¹ Busi bwa Pentekote,babagha bikalile ghamoyi. ² Muku kebya nu kulambula,kwatukagha kw'ighulu,ishuki anga lya lumpumpu lunene,nu l'isashagha numba si babagha bikalile mo. ³ Lwembe lwasusana anga lwa kaya,lwabakumbilagha nu kubabeghanya gha basambana,nu lwikalagha kw'itwe ly'omoyi moyi. ⁴ Nu bisalagha bansayi na Muusa Musogha,nu batendagha mu mitendeshi ningi,anga bubeleshwagha so na Muusa Musogha. ⁵ Tondo,ubo busi mwasangwagha mu Yelusalemu Bayuda,bantu bakatilila Kitondo cha Ghongo batukagha mu bilongo binsayi bya kisi. ⁶ Ku ghoso mulenge,bantu bengi bashwagha lubilo kubongwilila,nu na muntu na muntu ongwagha mu mutendeshi waghe. ⁷ Bansayi baghanaghanagha,nu batendagha gha basambana:Lola,bano bantu bakutenda ta bansayi ta ba Galilaya? ⁸ Nu buni bu tukubongwa na muntu na muntu mu mutendeshi waghe wabutwagha nao? ⁹ Ba ku Palate,baku Medi,nu babo ba ku Mesopotamia, ku Yudea,ku Kapodoke,ku Ponto,ku Asia, ¹⁰ ku Filigia,ku Panfilia,ku Misili,myelo sa Libia maleshila na Kulene,nu babo batukile ku Loma,Bayuda nu begheshwa. ¹¹ Bakelete,nu Balabu,buni bu tukubongwa mu mitendeshi situ bakughanula Ghongo? ¹² Baghanaghanagha bansayi,nu,mu kwinda bya kulenganya,batendagha gha basambana:U kiki kino? ¹³ Tondo bango basekagha ,nu kutenda :Balewile . ¹⁴ Agho Petelo,ghamoyi nabo ikumi n'omoyi imaluchagha mulenge,nu kubatenda mu bitondo bino:Bayuda, nu benywe bansayi mwikile mu Yelusalema,mumane buno,nu muteghe matuyi mu bitondo byani! ¹⁵ Bano bantu ta balefi,ubo bu mukulenganya,sicheli s'isatu eno. ¹⁶ Tondo bino u byatendwagha na mulenganya Yoeli: ¹⁷ Ghongo atendagha,mu bindi bishinda nkasandabanya Muusa wani ku muntu unsayi;basikila binu nu bakinga binu bakatenda bya bulenganya,bana binu bakamana bikatinga,nu bakungu binu bakalota ndoshi. ¹⁸ Naki,ku bakiti bani ba balume nu ba mukashi,mu bibyo bindi,nkasansila Muusa wani,nu bakatenda bya bulenganya. ¹⁹ Nkatucha bighanaghana kw'ighulu nu bitangalo mu kisi,mikilha,kaya,nu muuki. ²⁰ Musi ukaghaluka bulimaswa,nu mweshi kuba mikilha nu busi bwa kashwa we Mukota tabwika,busi bunene nu bwa lukumbu. ²¹ Agho ,olya uk'itatila ishina lya Mukota ak'ona. ²² Baisilaeli,mwongwilile bino bitondo !Yesu wa Nasaleti,ghoso watenenekwagha na Ghongo mu miso minu kutingila bitangalo,bighanaghana nu tumanililo twakitagha mu nkatighi na benywe,anga bu mukumana benywe binene; ²³ ghono muntu wesanaghwa kutingila bwashima Ghongo,mwamwitagha ku musalaba,mwamwityagha na maboko ma babi. ²⁴ Ghongo amutuchagha ku bakuyi, mu kumukandula mu lukwo,buno ta bunakoshibwe abanswe na lukwo. ²⁵ Kubuno Daudi atendagha kuwe:Nalolagha ku Mukota kubusho kwani,kubuno eli kw'indume lyani,buno nshiyungweyungwe. ²⁶ Nu mutima wani uli mu mboghimboghi,nu lulame lwani luli mu chelele;nu mubili wani u kwomulwa mu malelamilo. ²⁷ Kubuno ntukashighilila mutima wani mu kishiki cha bakuyi, nu ntukashima musanana wobe abole. ²⁸ Wandoshishe nsila sa kalamo,nkaba na mboghimboghi ku weli. . ²⁹ Bisakwitu,munimile nibabule bwasibwasi ku kitondo cha tatangulu Daudi,akwagha,nu akundwagha nu nsinda saghe tukusimona ko. ³⁰ Bwa besagha mulenganya nu bwa managha buno Kalagha amulaghagha ghamoyi na kulumbila buno ak'imika umoyi wa kibuti chaghe mu kishumbi chaghe, ³¹ kashi nti kutuka ku bakuyi kwa Yesu u kwatendelagha ubo,ntakashighwa mu kishiki cha bakuyi nu mubili waghe ta ukabola. ³² U ghono Yesu,watuchwa ku bakuyi na Ghongo;tuli beshwe bansayi bateneneki. ³³ Kwimikwa kw'indume kwa Ghongo,eleshibwe na Tata Muusa Musogha wa mulaghagha, nu wansanswagha kuwe,anga bumukulola nu kongwa. ³⁴ Kubuno Daudi ntabakamile kw'ighulu,tondo atenda:Mukota abula Mukota wani:Ikala kw'indume lyani, ³⁵ Kwikila gha nkabika baghini bobe babe ku binantilo byobe. ³⁶ Numba insayi sa Isilaeli simane busogha buno Ghongo akitile Mukota nu Kilishitu Ghoso Yesu u mwitagha ku musalaba. ³⁷ Kushila kongwa kwebyo bitondo bingi, mitima sabo sa bulughanile,nu babushagha Petelo nwengo ntumwa:Bisakwitu,tukakita buni ? ³⁸ Inga Petelo ababula: Mw'isungule ,nu na muntu apatishibwe mw'ishina lya Yesu- Kilishitu,mu kushighililwa bwaghi bwinu;nu mukasekela lukaso lwa Muusa Musogha. ³⁹ Kubuno indaghi lili kwinu,ku bana binu ,nu ku bansa beli bulayi n'inu,nu ku bengi bakamanwa na Mukota Ghongo witu. ⁴⁰ Nu,kubingo bitondo abatenenekile nu kubema mu kutenda:Mwi'onye na luno lughiso lubi. ⁴¹ Ba bimilagha kitondo bapatishwagha;nu ubo busi,ighanso lya begheshibwa likagha ku bantu kili anga elefu isatu. ⁴² Bikalagha mu meghesha ma ntumwa, mughomyo wa mubuto, kulya kampampa,nu mu masegho. ⁴³ Na muntu na muntu akwagha boba,nuwe akitagha bighanaghana nu bitangalo bingo kutingila ntumwa. ⁴⁴ Ba bansayi bakatishagha bikalagha ghamoyi,nu babikagha binsayi ghamoyi. ⁴⁵ Baghushagha byabo binsayi nu ku beghanya bi bamonagha gha basambana kulembana na nkasa sa muntu. ⁴⁶ Bendagha bindi binsayi mu numba sa kukumbamila,balyagha kampampa mu ma shumba,nu basangilagha indya lyabo na mboghimboghi nu mu mutima musogha, ⁴⁷ mu kutata Ghongo nu kweleshibwa mpanga'inene kuli bantu.Nu Mukota isashagha Kanisa na bantu bakatisha.