¹ Petelo nu Yoani bendagha ghamoyi ku numba sa kukumbamila,mu nkungu sa masegho:Sabagha sa mwenda. ² Kwabagha kasokoluma kamoyi tukila kubutwa,wendagha wekwa nu kubikwa bindi binsayi gha mwingilo wa numba sa ku kukumbamila sa managhwa musogha,eme lukaso ku babo bakw'ingila mu numba sa kukumbamila. ³ Ghoso mulume,mu kulola ku Petelo nu Yoani babagha bakw'ingila mo,abemagha lukaso. ⁴ Petelo nu Yoani,bamwengeleshagha nu kutenda:Twengeleshe. ⁵ Nu abengeleshagha bubibu nu ekulemalila kweleshibwa kikayi nabo. ⁶ Agho Petelo amubulagha :"Nshite kakulo ali nolo;tondo cha kinite,nkukwelesha cho: Mw'ishina lya Yesu -Kilishitu wa Nasaleti,imaluka nu wende. ⁷ Nu mu kumukata na kuboko kw'indume,amwimaluchagha.Mweso nkungu,mashinshi nu makosogholo maghe manakagha; ⁸ mu kulenga,imalagha nu kutabanga.Ingilagha ghamoyi nabo mu numba sa kukumbamila,kutabanga,kulenga nu akughanula Ghongo. ⁹ Bansayi bamulolagha ko bwa kutabanga nu kughanula Ghongo. ¹⁰ Bamumanililagha buno u ghoso wendagha w'ikala gha mwingilo musogha wa numba sa kukumbamila kusegha lukaso ,nu ba ghanaghanagha ku byamwikinde. ¹¹ Bwa tashighagha Petelo nu Yoani,bantu bansayi bendagha lubilo ku beli ,ku kitiko ki kumwana cha Solomono. ¹² Mukulola kobo,Petelo abulagha bantu:BaIsilaeli ki kimwaghanaghana nacho?Buni bu mwatwengelesha bubibu?Anga ku maghala mitu u kutwalamya ghoso muntu? ¹³ Ghongo wa Bulaimu,wa Isaka nu wa Yakobo,Ghongo wa batata,aghanulile mukiti waghe Yesu,u mwesanagha nu kumutuna gheli Pilato,walondagha amukandule. ¹⁴ Mwatunagha Wasanana nu Wabulili,nu mwemagha bakandule mwiti. ¹⁵ Mwityagha Mwami wa kalamo,watuchwagha ku bakuyi na Ghongo;tuli bateneneki baghe. ¹⁶ Nti Ku lukatisho lw'ishina lyaghe uchasula ghoso u mukumumona ko nu mukumumana alama;Kwa kumukatisha,u kwalamya ghoso muntu mu miso minu. ¹⁷ Nu lola,bisakwitu,mu kw'inda mulenganya, benywe nu bami binu uchasula mwakita ubo. ¹⁸ Tondo Ghongo akukishe byatendagha mu kanywa ka balenganya,buno Kilishitu waghe akanuba. ¹⁹ M'wisungule mitima, buno bwaghi bwinu bushililile, ²⁰ b'uno nkungu nsogha sa Mukota sike,nu asinge Yesu -Kilishitu u mweleshibwe, ²¹ ukasekelwa n'ighulu kwikila bu kakuka binsayi anga bwatendagha Ghongo kutingila kanywa ka balenganya basanana. ²² Musa atendagha :Mukota Ghongo winu akatucha munkatighi na benywe ungo mulenganya ang'ine;mukamwongwilila ku binsayi bya kababula, ²³ nu olya ukanana kongwilila ghoso mulenganya,akatuchwa munkatighi na bantu. ²⁴ Balenganya bansayi ba batendagha,tukila Samwele,batendagha nubo kwebyo bindi. ²⁵ Mweli bana ba balenganya nu b'indaghi lyakitagha Ghongo na batata,mu kubula Bulaimu:Bilongo binsayi bya kisi bikakasanilwa kutingila kilongo chobe. ²⁶ Kuwe u kwatukishe tanga Ghongo mukiti waghe ,amusingagha buno abakasanile, mu kutucha umoyi umoyi mu bwaghi.