¹ Ku bindi bitano,Anania Sankogha munene ikagha ghamoyi na bakungu nu muntu wakwatula bitondo ukumanwa Teletule.Batalikilagha Polo kweli mukulu wa musumba. ² Polo amanwagha,nu Teletule amutalikilagha,mu bino bitondo: ³ Mughanulwa Felisi,watwelesha boolo bunene butwasekela,nu kilongo kino cha ghaluka kisogha ubo bu wakikata;u bi tukumana ku bunsayi nu kunsayi. ⁴ Tondo,buno nshikutingishe nkungu ningi,nakusegha ongwilile ,mu busogha bobe,bikeke bitwite bya kukubula . ⁵ Twasangile ghono muntu ite lusambo lwanaka,ekulutha malekanuko mu Bayuda ba kisi kinsayi,we mukulu w'indini lya bisa Nasaleti, ⁶ nu kw'enegha numba sa kukumbamila.Nu twamukandile.Twashimile tumwaghye kutingila mulembe witu; ⁷ Tondo mu kwika kwa mukulu Lusiasi,ing'amutucha mu maboko mitu mu lwayo lwingi, ⁸ mu kukasha bataliki baghe bende ku weli. Uw'inene mu kumubusha,wamane ki chasula twamutalikila. ⁹ Bayuda bimilagha buno ubweli bitondo ubo. ¹⁰ Ghabagha mukulu wa musumba amubula atende,Polo ing'atenda:Mu kumana buno mu myaka ningi weli shushi wa kino kilongo,mu bulili u munkwitendela. ¹¹ Ta kwatinga bindi ikumi nu bibili,ukumana uw'inene,nendagha ku Yelusalema ku kumbamila. ¹² Nshasangwagha mu numba sa kukumbamila,ali Sinakoki ali mu musumba,buno nkw'enda myango na muntu wampa,ali nkukulumanya bantu. ¹³ Nu tabanakosha kulosha bi bantalikila ko. ¹⁴ Nkukubula busogha nku kolela Ghongo wa batata milimo ,kuyangana na bi bakumana buno indini,mu kukatisha binsayi byatililwe mu mulembe nu balenganya, ¹⁵ nu mu kuba n'ite malelamilo mu Ghongo,ango bu bite nubo mo, bukaba kutuka ku bakuyi ku basanana nu ku batasanana. ¹⁶ Uchasula nkw'ikokomesha nibe na mulenganya musogha kweli Ghongo nu kweli bantu. ¹⁷ Gha tingagha myaka ningi,nashwile buno niche nkaso mu kilongo chani,nu kulisha mitulo. ¹⁸ Agho u gha nsangagha Bayuda bamoyi ba ku Asia nkw'iyenja mu numba sa kukumbamila,tamwabinde musanganano ali lwayo. ¹⁹ Bindoshe lino ku weli buno bantalikile ,ndi bite kitondo n'ine. ²⁰ Ali baloshe bubi bwani gha nintendelagha mu lusu lwa matenda , ²¹ ,ndi ta kicho kitondo kimoyi kinatendagha mu nkatighi nabo:Nti ku bya kutuka muntu ku bakuyi u binaghyibwa ko lelo. ²² Felisi,wamanagha busogha busogha amo meghisha,abakuluchagha mu kutenda:Ghakika mukulu wa basula Lusiasi nkamana lil'itenda linu. ²³ Nu akakishagha mulangi wa basula alange Polo ,nu mukushighilila gha keke,nu kunania muntu waghe wampa wa kumukitila mulimo. ²⁴ Mu bindi bikeke,Felisi ashwagha ghamoyi na mukashi waghe Dilisila ,wabagha Muyuda,nu amanagha Polo.Amongwililagha ku lukatisho lwaghe kuli Kilishitu. ²⁵ Tondo ,Polo atendagha bingi ku bya bulili nu bya kulingimanya nu bya kwaghibwa mu bindi bikashwa,Felisi,mu kukwa boba ing'atenda:Mweno nkungu,tuka ghano; gha nkaba na nkungu,nkakumana. ²⁶ Alelamilagha buno Polo amweleshe bikulo;uchasulagha enda amumana ngendo ningi atende nawe. ²⁷ Gha tingagha myaka imbili ,nu Felisi ashighilagha kishumbi we Polisiusi Feshitusi .Mu kuboghyaboghya Bayuda,Felisi ashighagha Polo mu kahombo.