelo nu Yoani,baghanaghanagha,kumana buno beli bantu ba takumana kena;nu ba bamanililagha buno babagha ghamoyi na Yesu. ¹⁴ Tondo mu kulola ku ghoso muntu walamagha eli bwighi nabo,bindagha bya kutenda. ¹⁵ Babakakishagha batuke mu lusu lwa matenda,bakalagha lwango gha basambana,mu kutenda: Tukite ki na bano bantu? ¹⁶ Kubuno bantu bansayi ba Yelusalema balolile ku kitangalo ki bakitile ,nu tatuna tuna. ¹⁷ Tondo,kino bitondo ta kilumbe mu bantu,tubananye bubibu buno tabatende lingo na muntu kwelyo ishina . ¹⁸ Nu mu kubamana, ba bananyagha bubibu kutenda nu kweghesha mw'ishina lya Yesu. ¹⁹ Petelo nu Yoani babakulagha:Mughaye ndi busogha,kuli Ghongo,kubongwilila benywe ali kongwilila Ghongo; ²⁰ Buno ta tuninda kutenda ku bitwalolagha ko nu bitongwagha ko. ²¹ Babasughila lingo bubibu,nu kubashighilila,mu kwinda bwa bakitaghe kubuno bantu bansayi babagha bakughanula Ghongo ku byatingile. ²² Buno ghoso muntu walamagha mu kitangalo abagha na myaka satinga makumi manayi. ²³ Gha ba bamekulagha,bendagha ku bisakwabo,nu kusambalila bya babulile bisankogha banene nu bakungu. ²⁴ Mu kushila kubongwilila,bansayi baghanulagha Ghongo nu kutenda: Mukota,uwe u wakitagha ighulu,kisi,kitatenge,nu binsayi byeli mo, ²⁵ uwe watendagha kutingila Muusa Musogha ku kanywa ka tata witu,mukiti wobe Daudi: Buni ulo lwayo mu babilongo,nu mulenganya wa tughutughu gha sambana bantu? ²⁶ Bami ba kisi basoloboka,nu bakota bashingila Mukota nu olya u wabongishe mwambo . ²⁷ Bulili, mukiti wobe Yesu,uwabonjagha mwambo,u wendelwagha lwango na Helode nu Ponso Pilato mu ughuno musumba,ghamoyi na bilongo nu bantu ba Isilaeli, ²⁸ buno bakite bi walongomanyagha kalayi. ²⁹ Nu lelo, Mukota,Lola bu twayungwayungwa nabo, nu elesha bakiti bobe bwangato bwa kughesha kitondo chobe na bulili bunsayi, ³⁰ mu kubabikila kuboko,buno balamye nsambo,bakite bitangalo nu bighanaghana kw'ishina lya mukiti wobe Yesu Wasanana. ³¹ Gha bashilagha kusegha,kishiki ki babagha bikalile mo,cha tengagha bubibu; bi salilanagha bansayi na Muusa Musogha,nu begheshagha kitondo cha Ghongo na bulili bunsayi. ³² Bantu ba bakatishagha,babagha na mutima umoyi nu mulenganya umoyi.Taku wampa watendagha buno bya bite byeli byaghe w'inene,tondo binsayi byabagha byabo bo bansayi. ³³ Ntumwa satenenekagha bubibu kutuka kwa Yesu ku bakuyi.Nu bansayi babagha na mpanga'inene. ³⁴ Buno kubo takwabagha mukene:Ba babagha na maswa ali mashumba baghushagha mo, ³⁵ nu bichagha bikulo ku maboko ma ntumwa; nu byabeghanishibwagha bansayi kuyangana na nkasa so moyi moyi. ³⁶ Yosefu, wamanaghwa na ntumwa buno u Balanaba,u kutenda buno mwana wa bubobelesho,mulawi wa ku Kipulo, ³⁷ aghushagha iswa lyaghe,ashwagha na bikulo, nu kubicha ku maboko ma ntumwa.