¹ Saulo alolagha ku lukwo lwa Setefano.Ubo busi kwabagha nsungyo ningi ku Kanisa ka Yelusalema;nu bansayi,kutucha ntumwa ba sandabanagha mu myelo sa Yudea nu sa Samalia. ² Bantu ba lukatisho lunene,bakundagha Setefano,nu kumulilila bubibu. ³ Sauli, we, wanubyagha Kanisa;mu kwingila mu mashumba,kukukula balume nu bakashi,nu kubalekela mu kahombo. ⁴ Ba basandabanagha bendagha ku bishiki bingi ,kusambala musaghu musogha. ⁵ Filipo,mu kwika mu musumba wa Samaliya asansagha, musaghu wa Kilishitu. ⁶ Bantu binsayi babagha bakongwilila busogha busogha bya bikutenda Filipo,gha bongwagha nu kulola ku bitangalo byakitagha. ⁷ Kubuno basumbu batukagha mu bantu mu kukugha bubibu,nu ba bensekile bighansa nu tusokoluma balamagha. ⁸ Nu kwabagha mboghimboghi inene ku ghoso musumba. ⁹ Mwoso musumba mwabagha ,muntu wamanaghwa Simoni,w'inkatagha buno mweme,akitagha butiki nu kughanyaghanya bantu ba Samaliya. ¹⁰ Bansayi,kulingila ku mwana muto nu kwika ku mukulu,bamongwililagha,nu kutenda: Ghono ite bwangato bwa Ghongo ,u bu kumanwa Bunene. ¹¹ Bamongwilagha bubibu,kubuno bindi bingi ba ghanaghanagha na butiki bwaghe. ¹² Tondo, mu kukatisha Filipo,wabagha u kubasambalila kitondo kisogha cha bukota bwa Ghongo,nu kw'ishina lya Yesu Kilishitu,balume nu bakashi bapatishwagha. ¹³ Simoni w'inene nuwe akatishagha, nu mukushila kupatishwa,ntashimagha lingo kushighana na Filipo,nu alolagha nu kwitangala ku bitangalo nu bighanaghana byakitwagha. ¹⁴ Ntumwa, sabagha ku Yelusalema,gha bongwagha buno Samaliya asekinde kitondo cha Ghongo,basingagha ko Petelo nu Yoani. ¹⁵ Babo,kwika ku Samaliya,ba baseghelagha,buno bisalilane na Muusa Musogha. ¹⁶ Kubuno ta kwabagha wampa w'isalilanagha na Muusa Musogha;bapatishwagha umpanga mw'ishina lya Mukota Yesu. ¹⁷ Agho Petelo nu Yoani ba babikilagha maboko,nu bi salilanagha na Muusa Musogha. ¹⁸ Simoni gha monagha buno Muusa Musogha eleshibwa bantu mu kubikilwa maboko na ntumwa, abeleshagha bikulo, ¹⁹ mu kutenda :Muneleshe nine obu bwangato ,buno olya unkabikila maboko isashwe na Muusa Musogha. ²⁰ Tondo Petelo amubulagha:Bikulo byobe bibole ghamoyi n'owe,kubuno walenganya buno lukaso lwa Ghongo lu kughulwa na bikulo! ²¹ Kobe taku kibhu ali kikayi mwecho kitondo,kubuno mutima wobe ta musogha kuli Ghongo. ²² Insungule mutima ku bubi bobe ,nu segha Ghongo buno mulenganya wobe mubi ushighililwe,ndi bwakoshibwa;. ²³ Kubuno nalola buno weli mu kishiki cha lubaba,nu mu nkando sa bwaghi. ²⁴ Simoni aakulagha:Munseghele benywe b'inene kweli Mukota,buno bimwatenda tabinikile. ²⁵ Kushila kuteneneka kitondo cha Mukota,nu mu kushila kunsasa,Petelo nu Yoani bakulukagha ku Yelusalema,mu kusambala musaghu musogha mu myelo ningi sa Basamalia. ²⁶ Mugheshi umoyi wa Mukota,mu kutenda na Filipo amubulagha :Imaluka,nu nda kibe cha ku kantighi ,mu nsila sa kutuka Yelusalema kwikila ku Gasa, seso sa kalula. ²⁷ Imalukagha,nu kwenda.Nu lola,muntu umoyi wa Etiopia ,watambile,mukiti wa Kandake,mughole wa Mwami wa Etiopia,nu mulangi wa butumba bwaghe,akwenda kwela ku Yelusalema , ²⁸ mu kukuluka ,abundile mu mutukali waghe ,nu akusoma kitabo cha mulengagha Isaya. ²⁹ Muusa wabulagha Filipo: Shighelela bwighi na mutukali. ³⁰ Filipo atibitilagha,nu kongwa mu Etiopia akusoma kitabo cha mulenganya Isaya.Ing'amubusha:Ukumana bi ukusoma? ³¹ Aakulagha: Buni bu ninabimana ndi takuli ukundosha byo? Nu abulagha Filipo abakame nu kwikala ghamoyi nawe. ³² .Mulili wa kitondo cha Ghongo wabagha akusoma u ghuno: Bamwekagha anga mbuli senda kuketulwa,nu anga chana cha mbuli cha kobile nu ba kukikala myosa,ta kikutenda champa. ³³ .Mu kusekelelwa kwaghe , kwaghibwa kwaghe kwatuchwa.Nu kilongo chaghe, nayi ukaki ghanula?Kubuno kalamo kaghe katuka mu kisi. ³⁴ Watambile abushagha Filipo: Nakusegha,nayi ukutendwa ghano na mulenganya?Ndi w'inene ali ungo muntu? ³⁵ Agho,Filipo mu kutenda nawe, alingilagha k'oso mulili ,nu kumusambalila musaghu musogha wa Yesu. ³⁶ Mwa mulughendo lwabo,basangagha masi.Nu Watambile atendagha:Lola masi,ki chanangila nshi patishibwe? ³⁷ Filipo atendagha:Ndi wakatisha na mutima wobe unsayi,binsayi bya koshibwa. Watamba aakulagha:Nakatisha buno Yesu Kilishitu eli Mwana wa Ghongo. ³⁸ Imashagha mutukali ,Filipo nu Watamba bakumbagha bo babili mu lusi,nu Filipo amupatishagha. ³⁹ Mu kutuka mu lusi,Muusa wa Mukota wekagha Filipo,nu Watamba nta mulolagha ko lingo.Mu mboghimboghi,endagha. ⁴⁰ Filipo isangile ika ku Asote,endagha ku Kaisalia mu kunsasa musaghu musogha mu misumba s'atingagha ko.